Pesalemo 106 - Tosi Tapu

Ko le patigataa o Iselaele mo le agamalie o le Atua

¹ Kotou fakafetai ki le Eteleno ! Kotou fakafetai ki le Eteleno, talie e agamalie a ia, Talie e tologa lona manava alofa o lee gato !

² Ko ai e fakasa ia loa a gaoi taualuga a le Eteleno ? Ko ai e fakasa ia loa le fakafetai katoa kiate ia ?

³ Manuia latou ala e tausi ia le lao, ala e fai ia le faitotonu i temi fuli !

⁴ Eteleno, manatui au i lou alofa ki lou kakai ! Manatui au i lau tuku kiate ia lou tokoi,

⁵ O tupu ke kau tio ki le manuia o lau kau filifiliia, Ti ke kau fiafia i le fiafia o lou kakai, Ti ke kau fakakololia mo lou tofiga !

⁶ Na motou agasala ofaipe omatou tamana, Na motou fai le agaveli, ti na motou fai le veli.

⁷ Na leaise tokaga loa omatou tamana i Esipito ki au milakulo, Na leaise lotou toe manatui loa le lasi o ou kalasia, Na lotou agatuu loa kiate koe o ofi ki le tai, o ofi ki le Tai Kula.

⁸ Kae na fakamauli loa e ia latou o tupu ko lona suafa, Ke fakasa ai lona mafimafi.

⁹ Na valoki loa e ia le tai Kula, ti na malo loa a ia ; Ti na fakasaele loa e ia latou i le loloto ofaipe se toafa.

¹⁰ Na fakamauli loa e ia latou i le lima o leia na vesia kia latou, Na saofaki e ia latou i le lima o le fili.

¹¹ Na lomaki loa e atu vai olatou fili : Na leaise mauli loa se toka tasi.

¹² Ti na lotou tui loa ki ana folafola, Na lotou sua loa ona fakafetai.

¹³ Kae na lotou galoi vave loa ana gaoiaga, Na leaise lotou talitali loa ki le fakasoko o ana fakatuutuu.

¹⁴ Na lotou manumanu loa i le toafa, Ti na lotou asiasii loa le Atua i le potu lavaki.

¹⁵ Na soli loa e ia kia latou le nea leia na lotou kole ; Ti na kakau loa e ia le fakalaulautetea ki olatou tino.

¹⁶ Na lotou finenonofo loa kia Moisese i lolatou nofolaga, Ti mo Alone, le tagata fakasausau maokioki a le Eteleno.

¹⁷ Na mavaa loa le kele, ti na folo loa e ia Tatane, Ti na toe mapono loa a ia ki le kakai a Apilame ;

¹⁸ Na tutu loa e le afi lola kakai, Na tamate loa e le ula le kau agasala.

¹⁹ Na lotou fai loa se uviki pipi i Olepe, Na lotou punou loa i mua o se fakatata ukamea na saka.

²⁰ Na lotou fetogi loa lolatou kololia Ki se fakatata o se pipi leia e kai luna.

²¹ Na lotou galoi loa le Atua, lolatou fakamauli, Leia na fai ia ni nea lalasi i Esipito,

²² Mo ni milakulo i le fenua o Kami, Mo ni nea fakatalatupua i le Tai Kula.

²³ Ti na masau loa a ia ke tamate latou ; Kae na tuu loa i ona mua Moisese, lana filifiliia, Ke fakamaliu lona sausau ti ke taofi a ia ke maumaui le kakai.

²⁴ Na lotou vesia loa ki le fenua o nea malilie ; Na leaise lotou tui loa ki le folafola a le Eteleno.

²⁵ Na lotou lalau loa i olatou falela, Na leaise lotou fakalogo loa ki lona leo.

²⁶ Ti na siki loa e ia lona lima o fakamaoki Ke tuku latou ke mamate i le toafa,

²⁷ Ke tuku lolatou sakoga ke mate i lotolotoga o atu puleaga, Ti ke veteki latou i loto malie o fenua pagani.

²⁸ Na lotou pipiki loa kia Paale-Peoli, Ti na lotou kai loa ki ni vikitima na momoli ki le kau mate.

²⁹ Na lotou fakatupu ia loa le sausau o le Eteleno i alatou gaoi, Ti na oso loa se malaia veli kia latou.

³⁰ Na tuu ake loa Finesi o fai le nea leia na tonu ke fai, Ti na tuu loa le malaia ;

³¹ Na lau loa le nea lena kiate ia ko se faitotonu I tautupu ki tautupu, o lee gato.

³² Na lotou toe fakatupu loa le sausau o le Eteleno i vai o Melipa ; Ti na tautea loa Moisese o tupu ko latou,

³³ Talie na lotou fakagaegae loa le loto o Moisese, Ti na fai loa e ia ni masau noa i ona laugutu.

³⁴ Na leaise lotou maumaui loa a kakai, Ala na fakatotonu e le Eteleno kia latou ke maumaui.

³⁵ Na lotou fefiloaki loa mo atu puleaga, Ti na lotou ako loa alotou gaoiaga.

³⁶ Na lotou tausi loa ki olatou taulaatua, Ala na liliu loa ko se masele kia latou ;

³⁷ Na lotou fai loa ni sakilifisio ki olatou vosa Ti mo olatou taineliki ki taulaatua.

³⁸ Na lotou liligi loa le toto saosaoa, Le toto o olatou vosa mo olatou taineliki, Ala na lotou momoli loa ki taulaatua o Kanaane, Ti na fakalialia loa le fenua i tukipo.

³⁹ Na lotou fakakelekele loa latou ki alatou gaoi, Na lotou faiaga loa ki alotou gaoiaga.

⁴⁰ Na ula loa le sausau o le Eteleno ki lona kakai, Ti na fakalialia loa a ia ki lona tofiga.

⁴¹ Na tuku loa e ia latou ki lima o atu puleaga ; Ko latou ala na vesia kia latou na pule loa kia latou.

⁴² Na fakaveliveli loa latou e olatou fili, Ti na lotou luma loa i le fakataulalo kia latou.

⁴³ Na saofaki loa e ia latou o tua lasi ; Kae na lotou fakasa loa lolatou agatuu i alatou manatu, Ti na lotou liliu loa o fakaaloalofa o tupu ko alatou agaveli.

⁴⁴ Na tio loa a ia ki lolatou mamae, I lana logo ki alatou tagi.

⁴⁵ Na manatui loa e ia lana sai leia na fai mo latou ; Ti na aloalofa loa a ia kia latou i lona agamalie lasi,

⁴⁶ Ti na fakatupu loa e ia le manava alofa i loto o latou ala na fakapopula ia latou.

⁴⁷ Fakamauli matou, Eteleno, ko lomatou Atua ! Ti ke ke fakatasii mai matou mei loto malie o atu puleaga, O tupu ke motou fakafetai ki lou suafa maokioki, Ti ke motou maua loa lomatou kololia i le fakamalo kiate koe !

⁴⁸ Ke fakamalo ki le Eteleno, le Atua o Iselaele, mei le lee gato ki le lee gato ! Ti ke pati le kakai katoa : Amene ! Kotou fakafetai ki le Eteleno !