Pesalemo 102 - Tosi Tapu

Kole i le temi mamae

¹ Kole a se tagata e mamae, mo ka gaegae o lona loto, ti mo ka fai e ia lana tagi i mua o le Eteleno.

² Eteleno, fakalogo mai ki laku kole, Ti ke kaku atu laku tagi kiate koe !

³ Aua na ke fufu mai kiate au ou mata i le aso o loku mamae ! Fakalogo mai lou taliga kiate au mo ka kau tagi atu kiate koe ! Tali vave mai kiate au !

⁴ Talie e pupuli oku aso ofaipe le afu, Ti e ulaula oku ivi ofaipe se ugaafi.

⁵ Kua lavea loku loto, ti kua malo a ia ofaipe le mutie ; Kua galo foki iate au le kai o laku pane.

⁶ I le lalasi o aku tukumanava, Kua pipiki loku kili ki oku ivi.

⁷ Kua kau tatau mo le pelikano o le toafa, Kua kau faipe le lulu o potu lavaki ;

⁸ Kua puli le fia moe iate au, ti e kau Faipe le manu lele leia e nofo toka tasi i se taufufu.

⁹ I aso fuli e lauveli oku fili kiate au, Ti e fakapapau iate au latou ala e vesia kiate au.

¹⁰ E kau kai le efu ofaipe le pane, Ti e kau filo oku loimata ki laku nea inu,

¹¹ O tupu ko lou ita mo lou sausau lasi ; Talie na ke siki au, o ti ki mamao.

¹² Kua tatau oku aso mo le malu o le afiafi, Ti e kau malo ofaipe le mutie.

¹³ Kae ko koe, Eteleno, e ke sau o lee gato, Ti e fakamanatu lou suafa i tautupu mo tautupu.

¹⁴ E ke tuu ake loa ki aluga, ti e ke alofa loa ki Sione ; Talie kua tatae le temi ke alofa ai kiate ia ;

¹⁵ Talie e alofa au tagata fakasausau ki ona fatu, E lotou pipiki ai ki lona efu.

¹⁶ Ti e i loa a atu puleaga ki le suafa o le Eteleno, Ti mo sau fuli o le malama nei ki lou kololia.

¹⁷ Io, e toe laga loa e le Eteleno a Sione, E sa loa a ia i lona kololia.

¹⁸ E tokaga a ia ki le kole a le tagata e mamae, E leaise tiaki e ia lana kole.

¹⁹ Ke tosi le nea lena ki le tautupu ka au, Ti ke fakamalo ki le Eteleno le kakai leia ka fakatupu loa !

²⁰ Talie e tio a ia mei le ganea taualuga o lona maokioki ; Mei aluga o le atu lagi, e tio le Eteleno ki le malama nei,

²¹ Ke fakalogo ki tagi a le kau popula, Ke saofaki latou ala ka mamate,

²² O tupu ke lotou fakasa i Sione le suafa o le Eteleno, Ti mo ona fakavikiviki i Selusalemi,

²³ Mo ka fakatasi loa a atu kakai fuli, Ti mo atu puleaga fuli, ke fakasausau ki le Eteleno.

²⁴ Na fatii e ia loku makeke i le ala, Na fakatoetoe e ia oku aso.

²⁵ E kau pati : Loku Atua, aua na ke too au i le lotolotoga o oku aso, A koe leia e lee gato ou fetuu !

²⁶ Na ke fakatupu i le kamataaga le kele, Ti ko le lagi ko le gaoiaga o ou lima.

²⁷ E la pupuli loa, kae e ke agai aifuai ; E la popo loa ofaipe se kofu ; E ke fetogi loa laua ofaipe se taupulupulu, ti e fetogi loa laua.

²⁸ Kae ko koe, e ke tatau aifuai, Ti e leaise toe gato loa ou fetuu.

²⁹ E nonofo loa a vosa o au tagata fakasausau i lolatou fenua, Ti e tuu mau loa lolatou sakoga i ou mua.