Pesalemo 103 - Tosi Tapu

Sua fakafetai

¹ A Tavite. Loku laumalie, fakafetai ki le Eteleno ! Ko nea fuli iate au, ke fakafetai ki lona suafa maokioki !

² Loku laumalie, fakafetai ki le Eteleno, Ti aua na ke galoi se nea fua e tasi i ana nea malilie !

³ Ko ia leia e fakamolemole ia au agaveli fuli, Leia e fakamauli ia ou masaki fuli ;

⁴ Ko ia leia e saofaki ia lou mauli i le popoko, Leia e fakapalaa ia a koe ki le agamalie mo le manava alofa ;

⁵ Ko ia leia e fakamakona ia lou temi matua ki nea malilie, Leia e fakaliliu ia a koe o tupulaga ofaipe le akuila.

⁶ E faitotonu le Eteleno, E fakamaau e ia i le maoki latou ala e fai fakaveliveli.

⁷ Na fakasa e ia ona ala kia Moisese, Ana gaoi ki fanau o Iselaele.

⁸ E manava alofa le Eteleno mo loto alofa, E kataki fualoa a ia mo agamalie ;

⁹ E leaise valoki o lee gato, E leaise taofi e ia lona sausau o lee gato ;

¹⁰ E leaise fai e ia kia tatou o mulimuli ki atatou agasala, E leaise fakatua e ia tatou o mulimuli ki atatou agaveli.

¹¹ Kae ofaipe le lagi e taualuga i le kele, E toe lasi foki lona agamalie kia latou ala e i kiate ia ;

¹² Ofaipe le potu esite e mamao i le potu uesite, E toe fakamamao loa e ia atatou agasala ia tatou.

¹³ Ofaipe se tamana leia e alofa ki ana fanau, E alofa foki le Eteleno kia latou ala e i kiate ia.

¹⁴ Talie e iloa e ia le nea leia na fau tatou ki ai, E manatui e ia ko tatou ko le efu.

¹⁵ Ko le tagata ! E tatau ona aso mo le mutie, E se a ia ofaipe le se o faisaga.

¹⁶ Ka agi se matagi kiate ia, e puli a ia, Ti e leaise toe iloa a ia e le ganea leia na tuu ai.

¹⁷ Kae e lee gato le agamalie o le Eteleno kia latou ala e i kiate ia, Ti mo lona manava alofa ki fanau o alatou fanau,

¹⁸ Kia latou ala e tausi ia lana sai, Ti e manatu ki ana folafola ke fai latou.

¹⁹ Na fakatuu e le Eteleno lona ekeekeaga fakasau i le atu lagi, Ti e pule a ia ki nea fuli.

²⁰ Kotou fakafetai ki le Eteleno, koutou ko ana kau aselo, Ala e mafimafi i le makeke, ti e fakasoko ia ana fakatotonu, O fakalogo ki le leo o lana folafola !

²¹ Kotou fakafetai ki le Eteleno, koutou fuli ko ana kau tau, Ala ko ana tagata fakasausau, ti e fai ia lona finegalo !

²² Kotou fakafetai ki le Eteleno, koutou fuli ko ana gaoi, I potu fuli o lona pule Loku laumalie, fakafetai ki le Eteleno !