Numelo 8 - Tosi Tapu

Fakatuutuu o malama i le satelie

¹ Na masau loa le Eteleno kia Moisese, o pati :

² Masau kia Alone, ti ke pati loa kiate ia : ka ke fakatuutuu ia loa a fa malama, tokaga ke mu a fa malama e fitu ki mua o le tuuaga malama,

³ Na fai loa Alone ki ai : na fakatuutuu loa e ia a fa malama ke mu ki mua o le tuuaga malama, o mulimuli ki le fakatotonu a le Eteleno.

⁴ Na fai feneeki loa le tuuaga malama : na fai a ia ki le potu aulo e tasi leia na tuki ki le amale, mei le vae o kaku ki ona sei laakau. Na fai loa le tuuaga malama o fakatatau ki le paaki leia na fakatio Moisese ki ai e le Eteleno.

Fakatapu o le kau Levi

⁵ Na masau loa le Eteleno kia Moisese, o pati :

⁶ Ke ke vaei kese le kau Levi mei fanau a Iselaele ti ke fakamea loa latou.

⁷ Ko leinei le nea leia ke ke fai loa ke fakamea ai latou. E ke fai loa kia latou se afusi ki le vai o le fakamea ; e lotou tele loa a fulu i olatou kuaga katoa ti e lotou fo loa olatou kofu, ti e lotou mea loa.

⁸ E lotou too loa se pipi tagata muli, mo le moliga falina leia kua lusi fakatasi mo le lolo, ti e lotou too loa mo se tasi ake a pipi tagata muli, ki le sakilifisio fakamalie.

⁹ E ke fakafeofi ake loa le kau Levi ki mua o le falela tapu, ti e ke fakatasii ake loa le kakai katoa o Iselaele.

¹⁰ E ke fakafeofi ake loa le kau Levi ki mua o le Eteleno ; ti e teki loa e fanau a Iselaele olatou lima ki le kau Levi.

¹¹ E fakamaliuliu loa e Alone le kau Levi ki fetuu mo fetuu i mua o le Eteleno, ofaipe se moliga a fanau o Iselaele ; ti e fakatapui loa latou ke fakasausau ki le Eteleno.

¹² E teki loa e le kau Levi olatou lima ki ulu o pipi tagata e lua ; ti e momoli loa se tasi a pipi ki le sakilifisio o le fakamalie, ti ko se tasi a pipi ki le failaulau, ke fai ai le fakamalie ki le kau Levi.

¹³ E ke fakatutuu loa le kau Levi i mua o Alone mo ona vosa, ti e ke fakamaliuliu loa latou ki fetuu mo fetuu ofaipe se moliga ki le Eteleno.

¹⁴ E ke vaei kese loa le kau Levi mei fanau a Iselaele ; ti e kau maua loa le kau Levi ma aku.

¹⁵ I le oki o le nea lena, e au loa le kau Levi o fai le tausi o le falela tapu. Ko lena le nea leia e tonu ke ke fai ke fakamea ai latou ti ke fakatapui ai latou ofaipe se moliga.

¹⁶ Talie e soli mai loa latou fuli kiate au mei loto malie o fanau a Iselaele : kua kau too latou ma aku o fetogi ai a uluaki tupu, a uluaki tupu fuli o fanau a Iselaele.

¹⁷ Talie e kau maua loa a uluaki tupu fuli o fanau a Iselaele, tatau fai i tagata mo manu ; i le aso leia na kau tamate ai a fanau uluaki fuli o le fenua ko Esipito, na kau fakatapui latou ma aku.

¹⁸ Ti na kau too le kau Levi o fetogi ai a fanau uluaki fuli o fanau a Iselaele.

¹⁹ Kua kau soli le kau Levi fuli kia Alone mo ona vosa, mei loto malie o fanau a Iselaele, ke lotou fai le tausi a fanau o Iselaele i le falela tapu, ke lotou fai le fakamalie ki fanau a Iselaele, ti ke aua na soko loa se malaia ki fanau a Iselaele, o tupu na lotou fakafeofi ki le sagatualio.

²⁰ Na fai loa e Moisese, mo Alone, mo le kakai katoa o Iselaele, ki le kau Levi, a fakatotonu fuli ala na tuku e le Eteleno kia Moisese o uiga mo le kau Levi ; na fai fenaaki loa kia latou e fanau a Iselaele.

²¹ Na fakamea loa le kau Levi ti na lotou fo loa olatou kofu ; ti na fakamaliuliu loa latou e Alone ki le fetuu mo le fetuu ofaipe se moliga i mua o le Eteleno, ti na fai loa e ia le fakamalie kia latou, ke fakamea ai latou.

²² I le oki o le nea lena, na ano loa le kau Levi o fai lalatou tausi i le falela tapu, i mua o Alone mo ona vosa, o mulimuli ki le nea leia na fakatotonu e le Eteleno kia Moisese o uiga mo le kau Levi.

²³ Na masau loa le Eteleno kia Moisese, o pati :

²⁴ Ko leinei le nea o uiga mo le kau Levi. Mei le fetuu kau lua tupu lima o fai ki aluga, e ulu loa Levi fuli ki le tausi o le falela tapu, o too se gaoi.

²⁵ Kae i le fetuu kau lima, e mavae loa a ia i lana gaoi, e leaise toe tausi loa a ia.

²⁶ E tokoi loa a ia ki ona fetaina i le falela tapu, o taupau a nea ala kua tuku ke lotou tokaga ki ai ; kae e leaise toe fai loa e ia se tausi. E ke fai fenaaki loa ki le kau Levi o uiga mo alatou gaoi.