Numelo 6 - Tosi Tapu

Lao ki le tagata nasilea

¹ Na masau loa le Eteleno kia Moisese, o pati :

² Masau ki fanau a Iselaele, ti ke pati loa kia latou : ka mavae loa se tagata pe ko se fafine talie na fai e ia le fakapapau o le nasilea, ke fakatapui a ia ki le Eteleno,

³ e fakafiti loa a ia ki le vino mo kava makeke ; e leaise inu loa e ia se vinika leia na fai ki le vino, pe ko se vinika leia na fai ki se tasi ake a kava makeke. E leaise inu loa e ia se kava makeke leia na fai ki ni fuai vite, ti e leaise kai loa e ia ni fuai vite foou pe ko ni fuai vite malo.

⁴ I le temi katoa o lona nasilea, e leaise kai loa e ia se nea fua e tasi leia na gaoi mei le fua o le vite, mei le tegai o le fuai vite mo le kili o le fuai vite.

⁵ I le temi fuli o lona fakapapau nasilea, e leaise fakalaka loa le tele i lona ulu ; talie kua fakatapui a ia ki le Eteleno, e tuku loa e ia lona lau ulu mo lona kaukava ke sosomo faitalisa o kaku ki le oki o le temi o lona nasilea.

⁶ I le temi katoa o lona fakatapui ki le Eteleno, e leaise fakafeofi loa a ia ki se tasi leia kua mate ;

⁷ e leaise fakakelekele loa a ia i le mate o lona tamana, mo lona tinana, mo lona taina pe ko lona tuagaane ; talie kua teki i lona ulu le fakatapu o lona Atua.

⁸ I le temi katoa o lona nasilea, e fakatapui loa a ia ki le Eteleno.

⁹ Ti kapau e mate fakafokifa loa se tasi i ona tafa, ti kapau e kelekele loa i ai lona ulu leia kua fakatapui, e tele loa e ia lona ulu i le aso o lona fakamea, e tele loa e ia lona ulu i le fitu o aso.

¹⁰ I le valu o aso, e ave loa e ia ni kulukulu e lua pe ko ni lupe e lua ki le tagata faisakilifisio, i mua o le uluaga o le falela tapu.

¹¹ E momoli loa e le tagata faisakilifisio se manu lele e tasi ki le sakilifisio fakamalie, ti ko leia ake ki le failaulau. Ti e fai loa e ia ki le tagata le fakamalie o lana agasala i le mate. E fakatapui loa i ai e le tagata nasilea lona ulu i le aso lena.

¹² E toe fakatapui loa e ia ki le Eteleno a aso o lona nasilea, ti e toe momoli loa e ia se akeno fetuu tasi ki le sakilifisio fakamalie ; E leaise toe lau loa a aso ala i mua, talie na fakakelekele lona nasilea.

¹³ Ko leinei le lao o le nasilea. I le aso leia e katoa ai loa lona nasilea, e taki loa a ia ki le uluaga o le falela tapu.

¹⁴ E ave loa e ia lana moliga ki le Eteleno : ko se akeno fetuu tasi ki le failaulau, mo se ovi fafine fetuu tasi ki le sakilifisio fakamalie, ti mo se ovi tagata lee mele ki le sakilifisio fakafetai ;

¹⁵ mo se kete pane sala fakatupu, mo ni keke ala na fai ki se falina mea leia na lusi fakatasi mo le lolo, mo ni pane lalapa sala fakatupu ala kua pani ki le lolo, ti mo moliga falina mo lipasio masani.

¹⁶ E ave loa e le tagata faisakilifisio a nea ana ki mua o le Eteleno, ti e momoli loa e ia lana vikitima fakamalie mo lana failaulau.

¹⁷ Ti e momoli loa e ia le ovi tagata o le sakilifisio fakafetai ki le Eteleno, mo le kete keke sala fakatupu ; ti e momoli fakaoki loa e ia le moliga falina mo le lipasio.

¹⁸ E tele loa e le tagata nasilea lona ulu i le uluaga o le falela tapu, ti e teki loa e ia ona fului ulu ki aluga o le afi leia e tutu ai le sakilifisio fakafetai.

¹⁹ E too loa e le tagata faisakilifisio le alaga mua o le ovi tagata, leia kua moso, mo se fa keke sala fakatupu, ti mo se fa pane lapa sala fakatupu ; ti e teki loa e ia a nea ana ki lima o le tagata nasilea, mo ka kua oki lona ulu i le tele.

²⁰ E liliaki loa e le tagata faisakilifisio a nea ana ki le fetuu mo le fetuu i mua o le Eteleno : Ko se nea tapu a ia, leia e maua loa e le tagata faisakilifisio, mo le vakavakapu leia na liliaki ti mo le alaga muli leia na siki. Ti oki, e feala loa ke inu e le tagata nasilea se vino.

²¹ Ko lena le lao ki leia e fai ia le fakapapau o le nasilea ; ko lena lana moliga ki le Eteleno ki lona nasilea, o fakalogo ki lana maua. E fai loa e ia le nea leia kua fakatotonu ki le fakapapau leia na fai e ia, o mulimuli ki le lao o lona nasilea.

Kole o le tapuaki

²² Na masau loa le Eteleno kia Moisese, o pati :

²³ Masau kia Alone mo ona vosa, o pati : E kotou tapuaki feneeki loa ki fanau a Iselaele, o kotou pati loa kia latou :

²⁴ Ke tapuaki le Eteleno kiate koe, ti ke taupau e ia a koe !

²⁵ Ke fakagigila e le Eteleno ona mata kiate koe, ti ke tuku atu e ia kiate koe lona kalasia !

²⁶ Ke fakasa e le Eteleno lona agamalie kiate koe, ti ke tuku atu e ia kiate koe lona tokamalie !

²⁷ E lotou teki fenaaki loa loku suafa ki fanau a Iselaele, ti e kau tapuaki loa kia latou.