Pesalemo 10 - Tosi Tapu

Le tagata agaveli mo lona tautea

¹ Eteleno, kolea e ke tuu ai mei mamao ? Kolea e ke mumuni ai i le temi o le mamae ?

² E tuli e le tagata agaveli le kau mativa i lona fia nealasi, E lotou pikiia i masele ala na fakatuu e ia.

³ Talie e fakakololia le tagata agaveli i lona manumanu, Ti e lauveli mo gologolo le tagata kaia ki le Eteleno.

⁴ E pati le tagata agaveli i lona fia nealasi : E leaise fakatua e ia ! E leaise Atua ! - Ko na ana manatu fuli.

⁵ E manuia ona ala i temi fuli ; E leaise kaku kiate ia au fakamaau, Ti e pusii e ia latou fuli ala e fakafesagai kiate ia.

⁶ E pati a ia i lona loto : E leaise kau siga, Ti e leaise toe kaku mai se malaia kiate au !

⁷ E apele lona gutu i malaia, mo kaka, mo loi ; Ti e maua i lalo o lona alelo le agatuu mo le veli.

⁸ E mumuni a ia i tafa o kolo liliki, Ti e tamate e ia le tagata agatonu i potu lavaki. E lamalama e ona mata le tagata mativa.

⁹ E moemoe a ia o leoleo mei lona mumuniaga, ofaipe le laione i lona ana ; E moemoe a ia ke tapo le tagata mativa ; E tapo e ia le mativa i lona kupega.

¹⁰ E tulotulolo a ia ki le kele, e fakagaegae fua a ia, Ti e vivilo le kau mativa ki ona motikuku.

¹¹ E pati a ia i lona loto : E loto galogalo le Atua ! E tapono e ia ona mata, e leaise tio a ia i se aso !

¹² Eteleno, tuu ki aluga ! Ei Atua, siki lou lima, Aua na ke galoi le kau mativa !

¹³ Kolea e gologolo ai le tagata agaveli ki le Atua ? Kolea e pati ai a ia i lona loto : E leaise ke tautea.

¹⁴ Kae e ke tio maoki, talie e ke tio ki le pakia mo le mamae, Ti e ke tokaga ki olatou mauli. Ko koe leia e fanaki ki ai le tagata mativa ! Ko koe leia e tokoi ki le toe sala matua !

¹⁵ Fatii le lima o le tagata agaveli, Tautea ana agaveli, ti ke puli a ia i ou mata !

¹⁶ E sau le Eteleno i tautupu mo tautupu, o lee gato ; E too loa a atu puleaga pagani i lona fenua.

¹⁷ Ei Eteleno, logo ki fakaamu a latou e mamae ! E ke fakamakeke olatou loto ; e ke tokaga lou taliga kia latou,

¹⁸ O tupu ke fakamaaui le toe sala matua mo leia e fakavelivelii i le faitotonu, Ti ke fakagato le fakaii a le tagata leia na too mei le kele.