Numelo 9 - Tosi Tapu

Pasikate i le toafa o Sinai

¹ Na masau loa le Eteleno kia Moisese i le toafa o Sinai, i le uluaki masina o le lua o fetuu i le oki o le mavae mei le fenua o Esipito.

² Na pati loa a ia : Ke fai loa e fanau a Iselaele le Pasikate i lona aso leia kua fakatuutuu ki ai.

³ Kotou fai loa a ia i lona aso leia kua fakatuutuu ki ai, i le aso kau agafulu tupu fa o le masina leinei, i le afiafi, o mulimuli ki lao mo lekula fuli o uiga mo ia.

⁴ Na masau loa Moisese ki fanau a Iselaele, ke lotou fai le Pasikate.

⁵ Ti na lotou fai loa le Pasikate i le afiafi o le aso kau agafulu tupu fa o le uluaki masina, i le toafa o Sinai ; na mulimuli katoa loa fanau a Iselaele ki fakatotonu fuli ala na tuku e le Eteleno kia Moisese.

⁶ Kae na i ai ni tagata ala na kelekele o tupu ko se mate, ti na leaise feala loa ke lotou fai le Pasikate i le aso lena. Na lotou ano loa kia Moisese mo Alone ;

⁷ ti na pati loa a tagata ana kia laua : E motou kelekele o tupu ko se mate ; Kolea e leaise motou aumai ai loa i le temi leia kua fakatuutuu ki ai le moliga ki le Eteleno ofaipe fanau fuli o Iselaele ?

⁸ Na pati loa Moisese kia latou : kotou talitali mua ke kau iloa le nea leia e fakatotonu e le Eteleno kia koutou.

⁹ Ti na masau loa le Eteleno kia Moisese, o pati :

¹⁰ Masau ki fanau a Iselaele, o pati kia latou : Kapau e kelekele loa se tagata ia koutou pe i okoutou tautupu ki muli o tupu ko se mate, pe fanoga a ia i se fenua mamao, e fai loa e ia le Pasikate ki le Eteleno.

¹¹ Kae e lotou fai loa le Pasikate i le lua o masina, i le kau agafulu tupu fa o aso, i le afiafi ; e lotou kai loa le Pasikate mo ni pane sala fakatupu ti mo ni laakau kona.

¹² E leaise lotou tuku loa se nea leia ke kaku ki le usu, ti e leaise lotou fatii loa se ivi. E lotou fai loa le Pasikate o mulimuli ki fakatotonu fuli o le Pasikate.

¹³ Kapau e leaise fai loa le Pasikate e leia e mea pe ko leia e leaise fanoga i se fenua mamao, e tuuti loa le tagata lena mei lona kakai, talie na leaise ave e ia le moliga ki le Eteleno i lona aso leia kua fakatuutuu ki ai, ti e amo loa e le tagata lena le tua o lana agasala.

¹⁴ Kapau e fai loa le Pasikate e se tagata matapule leia e nofo i lokoutou fenua, e mulimuli loa a ia ki lao mo fakatotonu o le Pasikate. E i ai loa se lao e tasi ki le tagata o Iselaele mo le tagata matapule.

Le pou ao i aluga o le falela tapu

¹⁵ I le aso leia na fakatuu ai loa le falela tapu, na uufi loa e le ao le tapenakulo, le falela tapu, ti na fai loa le ao lena pe se afi mei le afiafi o kaku ki le usu.

¹⁶ Na fai sosoko fenaaki loa : na uufi e le ao le tapenakulo i le ao, ti na fai a ia pe se afi i le pouli.

¹⁷ Ka malaga loa le ao i aluga o le falela tapu, ti ko fanau a Iselaele na fanoga loa, ti ka tuu loa le ao i se ganea, ti ko fanau a Iselaele na fakatuu ia loa lolatou nofolaga.

¹⁸ Na fanoga fanau a Iselaele o mulimuli ki le fakatotonu a le Eteleno, ti na lotou nonofo o mulimuli ki le fakatotonu a le Eteleno. Na lotou nonofo i olatou falela o fakalogo ki le fualoa o le tuu o le ao i aluga o le falela tapu.

¹⁹ Kapau na nofo le ao i aluga o le falela tapu o fualoa, na fakalogo loa fanau a Iselaele ki le Eteleno, o leaise lotou fanoga loa.

²⁰ Kapau na nofo le ao i ni ga aso teiki i aluga o le falela tapu, na lotou fakatuu loa olatou falela o mulimuli ki le fakatotonu a le Eteleno, ti na lotou fanoga o mulimuli ki fakatotonu a le Eteleno.

²¹ Kapau na tuu le ao mei le afiafi o kaku ki le usu, ti na malaga loa a ia i le usu, na lotou fanoga loa. Kapau na malaga le ao i le oki o se aso e tasi mo se po e tasi, na lotou fanoga loa.

²² Kapau na tuu le ao i aluga o le tapenakulo i ni aso e lua, pe ko se masina e tasi, pe ko se fetuu katoa, na nonofo fanau a Iselaele i olatou falela, ti na leaise lotou fanoga loa. Ti ka malaga loa le ao, na lotou fanoga loa.

²³ Na lotou nonofo i olatou falela o mulimuli ki le fakatotonu a le Eteleno, ti na lotou fanoga o mulimuli ki le fakatotonu a le Eteleno. Na lotou fakalogo ki le pule a le Eteleno, ki le fakatotonu a le Eteleno ia Moisese.