Oseo 13 - Tosi Tapu

Ko le fakafefeka o Iselaele

¹ Ka masau Efalaimi, ko se nea fakaii ai. Na malaga a ia ki aluga i Iselaele. Kae na agasala a ia ia Paale, ti na mate a ia.

² I le aso nei e soko atu lalatou agasala, E lotou fai ki lalatou paaga ni fakatata ukamea saka, Mo ni taulaatua o mulimuli ki alatou fakakaukau ; Ko nea fuli ko le gaoiaga a ni kau tufuga. E lotou pati o uiga mo latou : E tonu ke momoli kia latou ni sakilifisio, ti ke sogi ki uviki pipi tagata !

³ Koia e lotou fai ai loa pe le kokofu o le usu, Pe le sasau leia e puli vave, Pe le penu leia e ave e le matagi i sasaaga fulumeto, Pe le afu leia e ulu mei se katupa.

⁴ Kae ko au, ko le Eteleno au, lou Atua, talu mei le fenua o Esipito. E leaise ke iloa se tasi ake Atua kese iate au, Ti e leai se tasi ake fakamauli kese iate au.

⁵ Na kau iloa a koe i le toafa, I se kele malo.

⁶ Na lotou kai makona i ni faisaga sesega ; Na lotou kai makona, ti na makita loa olatou loto i le fia nealasi ; Koia na lotou galoi ai au.

⁷ E kau liliu loa kia latou ofaipe se laione ; E kau lama loa latou i le ala ofaipe se taika.

⁸ E kau osoi loa latou, ofaipe se uluso fafine leia na too ona uviki, Ti e kau saei loa le kili o lolatou mafu ; E kau kai loa latou, ofaipe se laione fafine ; E sae loa latou e manu o faisaga.

⁹ Ko le nea leia e tupu ai lou maumau, Iselaele, Ko lau agatuu kiate au, ki leia na feala ke saofaki ia a koe.

¹⁰ Kofea loa lou sau ? Ke saofaki e ia a koe i ou kolo fuli ! Kofea loa ou tui fakamaau, ala na ke pati ki ai : Soli mai se sau mo ni pule ?

¹¹ Na kau soli atu kiate koe se sau i loku ita, E kau toe too loa a ia iate koe i loku sausau lasi.

¹² Kua tosi le agaveli a Efalaimi ke taupau, Kua tuku lana agasala ki se ganea fakapulipuli.

¹³ E soko loa kiate ia a mamae o le fafine leia e fanau ; Ko se toe valea a ia, Leia e leaise vilo i le manava o le tinana i le temi na tonu ke fanaui ai a ia.

¹⁴ E kau totogi loa latou mei le makeke o le nofoaga o le kau mate, E kau saofaki loa latou mei le mate. Ei mate, kofea au masafu ? Nofoaga o le kau mate, kofea lau pule ki le mate ? Kae kua sola le fakasemala i oku mata !

¹⁵ E logo ai le lasi o fua o Efalaimi i loto malie o ona fetaina, E au loa le matagi o le potu Esite, e malaga ake loa le matagi o le Eteleno i le toafa, O fakamalo ia loa ona matapuna, ti mo fakamasa ia loa ona tanakiaga vai. E kaia loa a fale koloa fuli ala e tanaki ai au nea mauiga.

¹⁶ E tautea loa Samalia, talie na agatuu a ia ki lona Atua. E lotou mamate loa i le seleta ; E laliki loa olatou toe liliki, Ti e paipaisi loa a manava o olatou fafine tinanae.