Oseo 5 - Tosi Tapu

Fakasa o le tautea

¹ Kotou fakalogo mai ki le nea leinei, kau faisakilifisio ! Tokaga mai, fale o Iselaele ! Fakalogo mai lou taliga, fale o le sau ! Talie ko koutou ala e fai ki ai le fakamaau, Talie na kotou liliu ko se masele i Misipa, Ti ko se kupega na fola i le mauga o Tapole,

² I alatou sakilifisio, kua ogo le kau agatuu ki le tukipo, Kae e kau tautea loa latou fuli.

³ E kau iloa Efalaimi, Ti e leaise munia Iselaele i oku mata ; Talie i le temi nei, Efalaimi, kua ke faiaga, Ti kua fakakelekele Iselaele.

⁴ Ko alatou gaoi e leaise fakataga ia kia latou ke toe liliu ki le Atua, Talie e nofo le laumalie o le faiaga i loto malie o latou, Talie e leaise lotou iloa le Eteleno.

⁵ Ko le fia nealasi o Iselaele e fakamaoki kiate ia ; Ko Iselaele mo Efalaimi e vivilo loa i ala agasala totonu ; Ti ko Suta e vilo loa mo laua.

⁶ E lotou ano loa mo alatou ovi ti mo alatou pipi tagata o afa le Eteleno, Kae e leaise lotou maua loa a ia : Kua mavae a ia i loto malie o latou.

⁷ Na leaise lotou agatonu ki le Eteleno, Talie na lotou fanaui ni toe vao ; I le lakaga nei, ko se masina fai e tasi e feauga ke maumaui ai latou mo olatou nea malilie.

⁸ Kotou pupusi le fakatagi pupusi i Kipea, Kotou pupusi le fakatagi pupusi i Lama ! Kotou fai ni kalaga i Pete-Aveni ! Tokaga ki ou muli, Pesamino !

⁹ E maumaui katoa loa Efalaimi i le aso o le tautea ; E kau fakasa ki faasiga o Iselaele se nea maoki.

¹⁰ Ko pule o Suta e faipe latou ala e siki ia a fakamailoga o koiga ; E kau liligi loa kia latou loku sausau ofaipe se liua makeke.

¹¹ Kua fakamakeke Efalaimi, kua fatii a ia e le tautea, Talie na mulimuli a ia ki manatu noa o lona loto.

¹² E kau fai loa pe se papala fakalialia kia Efalaimi, Pe se pu o le nifo ki le fale o Suta.

¹³ E tio Efalaimi ki lona masaki, ti mo Suta ki ona lavea ; E ano Efalaimi ki Asilia, o masau ki le sau ko Salepe ; Kae e leaise mafai e le sau lena ke faitoo ia koutou, Talie e leaise maua e ia se faitoo ki okoutou lavea.

¹⁴ E kau fai loa pe se laione kia Efalaimi, Pe se uviki laione ki le fale o Suta ; Ko au, io ko au, e kau saei loa, ti e kau ano loa ; E kau fetuku loa, ti e leaise too loa e se tasi laku nea kai.

¹⁵ E kau ano loa, e kau toe liliu mai loa ki loku nofoaga, O kaku ki le aso leia e lotou vevete ai loa alatou agasala ti mo afa ai loa oku mata. Ka lotou nofo loa i le mamae, e lotou afa loa au.