Numelo 5 - Tosi Tapu

Lao o uiga mo le kelekele

¹ Na masau loa le Eteleno kia Moisese, o pati :

² Fakatotonu ki fanau a Iselaele ke fakamavae mei le nofolaga a kilia fuli, mo tagata fuli ala e nofo mo se masaki fakatagata, ti mo tagata fuli ala kua kelekele i se mate.

³ Tagata pe fafine, ke kotou fakamavae latou mei le nofolaga, o tupu ke aua na lotou fakakelekele ia le nofolaga leia e tuu ai loku nofoaga i loto malie.

⁴ Na fai loa fanau a Iselaele ki ai ; ti na lotou fakamavae loa latou ana mei le nofolaga ki fafo ; na fai loa e fanau a Iselaele le nea leia na fakatotonu e le Eteleno kia Moisese.

⁵ Na masau loa le Eteleno kia Moisese, o pati :

⁶ Masau ki fanau a Iselaele : Kapau e agasala loa se tagata pe ko se fafine ki se tasi, o fai loa e ia se agatuu ki le Eteleno, ti e agasala loa a ia.

⁷ E kofesio loa e ia lana agasala, ti e liufaki loa e ia le nea leia na kaia e ia, o fakalasi a ia ki le vaega lima, ti e tuku loa e ia a ia ki le tagata leia na agasala a ia ki ai.

⁸ Ti kapau e leaise maua se tasi leia ke tuku ki ai le nea leia na kaia, e tuku loa a ia ki le Eteleno, ti e maua loa a ia e le tagata faisakilifisio. Ti e fai kese fai e le tagata leia na agasala le ovi tagata ki le sakilifisio fakamalie ke fakamolemole ai lana agasala.

⁹ Ko vaega fuli ala e too loa i se moliga tapu leia na ave e fanau a Iselaele e maua loa e le tagata faisakilifisio.

¹⁰ Ko le nea leia e fakatapui e se tasi ki le Eteleno e tuku loa ki le tagata faisakilifisio ; ko le nea leia e soli e se tagata ki le tagata faisakilifisio e feala loa ke taupau e le tagata faisakilifisio.

¹¹ Na masau loa le Eteleno kia Moisese, o pati :

¹² Masau ki fanau a Iselaele, ti ke pati loa kia latou : kapau e maliu kese se fafine mei lona avaga, o fai e ia se agatuu kiate ia ;

¹³ ti kapau na momoe loa se tagata mo ia, ti na fufu le nea lena ki lona avaga ; ti kapau na fakakelekele fakafufu loa le fafine, kae na leaise maua loa se tasi ke fakamaoki ki le nea lena, talie na leaise tio totonu loa se tasi ki ai ;

¹⁴ ti kapau kua maua loa e le tagata se loto finenonofo, o masalosalo loa ki lona avaga kua fakakelekele ; ti kapau kua maua loa e le tagata se loto finenonofo, o masalosalo loa ki lona avaga, kae e leikiaise fakakelekele a ia,

¹⁵ e ave loa e le tagata lena lona avaga ki le tagata faisakilifisio mo se moliga ki lona avaga, ko ni kilo falina olese e tolu. E leaise liligi loa e ia se lolo ki aluga o le falina lena ti e leaise teki loa e ia se iseso ki aluga, talie ko se moliga a ia o tupu ko se masalosalo veli, ke fakasa ai se sala.

¹⁶ E taki loa e le tagata faisakilifisio le fafine ki le sagatualio, o fakatuu a ia i mua o le Eteleno.

¹⁷ E too loa e le tagata faisakilifisio se vai tapu i se ipu kele ; ti e too loa e ia se efu i le kele o le tapenakulo, o tuku ki le vai tapu.

¹⁸ E fakatuu loa e le tagata faisakilifisio le fafine i mua o le Eteleno ; e too loa e ia le kie pulou i le ulu o le fafine, ti e teki loa e ia ki lima o le fafine le moliga o le fakamanatu, le moliga o le finenonofo. E too loa e le tagata faisakilifisio i ona lima le vai kona leia e tuku ia le malaia.

¹⁹ E pati loa le tagata faisakilifisio ki le fafine ke fakapapau, o pati : Kapau na leaise momoe loa se tagata kese mo koe, ti na leaise ke sese mei lou avaga, ti na leaise ke kakaai aia o ke fakakelekele a koe, e leaise fakamalaia loa a koe e le vai kona leinei.

²⁰ Kae kapau na ke fakakelekele a koe ti na ke momoe mo se tagata kese, ti na ke kakaai lou avaga,

²¹ ti e pati loa le tagata faisakilifisio ke fakapapau ki le malaia le fafine, ti e pati loa a ia ki le fafine : Ke tuku a koe e le Eteleno ki le malaia mo le takugai i loto malie o lou kakai, o fakamalo lou tega ti mo fakakita lou manava,

²² ti ke ulu ki ou tootooga le vai leinei e tuku ia loa kiate koe le malaia, o fakakita ia loa lou manava mo fakamalo ia loa lou tega ! Ti e pati loa le fafine : Amene ! Amene !

²³ E tosi loa e le tagata faisakilifisio a malaia fuli ana i se tosi, ti e molei loa e ia latou ki le vai kona.

²⁴ Ti e fakainu loa e ia ki le fafine le vai leia e tuku ia le malaia, ti e ulu loa kiate ia le vai leia e tuku ia le malaia o fakatupu ia le kona.

²⁵ E too loa e le tagata faisakilifisio mei lima o le fafine le moliga o le finenonofo, ti e liliaki loa e ia le moliga ki fetuu mo fetuu i mua o le Eteleno, ti e momoli loa e ia a ia i le aletale.

²⁶ E too loa e le tagata faisakilifisio i le moliga lena se falina ki lona alofilima, leia e igoa ko le fakamanatu, ti e tutu loa e ia a ia i aluga o le aletale. Kao oki loa le nea lena, ti o fakainu loa e ia le vai ki le fafine.

²⁷ Ka oki loa le inu o le vai e le fafine, e soko loa le nea leinei : kapau na fakakelekele maoki le fafine, ti na kakaai e ia lona avaga, e ulu loa kiate ia le vai kona leia e tuku ia le malaia, o fakatupu le kona iate ia ; e kita loa lona manava, ti e malo loa lona tega, ti e liliu loa le fafine lena ko le nea fakatakuga malaia i lona kakai.

²⁸ Kae kapau na leaise fakakelekele le fafine kae na mea malie a ia, ti e sao loa a ia i le malaia, ti e feala loa ke toe maua e le fafine ni ana fanau.

²⁹ Ko lena le lao ki le finenonofo, o uiga mo le fafine leia e mauli veli ti na kakaai ia lona avaga, o tupu ai lona kelekele,

³⁰ pe ko se fafine leia e masalosalo veli ki ai lona avaga. E ave loa e le tagata lona avaga ki mua o le Eteleno, ti e fai loa e le tagata faisakilifisio kiate ia le lao katoa lena.

³¹ Ti e leaise valoki loa se sala ki le tagata, kae e amo loa e le fafine lana agasala mo kapau na sala maoki a ia.