Oseo 8 - Tosi Tapu

To le matagi, kai le afa

¹ Fakatuu le fakatagi pupusi ki lou gutu ! E oso le fili ofaipe se akuila ki le fale o le Eteleno, O tupu na lotou maumaui laku sai, Ti na lotou patigataa ki laku lao.

² E lotou tagi loa kiate au : Loku Atua, e motou iloa a koe ! matou, Iselaele !

³ Na tiaki e Iselaele le malie ; E tuli loa a ia e le fili.

⁴ Na lotou fakanofo ni sau, kae na leaise kau fakatotonu a ia, Ti mo ni pule kae na leaise lotou afa mai kiate au ; Na lotou fai ni taulaatua ki lalatou siliva mo lalatou aulo ; Koia leia e tuuti ai loa latou.

⁵ Na tiaki e le Eteleno lau uviki pipi, Samalia ! Kua mu loku sausau kia latou. E kaku loa ki afea lalatou fakafiti ke fakamea latou ?

⁶ E au a ia mei Iselaele, na fau a ia e se tagata tufuga, Kae e leaise ko le Atua ; Koia leia e liliu ai loa le uviki pipi o Samalia o efu.

⁷ Talie na lotou muluki le matagi, e lotou kai loa le afa ; E leaise lotou maua loa se taulu fulumeto e tasi ; Ko le nea leia e somo ake loa e leaise maua loa i ai se falina ; Ti kapau e maua loa se falina, e kai loa a ia e le kau matapule.

⁸ Kua folo Iselaele ! Kua lotou nofo i le temi nei i loto malie o atu puleaga Ofaipe se ipu leia e leaise mauiga.

⁹ O tupu na lotou ano ki Asilia, Ofaipe se asino vao leia e tuu toka tasi ; Na fai e Efalaimi ni nea alofa ke maua ai ni ona kaukau nea.

¹⁰ Logo ai na lotou fai ni nea alofa ki atu puleaga, I le temi nei e kau fakatasi latou, Ti kua vave fua le temi leia e lotou mamae ai loa i le kavega a le sau o aliki.

¹¹ Na liuliuga e Efalaimi a aletale ke agasala ai, Ti na fakavilo a ia e aletale ana ki le agasala.

¹² E kau pakia i le tosi o fakatotonu fuli o laku lao kiate ia, E leaise tokaga fua a ia ki se nea e tasi.

¹³ E lotou tamate ni manu o momoli mai kiate au, Ti e lotou kai a kanofi. E leaise maua e le Eteleno sona fiafia i ai. I le temi nei e manatui e le Eteleno lalatou agaveli, Ti e tautea loa e ia alatou agasala : E lotou toe liliu loa ki Esipito.

¹⁴ Talie kua galoi e Iselaele leia na fakatupu ia a ia, Ti na fakatuu e ia ni fale sau, Ti na liuliuga e Suta a kolo tau ; Kae e kau kakau loa le afi ki olatou kolo, Ti e tutu loa e ia olatou fale sau.