Pesalemo 105 - Tosi Tapu

Agatonu o le Atua ki Iselaele

¹ Kotou fakafetai ki le Eteleno, kotou fetapa ki lona suafa ! Kotou fakasa i le lotolotoga o atu kakai ana gaoi lalasi !

² Kotou sua, kotou sua kiate ia ! Kotou masau ki ana gaoi fulumalilie fuli !

³ Kotou vikiviki ki lona suafa maokioki ! Ke fiafia a loto o latou ala e afa ia le Eteleno !

⁴ Kotou afa le Eteleno mo lana tokoi, Kotou afa tuumau ona mata !

⁵ Kotou manatui a nea fakatalatupua ala na fai e ia, Ana milakulo, mo fakamaauaga o lona gutu,

⁶ Sakoga o Apalaamo, lana tagata fakasausau, Fanau o Sakopo, lana kau filifiliia !

⁷ Ko le Eteleno ko lotatou Atua ; e fai e ia ana fakamaau i le malama nei katoa.

⁸ E manatui tuumau e ia lana sai, Ana fakapapau ki tautupu e afe,

⁹ Le sai leia na fai e ia mo Apalaamo, Ti mo le fakapapau leia na fai e ia kia Isaake.

¹⁰ Na fakatuu e ia a ia ko se lao kia Sakopo, Ko se sai lee gato ki Iselaele,

¹¹ O pati : E kau soli atu loa kiate koe le fenua o Kanaane Ofaipe se tofiga leia kua tuku atu kia koutou.

¹² Na lotou toka lavaki fua i le temi a ia, Io na lotou toka lavaki ai, ti na lotou matapule i le fenua,

¹³ Ti na lotou feanoaki mei leia puleaga ki leia puleaga, Ti mei leia puleaga ki leia puleaga ;

¹⁴ Kae na leaise fakataga loa e ia ke fakaveliveli latou e se tasi, Ti na tautea loa e ia ni sau o tupu ko latou :

¹⁵ Aua na kotou fafa ki aku filifiliia, Aua na kotou fai se nea veli ki aku polofeta !

¹⁶ Na kalagai loa e ia le oge ki le fenua, Na tuuti loa e ia le pane.

¹⁷ Na kakau loa e ia i olatou mua se tagata : Ko Sosefo na fakatau ofaipe se tagata popula.

¹⁸ Na fakamamae loa ona vae ki ni sai, Na sai loa se tini ukamea ki lona ua,

¹⁹ O kaku ki le temi leia na soko ai loa le nea leia na fakasa fakatomua e ia, Ti na asiasii ai loa a ia e le folafola a le Eteleno.

²⁰ Na fakatotonu loa e le sau ke tatala ona sai, Io, na fakalauatea loa a ia e le pule o atu kakai.

²¹ Na fakanofo loa e ia a ia ko le pule o lona fale, Ko le kovana o ona koloa fuli,

²² O tupu ke tinii faifaitalisa e ia lana kau pule, Ti ke ako e ia le poto ki le kau matua.

²³ Ti na au loa Iselaele ki Esipito, Ti na nofo loa Sakopo i le fenua o Kami.

²⁴ Na fakaliliu loa e le Atua lona kakai ke fanaunau, Ti ke makeke ake i ona fili.

²⁵ Na fetogi loa e ia olatou loto, o lotou vesia loa ki lona kakai, ti na lotou fai fakakaka loa ki ana tagata fakasausau.

²⁶ Na kakau loa e ia Moisese, lana tagata fakasausau, Ti mo Alone, leia na filifili e ia.

²⁷ Na la fai loa ni nea fakatalatupua i lona makeke i loto malie o olatou fili, Io, na la fai loa ni milakulo i le fenua o Kami.

²⁸ Na kakau loa e ia le fakapouli, ti na aumai loa e ia le pouli, Ti na leaise la agatuu loa ki lana folafola.

²⁹ Na fakaliliu loa e ia olatou vai ke toto, Ti na fakamamate loa e ia olatou ika.

³⁰ Na apele loa le fenua i kelenui, O kaku ki kogafale o lolatou sau.

³¹ Na folafola loa a ia, ti na sa loa ni lago utiuti, Mo ni kutu i lolatou fenua katoa.

³² Na fakato loa e ia kia latou le ua fefeka, Mo ni ulai afi i lolatou fenua.

³³ Na taai loa e ia alatou vite mo olatou fiki, Ti na fatifatii loa e ia a laakau o lolatou fenua.

³⁴ Na folafola loa a ia, ti na sa loa ni seseivaka, Ala na leaise mafai ke lau,

³⁵ Ala na kai ia a mutie fuli o le fenua, Mo fua o olatou faisaga.

³⁶ Na taai loa e ia a uluaki tupu fuli i lolatou fenua, A uluaki fua fuli o lolatou makeke.

³⁷ Na fakamavae loa e ia lona kakai mo se paaga mo se aulo, Ti na leaise siga loa se tasi i ona faasiga.

³⁸ Na fiafia loa le kau Esipito i lolatou mavae, Talie na lotou i ai kia latou.

³⁹ Na folasi loa e le Eteleno le ao ke fakamalumalu ia latou, Ti mo le afi ke fakamalama ia latou i le pouli.

⁴⁰ I lalatou kole, na aumai loa e ia kia latou ni manu lele, Ti na fagai loa e ia latou o makokona ki le pane o lagi.

⁴¹ Na fakamavaa loa e ia le utu, ke sali mei ai le vai ; Ti na tafe loa le vai ofaipe se vaitafe i ganea malo.

⁴² Talie na manatui loa e ia lana folafola maokioki, Ti mo Apalaamo, lana tagata fakasausau.

⁴³ Na fakamavae loa e ia lona kakai i le fiafia lasi, Lana kau filifiliia i loto malie o ni kalaga fakafiafia.

⁴⁴ Na soli loa e ia kia latou a kele o atu puleaga Ti na lotou maua loa a fua o gaoi a atu kakai,

⁴⁵ O tupu ke lotou tausi ana fakatotonu Ti ke lotou fai ana lao. Kotou fakafetai ki le Eteleno !