Numelo 34 - Tosi Tapu

Koiga o le fenua o Kanaane

¹ Na masau loa le Eteleno kia Moisese, o pati :

² Tuku le fakatotonu leinei ki fanau a Iselaele, o ke pati loa kia latou : Ka kotou ulu loa ki le fenua o Kanaane : ko lena le fenua leia e kotou maua tofiga loa, le fenua o Kanaane, mo ona koiga.

³ I le saute, e gato atu loa lokoutou fenua i le toafa o Tesini mo le fenua o Etome. E fano loa le koiga i le fetuu esite, mei le potupotu o le tai Mate.

⁴ E maliu loa a ia i le paleaga o Akilakimi, o ano ki Tesini, o fakalaka i le saute o Katesi-Palenea, o soko atu i le kolo ko Ata, o kaku ki Asimoni,

⁵ I Asimoni, e toe maliu loa a ia o fakatau ki le liua o Esipito, o kaku ki le tai Metitelanea.

⁶ I le Uesite, ko le koiga ko le tai Metitelanea.

⁷ I le noleto, e kotou fai loa le koiga i le vasa o le tai Metitelanea mo le mauga o Oli.

⁸ Mei le mauga o Oli, e kotou ave loa le koiga i Lepo-Amati mo Setate.

⁹ E soko atu loa le koiga i Sifiloni, o fakagato i Asa-Enani. Ko lena lokoutou koiga i le noleto.

¹⁰ I le esite, e kotou fai loa le koiga o kamata atu i Asa-Enani, o ano ki Sefami.

¹¹ I lena e ano loa a ia ki Lipila, i le esite o Aine, ti natu loa i ai, o kaku ki vae o mauga ala e tuu i le esite o le vai ko Senesaleti,

¹² ti e ifo loa i ai i le tafeaga o le vaitafe ko le Solotane o kaku ki le tai Mate. Ko na koiga o lokoutou fenua.

¹³ Na fakasa loa e Moisese le fakatotonu lena ki fanau a Iselaele, o pati : Ko lena le fenua leia e tonu loa ke kotou vae ki le toso, le fenua leia na fakatotonu e le Eteleno ke soli ki faasiga e iva mo le vaelua.

¹⁴ Talie ko le faasiga o Lupeni, mo le faasiga o Kate, mo le vaelua o le faasiga o Manase, kua oki olatou vaega i le soli kia latou.

¹⁵ E tuu le vaega o faasiga ana e lua mo le vaelua i mua o Seliko, i le kauvai esite o le Solotane.

Latou na fai ia le vae

¹⁶ Na masau loa le Eteleno kia Moisese, o pati :

¹⁷ Ko nei igoa o tagata ala e fai ia loa le vae o le fenua kia koutou : ko le tagata faisakilifisio ko Eleasale mo Sosue, vosa o Nune.

¹⁸ Ke kotou toe too foki mo se tagata pule i faasiga taki tasi, ke kau i le vae o le fenua.

¹⁹ Ko nei igoa o tagata ana : Ki le faasiga o Suta, ko Kalepo, vosa o Sefune.

²⁰ Ki le faasiga o vosa o Simeone, ko Samuele, vosa Amiute.

²¹ Ki le faasiga o Pesamino, ko Elitate, vosa o Kisilone.

²² Ki le faasiga o Tane, ko le pule ko Puki, vosa o Sokeli.

²³ Ki le faasiga o Sosefo, ki le faasiga o Manase, ko le pule ko Aniele, vosa o Efoti ;

²⁴ ki le faasiga o Efalaimi, ko le pule ko Kemuele, vosa o Sifitane.

²⁵ Ki le faasiga o Sapulone, ko le pule ko Elisafani, vosa o Palenake.

²⁶ Ki le faasiga o Isakale, ko le pule ko Paletiele, vosa o Asane.

²⁷ Ki le faasiga o vosa o Asele, ko le pule ko Aiuti, vosa o Selomi.

²⁸ Ki le faasiga o vosa o Nefetali, ko le pule ko Petaele, vosa o Amiute.

²⁹ Ko na latou ala na fakatotonu e le Eteleno ke fai ia le vae o le fenua o Kanaane ki fanau a Iselaele.