Pesalemo 108 - Tosi Tapu

Kole fakafetai

¹ Katiko. Pesalemo a Tavite.

² Ei Atua, kua tuu makeke loku loto ! E kau sua loa, e kau fakatatagi loa aku nea faimusika : ko loku kololia a ia !

³ Kolua alaala, laku lute mo laku alepe ! E kau fafagu loa le mafoata.

⁴ E kau fakamalo loa kiate koe i mua o kakai, Eteleno ! E kau sua loa kiate koe i mua o atu puleaga.

⁵ Talie e malaga lou agamalie o taualuga ake i le atu lagi, Ti mo lou agatonu o kaku ki ao.

⁶ Ei Atua, ke ke malaga i aluga o le atu lagi ! Ti ke taualuga ake lou kololia i le malama nei katoa !

⁷ O tupu ke saofaki latou ala e ke alofa ki ai, Ke ke fakamauli i lou lima atamai, ti ke ke tali mai kia matou !

⁸ Na fakasa e le Atua i lona maokioki : E kau malo loa, E kau vae loa Siseme, e kau fuafua loa le vaivailiua o Sikote ;

⁹ A aku Kalaate, a aku Manase ; Ko Efalaimi ko le palaa o loku ulu, Ti ko Suta ko loku tokotoko pule ;

¹⁰ Ko Moape ko le fa tane leia e kau maanu ai ; E kau ti loku fa taka ki Etome ; E kau fai ni kalaga fakafiafia ki le fenua o le kau Filisitini !

¹¹ Ko ai e ave ia loa au ki le kolo tau ? Ko ai e ave ia loa au ki Etome ?

¹² Pe leaise ko koe, ei Atua, leia na tiaki ia matou, Ti e leaise koi ano mo amatou kau solia ki le tau, ei Atua ?

¹³ Soli mai se tokoi kia matou i le mamae ! Talie ko le tokoi a le tagata ko vaiga ata.

¹⁴ Mo le Atua, e motou fai loa ni gaoi lalasi ; E takatakafi loa e ia omatou fili.