Oseo 10 - Tosi Tapu

Fakamaau o Iselaele

¹ Ko Iselaele ko se vite fua, Leia na soli ia ni fua lasi ai. Kae na lasi ona fua ; Ti na lasi lana liuliuga a aletale ; Kae na lasi le mou koloa o lona fenua, Ti na lasi lana fakafulumalie a fakatata.

² Kua vaelua olatou loto : e lotou amo loa lona veli. E soloi loa e le Eteleno olatou aletale, ti e maumaui loa e ia olatou fakatata.

³ Ti e leaise tuvai loa ti lotou pati loa : E leaise tou maua ia se sau, O tupu na leaise tou i ki le Eteleno ; Ti kolea e mafai loa e le sau kia tatou ?

⁴ E lotou fai ni masau vaiga, mo ni fakapapau loi, Mo ka lotou fai se sai : Koia e somo ai loa le tautea, ofaipe se laakau kona I se faisaga kua fakamaluu.

⁵ E mamae loa le kakai o Samalia o tupu ko uviki pipi o Pete-Aveni ; E tagi loa le kakai ki le taulaatua, Ti e lulu loa ona kau pelepitelo kiate ia, Ki lona kololia, leia ka puli loa ia latou.

⁶ E ave loa le taulaatua ki Asilia, Ke fai ai se moliga ki le sau ko Salepe. E luma loa Efalaimi, Ti e luma loa Iselaele i ana fakatuutuu.

⁷ Kua oki Samalia, kua oki lona sau, Ofaipe le piau i aluga o le tai.

⁸ Ko ganea tapu o Pete-Aveni, ala na agasala ai Iselaele, e maumaui loa ; E sosomo loa le vao talatala mo le vao sukisuki i olatou aletale. E lotou pati loa ki mauga : Kotou uufi matou ! Ki mauga liliki : Kotou sosolo mai kia matou !

⁹ Iselaele, na ke agasala talu mei aso o Kipea ! I ai na lotou tutuu loa i aluga. Na leaise kaku loa kia latou le tau ki le kau agaveli i Kipea.

¹⁰ E kau tautea loa latou o mulimuli ki loku loto, Ti e fakatasi loa ni kakai kia latou, Mo ka sai loa latou ki tini o tupu ko lalatou agaveli kua liuga lua.

¹¹ Ko Efalaimi ko se uviki pipi fafine na fakalalata, kae e oli ke takatakafi ia le fulumeto, Kae e kau fakafeofi loa ki lona ua fulumalie ; E kau sai loa le saliote kia Efalaimi, e fakamaluu loa e Suta le kele, e fakatokatoka loa e Sakopo le kele.

¹² Kotou muluki le fakaili o mulimuli ki le faitotonu, Kotou tuuti le fulumeto o mulimuli ki le manava alofa, Kotou faala sokoutou faisaga foou ! Ko le temi leinei ke afa ai le Eteleno, O kaku ki lana saele mai, o liligi kia koutou le faitotonu.

¹³ Na kotou to le veli, na kotou utu le agaveli, Na kotou kai le fua o le loi ; Talie na ke fanaki ki lou ala, Ki le api o au tagata toa.

¹⁴ E malaga loa se maveuveu i lou kakai, Ti e maumaui loa ou kolo tau fuli, Ofaipe le maumaui e Salemane a Pete-Alepele, I le aso o le tau, Leia na takatakafi ai le tinana mo ana fanau.

¹⁵ Ko lena le nea e aumai loa e Petele kia koutou, O tupu ko le lasi o lakoutou agaveli. I le au o le ao, ti e oki ai le sau o Iselaele.