Numelo 35 - Tosi Tapu

Kolo e 48 o le kau Levi

¹ Na masau loa le Eteleno kia Moisese, i le fenua o Moape, i tafa o le Solotane, i mua o Seliko, o pati :

² Fakatotonu ki fanau a Iselaele ke lotou soli ki le kau Levi ni kolo i olatou tofiga, ke lotou nonofo ai. Ke lotou soli foki mo faisaga ala e tuu i tafatafa o kolo ana.

³ E lotou nofo loa i kolo ana, kae e lotou fagai loa alatou kau manu fuli i kele ala e tuu i tafatafa o kolo.

⁴ Ko tafatafa o kolo ala e tonu ke kotou soli ki le kau Levi e fua loa o kamata atu i le kaua o le kolo ki fafo : ko meta e kau lelau e lima (500) ki le fetuu esite, mo le fetuu saute, mo le fetuu uesite, mo le fetuu noleto.

⁵ E kotou maua loa i fafo o le kolo ni meta e afe i le fetuu esite, mo ni meta e afe i le fetuu saute, mo ni meta e afe i le fetuu uesite, mo ni meta e afe i le fetuu noleto. E tuu loa le kolo i loto malie. Ko na a kele i tafatafa o kolo o le kau Levi.

⁶ I kolo ala e kotou soli loa ki le kau Levi, e kotou filifili loa ni kolo ulufaga e ono, ke sola ki ai le tagata tukipo, mo ni iki a kolo e kau fa tupu lua.

⁷ Ko le lasi o kolo ala e kotou soli loa ki le kau Levi ko le kau fa tupu valu, o fakatasi mo kele fagai manu i olatou tafatafa.

⁸ Ko kolo ala e kotou soli loa ki le kau Levi e fuafua lona lasi ki le lasi o le tofiga leia e maua e le faasiga taki tasi : ko leia e lasi lona tofiga e soli loa kiate ia o lasi, ti ko leia e ikiiki lona tofiga e soli loa kiate ia o ikiiki.

Kolo ulufaga e 6

⁹ Na masau loa le Eteleno kia Moisese, o pati :

¹⁰ Masau ki vosa o Iselaele, ti ke pati loa kia latou : Ka kotou fakalaka loa i le Solotane ti kotou ulu loa ki le fenua o Kanaane,

¹¹ E kotou filifili loa ni kolo ke tuu ko ni kolo ulufaga. I kolo ana e feala loa ke sola ki ai leia na tukipooi ia se tasi i se tutamaki.

¹² E kotou fakaaoga loa a kolo ana ofaipe ni ulufaga ki le tagata totogi toto, o tupu ke aua na tamate le tagata tukipo kae e leikiaise fakamaaui a ia e le fono.

¹³ I kolo ala e kotou soli loa ki le kau Levi, e kotou filifili loa ni kolo ulufaga e ono.

¹⁴ E kotou soli loa ni kolo e ono i le fetuu esite o le Solotane, ti e kotou soli loa ni kolo e ono i le fenua o Kanaane : Ko kolo ulufaga loa ana.

¹⁵ E feala loa ke sosola ki se kolo i kolo ana e ono a kakai fuli, fanau a Iselaele mo matapule, mo latou fuli ala e mauli i loto malie o Iselaele, latou ala na tamate ia se tasi i se tutamaki.

¹⁶ Kapau e taai loa e se tasi lona oloi ki se nea ukamea o tupu ai lona mate, ko se tukipo a ia : ti e fakatuaa loa le tagata tukipo ki le mate.

¹⁷ Ti kapau e taai loa e ia lona oloi kae na too loa e ia se fatu i lona lima ke tupu ai le mate, ko se tukipo a ia : ti e fakatuaa loa le tagata tukipo ki le mate.

¹⁸ Ti kapau e taai loa e ia lona oloi o mate kae na too e ia se potu laakau i lona lima ke tupu ai le mate, ko se tukipo a ia : ti e fakatuaa loa le tagata tukipo ki le mate.

¹⁹ E tamate loa e le tagata totogi toto le tagata tukipo ; mo ka maua loa e ia a ia.

²⁰ Ti kapau e tulei loa e se tasi lona oloi i lona vesia, pe titi loa e ia a ia ki se nea i lona loto veli, o tupu ai le mate,

²¹ pe taai loa e ia ki lona lima i lona vesia, o tupu ai le mate, e fakatuaa loa le tagata tukipo ki le mate, talie ko se tukipo a ia. E tamate loa a ia e le tagata totogi toto mo ka maua loa e ia a ia.

²² Kae kapau e tulei loa e se tasi lona oloi i se tutamaki kae na leaise se loto veli a ia, pe ti loa e ia kiate ia se nea kae na leaise loto a ia ki ai,

²³ pe fakavilo loa e ia kiate ia se fatu o tupu ai le mate, kae na leaise loto a ia ki ai, ti na leaise fili a ia kiate ia, ti na leaise afa e ia se nea veli kiate ia,

²⁴ Ko na lekula ala e tonu ke tioi e le kakai i le aso o le fakamaau o le tagata tukipo mo le tagata totogi toto.

²⁵ E fakamauli loa e le kakai le tagata tukipo mei le lima o le tagata totogi toto. E toe fakaliliu loa e le kakai le tagata lena ki le kolo ulufaga leia na sola ki ai. E nofo loa a ia i ai o kaku ki le mate o le tagata faisakilifisio lasi leia kua pani ki le lolo tapu.

²⁶ Kapau e mavae loa le tagata tukipo mei koiga o le kolo ulufaga leia na sola ki ai,

²⁷ ti kapau e felavei loa a ia mo le tagata totogi toto i fafo o le kolo ulufaga, ti e aga loa le tagata totogi toto o tamate le tagata tukipo, e leaise agasala loa le tagata totogi toto i le nea lena.

²⁸ Talie e tonu ke nofo mau le tagata tukipo i le kolo ulufaga o kaku ki le mate o le tagata faisakilifisio pule ; i le mate o le tagata faisakilifisio pule, e feala loa ke toe liliu le tagata tukipo ki lona tofiga.

²⁹ E kotou mulimuli loa ki lekula ana i temi fuli, i ganea fuli ala e kotou nofo ai loa.

³⁰ Kapau e taai loa e se tagata se tasi o mate, e tonu loa ke tamate le tagata tukipo, i le fakamaoki a ni tagata fakamaoki. Kae e leaise feauga le fakamaoki a se tagata fakamaoki e tasi ke tamate ai se tasi.

³¹ Ke aua na kotou tali loa se totogi ki le mauli o se tagata tukipo leia e tonu ke mate, talie e tautea loa a ia ki le mate.

³² Ke aua na kotou tali loa se totogi, leia e feala ai kiate ia ke sola ki lona kolo ulufaga ti ke toe liliu loa o nofo i lona fenua i le mate o le tagata faisakilifisio lasi.

³³ Ke aua na kotou fakakelekele loa le fenua leia e kotou nonofo ai loa : talie e fakakelekele e le tagata tukipo le fenua ; ti kapau e tukipooi loa se tagata o mate, koi fakamea loa le fenua mo kapau e tamate loa le tagata tukipo.

³⁴ E leaise kotou fakakelekele loa le fenua leia ka kotou nonofo ai loa, ti e kau toe nofo ai loa i loto malie o koutou. Talie ko au ko le Eteleno, e kau nofo i loto malie o fanau a Iselaele.