Oseo 1 - Tosi Tapu

Famili o Oseo, paaki totonu o Iselaele

¹ Na fakasa loa le folafola a le Eteleno kia Ose, vosa o Peeli, i le temi o Osiasi, mo Sotame, mo Akase, ti mo Esekiasi, ko sau o Suta, ti mo le temi o Selopoamo, vosa o Soasi, sau o Iselaele.

² I le uluaki fakasa e le Eteleno lana folafola kia Ose, na pati le Eteleno kia Ose : Ano, o too se fafine faiaga mo ni fanau o le faiaga ; talie kua faiaga le fenua ti kua tiaki e ia le Eteleno !

³ Ti na ano loa Ose, o too Komela, taine o Tipalaimi. Na faitoe loa Komela, ti na fanaui loa e ia se tama.

⁴ Ti na pati loa le Eteleno kiate ia : Fakaigoa a ia ko Siseleele ; talie koi toe fai se ga temi ikiiki, ti e kau tautea loa le fale o Seu, o tupu ko le toto leia na liligi i Siseleele, ti e kau fakagato loa le puleaga o le fale o Iselaele.

⁵ I le aso lena, e kau fatii loa le kau faifana a Iselaele i le vaivailiua o Siseleele.

⁶ Na toe tinae loa Komela ti na fanaui loa e ia se taine. Ti na pati loa le Eteleno kia Ose : Fakaigoa a ia ko Lolusama ; talie e leaise kau toe alofa loa ki le fale o Iselaele, ti e leaise kau toe fakamolemole loa kiate ia.

⁷ Kae e kau alofa loa ki le fale o Suta ; ti e kau saofaki loa latou i Eteleno, lolatou Atua. E leaise kau saofaki loa latou ki le gasau, pe ko le seleta, pe ko le tau, pe ko ni osi, pe ko ni kau ekeosi.

⁸ Na puaki loa e Komela a Lolusama, ti na toe tinae loa a ia, o toe fanau ko se tama.

⁹ Ti na pati loa le Eteleno : Soli kiate ia le igoa ko Loami ; talie e leaise ko loku kakai koutou, ti e leaise ko lokoutou Atua au.