Oseo 6 - Tosi Tapu

Kalaga ki Iselaele ke toe liliu ki le Eteleno

¹ Kotou au, tou toe liliu ki le Eteleno ! Talie na saei e ia, kae e fakamauli loa e ia tatou ; Na taai e ia, kae e sai loa e ia otou lavea.

² E toe tuku loa e ia le mauli kia tatou i le sili o aso e lua ; I le tolu o aso e fakatuu loa e ia tatou ki aluga, Ti e tou mauuli loa i ona mua.

³ Tou iloa, tou afa ke iloa le Eteleno ; Ko lana au e maoki ofaipe le au o le mafoata. E au loa a ia kia tatou ofaipe le ua, Ofaipe le ua o le temi mafana leia e fakavai ia le kele.

⁴ Kolea e kau fai loa kiate koe, Efalaimi ? Kolea e kau fai loa kiate koe, Suta ? Ko lokoutou alofa kiate au e faipe le kokofu i le usu, Pe le sasau leia e puli vave !

⁵ Koia leia e kau taai ai loa latou ki le kau polofeta, E kau tamate loa latou ki folafola o loku gutu, Ti e sa loa aku fakamaau ofaipe le malama.

⁶ Talie e kau alofa ki le manava alofa kae leai ki sakilifisio, Ti mo le iloa o le Atua o lasi ake i failaulau.

⁷ Kua lotou maumaui laku sai ofaipe la ake tagata ; Koia leia kua lotou agatuu ai kiate au.

⁸ Ko Kalaate ko se kolo o tagata agaveli, E maua e ia ni pulepule toto.

⁹ Ko le fakatasi a le kau tagata faisakilifisio e faipe le fakatasi a le kau kaia, Ala e lamalama ia a tagata i tafa o ala, O fai ni tukipo i le ala o Siseme ; Talie e lotou fai a tukipo !

¹⁰ Kua kau tio ki ni nea fakalialia i le fale o Iselaele : I ai e faiaga Efalaimi, e fakakelekele Iselaele.

¹¹ Kua teuteui foki kiate koe, Suta, se temi tuuti fulumeto, Mo ka kau toe aumai loa le kau popula o loku kakai.