Oseo 7 - Tosi Tapu

Le agaveli a Iselaele

¹ I le aso na kau loto ai ke faitoo Iselaele, Na sa loa le agaveli a Efalaimi ti mo le agaitaita a Samalia, Talie na la fai nea fakakaia : Na ulu le tagata kaia ki loto, kae na mavetevete i fafo le toega o le kau kaia.

² E leaise lotou pati fua i olatou loto E kau iloa alatou agaveli ; I le lakaga nei e takatakai latou e alatou gaoi, E lotou tuu i oku mua.

³ E lotou fakafiafia le sau ki lalatou agaveli, Ti mo pule ki alatou loi.

⁴ Ko latou fuli ko ni kau faiaga, Tatau mo se gutuumu na fakakaka e le tagata tao pane : E leaise koi sokosoko e ia le afi Mei le lusi o le falina o kaku ki lona tupu.

⁵ I le aso o lomatou sau, E masasaki a pule i le fakavalevale ki le vino ; E falo e le sau lona lima ki le kau gologolo.

⁶ Ko latou ala e faimasele e tatau mo ni gutuumu kaka. I le po katoa e moe lolatou makeke, Kae i le usu e ula a ia ofaipe se afi kaka.

⁷ E lotou kaka fuli ofaipe se gutuumu : Ti e lotou kai olatou tui fakamaau ; E vivilo olatou sau fuli : E leaise tasi fua o latou e kalaga kiate au.

⁸ Kua fakatasi Efalaimi mo atu puleaga ; Ko Efalaimi ko se fa keke leia na leaise fulusi.

⁹ Kua kai lona makeke e ni kau matapule, Kae e leaise iloa e ia ; Kua maua a ia e le matua, Kae e leaise iloa e ia.

¹⁰ E fakamaoki le fia nealasi o Iselaele kiate ia ; E leaise lotou toe liliu mai ki le Eteleno, lolatou Atua, Ti e leaise lotou afa a ia, logo ai a nea fuli ana.

¹¹ E fai Efalaimi pe se lupe valea, sala atamai ; E lotou kole tokoi ki Esipito, e lotou ano ki Asilia.

¹² Kapau e lotou ano, e kau fola loa loku kupega kia latou ; E kau laku loa latou ki le kele ofaipe manu lele o le lagi ; E kau tautea loa latou o mulimuli ki le nea leia na fakasa i lalatou fakatasiga.

¹³ Malaia kia latou, talie e lotou sosola iate au ! Maumau kia latou, o tupu kua lotou agatuu kiate au ! E kau loto loa ke fakamauli latou, Kae e lotou fai kiate au ni masau loi.

¹⁴ E leaise lotou tagi kiate au i lolatou loto, Kae e lotou lauga i lolatou moeaga ; E lotou fakatasi ke maua se fulumeto mo se vino, Ti e lotou fakamamao iate au.

¹⁵ Na kau tautea latou, na kau fakamakeke olatou lima ; Kae e lotou fakakaukau le veli kiate au.

¹⁶ E leaise ko le Taualuga leia e lotou tafoki ki ai ; E lotou pikopiko ofaipe se gasau kaka. E mamate loa olatou pule i le seleta, O tupu ko le matasoka o lolatou alelo. Ko le nea lena e katai ai loa latou i Esipito.