Pesalemo 104 - Tosi Tapu

Fakafetai ki le Atua o le malama nei

¹ Loku laumalie, fakafetai ki le Eteleno ! Eteleno, loku Atua, e ke lasi ai ! E ke kofu ki le gigila mo le fulumalie !

² E kofu e ia le malama ofaipe se taupulupulu ; E folasi e ia le lagi ofaipe se falela.

³ E fai e ia ki atu vai le taufufu o lona nofoaga ; E too e ia a ao ko lana saliote ; E saele a ia i kapakau o le matagi.

⁴ E fai e ia ki matagi ana tagata avelogo, Ki ulai afi ana tagata fakasausau.

⁵ Na fakatuu e ia le malama nei i ona fakatafito, E leaise taugaoi loa a ia i se aso.

⁶ Na ke ufiufi a ia ki le moana ofaipe se taupulupulu, Na tuu a atu vai i tumutumu o mauga ;

⁷ Kae na lotou sola i lau valoki, Na lotou puna i le leo o lou mana.

⁸ Na malaga loa ni mauga ki aluga, na ifo loa ki lalo ni vaivailiua, I le ganea leia na ke fakatotonu kia latou.

⁹ Na ke fakatuu loa se koiga ke aua na fakalaka a vai, O tupu ke aua na lotou toe au o ufiufi le kele.

¹⁰ E taki e ia a matapuna vai ki ni liua Ala e tafe i vasa o mauga.

¹¹ E lotou fakainu a manu fuli o le vao ; E iinu o mau a asino vao i ai.

¹² E nonofo a manu lele o le lagi i olatou laugutu, Ti e lotou sua i laa o laakau.

¹³ Mei lona nofoaga taualuga, e fakavai e ia a mauga ; E makona le kele i le fua o au gaoi.

¹⁴ E fakasomo e ia le mutie ki manu lalasi, Ti mo magiti ki le mauli o le tagata, O tupu ke fakatupu e le kele le nea kai,

¹⁵ Le vino leia e fakafiafia ia le loto o le tagata, Ti mo le lolo leia ke fakagigila ia ona mata, Ti mo le pane leia ke fakamakeke ia le mafu o le tagata.

¹⁶ E inu laakau a le Eteleno o mau, A sete o Lipane, ala na to e ia.

¹⁷ Ko le ganea lena e fai ai a ofaga o manu lele ; E maua e le amatuku lona nofoaga i sipele.

¹⁸ Ko le nofoaga o koti vao ko mauga taualuga, Ko le maloloaga o tamani ko utu.

¹⁹ Na fai e ia le masina ke fakamailoga ai a temi ; E iloa e le laa le lakaga leia e tonu ke galo ai.

²⁰ E ke aumai le fakapouli, ti e pouli ; Ti e taugaoi loa a manu fuli o le vao ;

²¹ E tagi a uviki laione ki se kanoi manu, Ti e lotou kole ki le Atua lalatou nea kai.

²² E sopo le laa : e lotou pupuli, E lotou momoe i olatou ana.

²³ E ulu le tagata ki fafo, o ano ki lana gaoi, Ti e gaoi a ia, o kaku ki le afiafi.

²⁴ E mauke ai au gaoiaga, ei Eteleno ! Na ke fai latou fuli i le poto. E apele le malama nei i au nea malilie.

²⁵ Ko leinei le tai lasi mo lau lasi : I ai e taugaoi ni manu liliki mo ni manu lalasi ala e leaise mafai ke lau.

²⁶ E feanoaki i ai a vaka, Ti mo le leviatane leia na ke fakatupu ke manogi i le vai.

²⁷ E amanaki malie a manu fuli ana kiate koe, Ke ke soli kia latou le nea kai i lona temi.

²⁸ E ke soli a ia kia latou, ti e lotou tali a ia ; E ke fakamavaa lou lima, ti e lotou kai makona au nea malilie.

²⁹ E ke fufu ou mata : e lotou lulu ; E ke too lalatou tukumanava : e lotou mamate, O toe liliu ki le efu leia na lotou au mei ai.

³⁰ E ke kakau mai lou Laumalie : e fakatupu latou, Ti e ke fakafoou le fuga o le malama nei.

³¹ Ke tuu le kololia o le Eteleno o lee gato ! Ke fiafia le Eteleno i ana gaoiaga !

³² E tio a ia ki le kele, ti e lulu a ia ; E fafa lona lima ki mauga, ti e lotou kokofu.

³³ E kau sua loa le Eteleno i loku mauli katoa, E kau fakafetai loa ki loku Atua i loku mauli katoa.

³⁴ Ke logo malie aku masau kiate ia ! E kau loto ke kau fiafia i le Eteleno.

³⁵ Ke pupuli le kau agasala i le malama nei, Ti ke aua na toe maua le kau agaveli ! Loku laumalie, fakamalo ki le Eteleno ! Kotou fakafetai ki le Eteleno !