Oseo 4 - Tosi Tapu

Agatuu a Iselaele mo valoki a le Eteleno

¹ Kotou fakalogo ki le folafola a le Eteleno, fanau o Iselaele ! Talie e fakamaau e le Eteleno le kakai o le fenua, Talie kua puli le maoki, kua puli le manava alofa, Kua puli le iloa o le Atua i le fenua ;

² Kae ko lauveli, mo loi, mo tukipo, mo kaia, mo tono ; Kua masani le fakamakeke, kua sosolo le tukipo.

³ Koia e nofo ai loa le fenua i le mamae, Ti e gaegae ai loa latou fuli ala e nonofo i ai, Tatau fai a manu o faisaga ti mo manu lele o le lagi ; Ti e pupuli loa a ika o le tai.

⁴ Kae ke aua na tuku loa le veli ki se tasi, ke aua na valoki loa se tasi ake ; Talie e kau fai le fakamaau mo koe, leia ko le pule faisakilifisio.

⁵ E ke siga loa i le ao, E siga loa le polofeta mo koe i le pouli, Ti e kau maumaui loa lou tinana.

⁶ Kua maumau loku kakai, talie e puli iate ia loku iloa. O tupu na ke tiaki loku iloa, E kau tiaki loa a koe, ti e too loa iate koe laku tuulaga fakapelepitelo ; O tupu na ke galoi le lao o lou Atua, E kau galoi loa au fanau.

⁷ Na lotou liuliuga o toka api, kae na lotou toe asilisili agasala kiate au. Koia e kau fetogi ai loa lolatou kololia ki se luma.

⁸ E lotou kai a agasala o loku kakai, E lotou oli mamae ai ki ana agaveli.

⁹ E tatau loa ki le tagata faisakilifisio mo le kakai : E kau tautea loa a ia o mulimuli ki ona ala, E kau totogi loa kiate ia o mulimuli ki ana gaoi.

¹⁰ E lotou kai loa kae e leaise lotou makona loa ; E lotou faifeauaki loa, kae e leaise lotou maua loa ni fanau, O tupu na lotou tiaki le Eteleno mo ana folafola.

¹¹ E fakatupu ulu vale le faifeauaki, mo le vino, mo le kava.

¹² E afa e loku kakai ki lona taulaatua ; Ti ko lana potu laakau leia e tali kiate ia ; Talie e fakasese le laumalie o le faifeauaki, Ti e fakamamao e ia latou i lolatou Atua.

¹³ Kua lotou fai ni failaulau i tumutumu o mauga, Kua lotou tutu le iseso i aluga o mauga liliki, I lalo o laakau lalasi, mo sene, mo popelie, mo telepate, Ala e malie olatou malu. Koia leia e faifeauaki ai okoutou taineliki, Ti e tono tagata okoutou fugao.

¹⁴ E leaise kau fakatua loa okoutou taineliki i lalatou faifeauaki, Ti mo okoutou fugao talie e lotou tono tagata ; Talie ko latou totonu e ano ki potu lavaki mo ni fafine faiaga, Ti e lotou kai mo fafine faifeauaki a sakilifisio o okoutou fale tapu. E makape le kakai valea ki lona puli.

¹⁵ Kapau kua ke faifeauaki, Iselaele, Kae ke aua na agasala a Suta ! Ke aua na kotou ano ki Kilikale, ke aua na kotou pale ki Pete-Aveni, Ti ke aua na kotou fakapapau : E mauli le Eteleno !

¹⁶ O tupu kua agatuu Iselaele ofaipe se pipi fafine muli leia e leaise mafai ke fakalalata, I le lakaga nei e fagai loa a ia e le Eteleno Ofaipe se akeno i ni faisaga lalasi.

¹⁷ Kua pipiki Efalaimi ki taulaatua : Tuku ai a ia.

¹⁸ Kua lotou mumui o inu kava, Kua lotou faiaga tuumau ; Kua manako olatou pule ki le luma.

¹⁹ E kofu loa latou e le matagi ki ona kapakau, Ti e lotou luma loa i alatou sakilifisio.