Oseo 12 - Tosi Tapu

Ko le loto noa o Iselaele

¹ E takatakai au e Efalaimi ki ni loi, Ti mo le fale o Iselaele ki ni kaka ; Koi tuu makeke a Suta ki le Atua, Ki le Maokioki agatonu.

² E kai e Efalaimi le matagi, ti e tuli e ia le matagi o le potu Esite. I aso fuli e liuliuga e ia le loi mo le agaitaita ; E fai e ia se sai mo Asilia, Ti e fetuku e ia se lolo ki Esipito.

³ E valoki foki e le Eteleno a Suta, Ti e tautea loa e ia Sakopo o fakatatau ki lana aga, E totogi loa e ia kiate ia o mulimuli ki ana gaoi.

⁴ I le manava o le tinana na kukumi loa e Sakopo le mulivae o lona taina, Ti na poko loa a ia mo le Atua i le temi o lona makeke.

⁵ Na poko loa a ia mo se aselo, ti na malo loa a ia, Na tagi loa a ia, ti na fai loa e ia kiate ia ni kole. I Petele na maua loa e Sakopo le Eteleno, Ti ko lena le ganea na folafola ai a ia kia tatou.

⁶ Ko le Eteleno ko le Atua o kau tau ; Ko lona suafa ko le Eteleno.

⁷ Ti ko koe, toe liliu mai ki lou Atua ; Taupau le alofa ki le Atua mo le faitotonu, Ti fanaki tuumau ki lou Atua.

⁸ Ko Efalaimi ko se tagata faikoloa e too ia i lona lima ni fua salasala, Ti e alofa a ia ki le kaka.

⁹ Ti e pati Efalaimi : Kua kau soko maoki o mou koloa, Kua kau maua se koloa lasi ; Ti ko le fua katoa a ia o laku gaoi. E leaise maua loa iate au se agaveli, pe ko se nea fua e sala.

¹⁰ Kae ko au, ko le Eteleno au, ko lou Atua, talu mei le fenua o Esipito ; E kau toe fakanofo loa a koe i ni falela, ofaipe aso o lafeti.

¹¹ Na kau masau ki le kau polofeta, Na kau liuliuga a tio, Ti na kau tuku ki le kau polofeta ni folafola fakatata.

¹² Ko le kakai o Kalaate ko se kakai kaia i le temi mua, kua lotou puli noa i le temi nei. Na lotou momoli ni pipi i Kilikale : Kae kua fai olatou aletale pe ni tuuga fatu I ganea popoko o faisaga.

¹³ Na sola loa Sakopo ki le fenua o Alame, Na fakasausau loa Iselaele ke mau sona avaga, Ti na taupau loa e ia a kau manu ke maua sona avaga.

¹⁴ I se polofeta na fakamavae loa e le Eteleno Iselaele i Esipito, Ti na taupau loa Iselaele e se polofeta.

¹⁵ Na fakatupu e Efalaimi le ita mamae o le Eteleno : E tuku loa e lona Aliki ke vilo kiate ia le toto na liligi e ia, E fakavilo ai loa e ia kiate ia le luma o ana gaoi fakalialia.