Oseo 2 - Tosi Tapu

Le tautea mo le toe laga o Iselaele

¹ Kae e tatau loa le api o fanau a Iselaele mo le one o le tai, leia e leaise feala ke fua pe ke lau ; ti e leaise toe pati loa kia latou : E leaise ko loku kakai koutou ! Kae pati loa kia latou : Vosa o le Atua mauli !

² E fakatasi loa fanau o Suta mo fanau o Iselaele, ti e lotou filifili loa se pule kia latou, ti e lotou mavae loa i le fenua ; talie e fakaii loa le aso o Siseleele.

³ Kotou pati ki okoutou fetaina : Ami ! (loku kakai) ki okoutou tuagaane : Lusama ! (fafine leia kua tuku ki ai le manava alofa).

⁴ Kotou kole, kotou kole ki lokoutou tinana, talie e leaise ko laku avaga a ia, ti e leaise ko lona avaga au ! Ke sau e ia ana faiaga mei ona mua, ti mo ana tono tagata mei le vasa o ona u !

⁵ Talie ka leai, e kau fakatelefua loa a ia, ti e kau tuku loa a ia pe le aso leia na fanaui ai a ia, ti e kau fakaliliu loa a ia o tatau mo se toafa, mo se kele kaka, ti e kau tuku loa a ia ke mate i le fia inu.

⁶ E leaise kau alofa loa ki ana fanau, talie ko ni toe vao latou o lana faiaga.

⁷ Talie na faiaga lolatou tinana, ti ko leia na fakatupu ia latou na fai nea fakalumaluma, o pati : E kau ano loa ki aku feauaki, latou ala na soli ia mai kiate au laku pane, mo laku vai, mo laku fului manu, mo le kie tea, mo le lolo, ti mo laku vino.

⁸ Koia, e kau tapono loa lona ala ki ni laakau talatala ti e kau fakatuu loa i ai se kau a, o tupu ke aua na toe maua e ia ona ala.

⁹ E mulii loa e ia ana feauaki, kae e leaise toe kaku loa a ia kia latou ; e afa loa e ia latou, kae e leaise toe maua loa e ia latou. Ti e pati loa a ia : E kau ano loa, ti e kau toe liliu loa ki loku uluaki avaga, talie na kau fiafia ake i le temi lena i le temi nei.

¹⁰ Na leaise iloa e ia ko au leia na soli ia kiate ia le fulumeto, mo le vino, ti mo le lolo ; ti na momoli kia Paale le paaga mo le aulo leia na kau soli fakalasi kiate ia.

¹¹ Koia e kau toe too ai loa laku fulumeto i lona temi ti mo laku vino i lona lakaga, ti e kau too loa laku fului manu mo le kie leia na tonu ke fufu ia lona telefua.

¹² Ti ko leinei e kau fakasa loa lona matagafua ki mata o ana feauaki, ti e leaise saofaki loa a ia e se tasi mei loku lima.

¹³ E kau fakagato loa lona fiafia katoa, mo ona aso lalasi, mo ona masina foou, mo ona sapato, ti mo ona katoaga fakaalialiki fuli.

¹⁴ E kau maumaui loa ana faisaga vite mo ana faisaga fiki, ala e pati a ia ki ai : Ko loku totogi leinei kua soli mai e aku feauaki ! E kau fakaliliu loa a faisaga ko ni vaomatua, ti e kai loa latou e manu o le vao.

¹⁵ E kau totogi loa kiate ia a aso ala na tutu ai e ia le iseso kia Paale, mo aso ala na teuteu ai a ia ki ona matemate mo ona tuikasoa, ti mo aso ala na ano ai a ia ki ana feauaki, kae na galoi e ia au, e folafola le Eteleno.

¹⁶ Koia kua kau loto ai i le aso nei ke kau maselei a ia, ti ke kau taki a ia ki le toafa, ti e kau masau loa ki lona loto.

¹⁷ I ai, e kau soli loa kiate ia ona faisaga vite mo le vaivailiua o Akole, ofaipe se matapa o le amanaki malie ; i ai, e sua loa a ia ofaipe lona temi ikiiki, ofaipe le temi leia na pale mai ai a ia mei le fenua o Esipito.

¹⁸ I le aso lena, e pati loa le Eteleno : E ke fakaigoa loa au : Loku avaga ! ti e leaise ke toe fakaigoa loa au : Loku pule !

¹⁹ E kau too loa mei lona gutu a igoa o Paale, o tupu ke aua na toe too olatou igoa.

²⁰ I aso ana, e kau fai loa kia latou se sai mo manu o faisaga, mo manu lele o le lagi, ti mo manu totolo o le kele ; e kau fatii loa i le fenua le gasau, mo le seleta, ti mo le tau, ti e kau fakamalolo loa latou i le tokamalie.

²¹ E kau liliu loa ko lou avaga o lee gato ; io, e kau liliu loa ko lou avaga i le faitotonu, mo le maoki, ti mo le kalasia, ti mo le manava alofa ;

²² E kau liliu loa ko lou avaga i le agatonu, ti e ke iloa loa le Eteleno.

²³ E folafola le Eteleno, o pati : I le aso lena, e kau tali loa, e kau tali loa ki le lagi, e tali loa e ia le kele ;

²⁴ Ti e soli loa e le kele le fulumeto, mo le vino, ti mo le lolo, ti e lotou tali loa Siseleele.

²⁵ E kau to loa i le fenua a Lolusama ma aku, ti e kau manava alofa loa kiate ia ; e kau pati loa kia Loami : Ko loku kakai a koe ! ti e tali mai loa a ia : Loku Atua !