Numelo 32 - Tosi Tapu

Nofo o Lupeni mo Kate i Kalaate

¹ Na maua e vosa o Lupeni mo vosa o Kate se kau manu lasi ai, ti na lotou tio loa ko le fenua o Saesele mo le fenua o Kalaate ko ni fenua malilie ki le fagai manu.

² Ti na ano loa a vosa o Kate mo vosa o Lupeni kia Moisese, mo le tagata faisakilifisio ko Eleasale, mo pule o le fakatasi, o pati kia latou :

³ Ko Ataloti, mo Tiponi, mo Saesele, mo Nimila, mo Eseponi, mo Elale, mo Sepami, mo Nepo, mo Peoni,

⁴ e kau ki le fenua leia na tautea e le Eteleno i mua o fanau a Iselaele, ti e malie a ia ki le fagai manu, ti e maua e au tagata fakasausau ni kau manu lalasi.

⁵ Ti na lotou toe pati loa kia Moisese : Kapau kua motou maua se kalasia i ou mata, tuku ke maua e au tagata fakasausau le fenua leinei, ti aua na ke tuku matou ke fakalaka i le Solotane.

⁶ Na tali loa Moisese ki vosa o Kate mo vosa o Lupeni : Pe ano loa okoutou fetaina ki le tau, kae kotou nofo loa i leinei ?

⁷ Kolea e kotou loto ai ke loto gaegae fanau a Iselaele i le ano ki le fenua leia e soli e le Eteleno kia latou ?

⁸ Na fai foki le nea lena e okoutou tamana i le aso leia na kakau ai latou e Moisese mei Katesi-Palenea ke ano o tioi le fenua.

⁹ Na lotou pale loa i le temi lena o kaku ki le liua o Esikoli, kae i le oki o lalatou tioi le fenua, na lotou fakalotogaegae ia loa fanau a Iselaele ke aua na lotou ano ki le fenua leia kua soli e le Eteleno kia latou.

¹⁰ Na mu loa le sausau o le Eteleno i le aso lena kia latou, ti na fakapapau loa a ia, o pati :

¹¹ Ko tagata ala na pale mei Esipito, mei le fetuu kau lua o fai ki aluga, e leaise tio loa ki le fenua leia na kau fakapapau ke soli kia Apalaamo, mo Isaake, mo Sakopo, talie na leaise lotou mulimuli katoa i loku ala,

¹² kae gato fai kia Kalepo, vosa o Sefune, tagata Kenia, mo Sosue, vosa o Nune, ala na mulimuli katoa i le ala o le Eteleno.

¹³ Na mu loa le sausau o le Eteleno ki Iselaele, ti na fakaeva loa e ia latou i le toafa i fetuu e kau fa, o kaku ki le puli o le tautupu katoa leia na fai ia le nea veli lena ki mata o le Eteleno.

¹⁴ Ti ko leinei, e kotou toe fetogi ia okoutou tamana ofaipe ni uli o tagata agasala, ke asilisili veli ai le sausau o le Eteleno ki Iselaele.

¹⁵ Talie, kapau e kotou titua kiate ia, ti e toe soko atu loa e ia le fakaeva o Iselaele i le toafa, ti e mate loa le kakai leinei o tupu ko koutou.

¹⁶ Na lotou fakafeofi ake loa kia Moisese, o pati : E motou fakatuu loa i leinei ni lotoa ki amatou kau manu mo ni kolo ki omatou fanau ;

¹⁷ ti oki, e motou fakatavili loa o too amatou masafu, o muamua i fanau a Iselaele, o kaku ki le oki o lamatou fakanonofo latou i le fenua leia kua soli kia latou ; kae nonofo loa omatou fanau i ni kolo tau, o tupu ko kakai o le fenua.

¹⁸ E leaise motou toe liliu loa ki omatou fale i mua o le tasi nofo o fanau a Iselaele ki lona tofiga.

¹⁹ Ti e leaise motou maua loa se tofiga mo latou i leia kauvai o le Solotane, pe mamao atu foki, talie kua motou maua lomatou tofiga i leinei kauvai o le Solotane i le potu esite.

²⁰ Na pati loa Moisese kia latou : Kapau e kotou fai loa le masau lena, kapau e kotou too loa akoutou masafu, o tau i mua o le Eteleno,

²¹ kapau e fakalaka loa i le Solotane i mua o le Eteleno latou fuli ala o koutou e too ia loa alatou masafu, o kaku ki le oki o lana kapu ona fili i ona mua,

²² ti kapau e kotou toe liliu loa i le oki o le fakalogo o le fenua lena ki le Eteleno, e kotou lauatea loa i mua o le Eteleno mo Iselaele, ti e liliu loa le fenua leinei ko lokoutou tofiga i mua o le Eteleno.

²³ Kae kapau e leaise kotou fai fenaaki loa, e kotou agasala loa ki le Eteleno ; ti ke kotou iloa e toe maua loa koutou e lakoutou agasala.

²⁴ Kotou fai loa ni kolo ki okoutou fanau mo ni lotoa ki akoutou kau manu liliki, ti kotou fai loa le nea leia kua puaki e lokoutou gutu.

²⁵ Na pati loa a vosa o Kate mo vosa o Lupeni kia Moisese : E fai loa e au tagata fakasausau le nea leia na fakatotonu e lomatou aliki.

²⁶ E nonofo loa amatou fanau, mo omatou fafine, mo amatou kau manu lalasi mo omatou kau manu liliki i kolo o Kalaate.

²⁷ Kae e too loa e au tagata fakasausau alatou masafu, o ano loa o tau i mua o le Eteleno, o fai ki le nea leia kua pati ki ai lomatou aliki.

²⁸ Na tuku loa e Moisese ni fakatotonu o uiga mo latou ki le tagata faisakilifisio ko Eleasale, mo Sosue, vosa o Nune, mo la ake kau pule famili i faasiga o fanau a Iselaele.

²⁹ Na pati loa a ia kia latou : Kapau e too loa e vosa o Kate mo vosa o Lupeni alatou masafu, o fakalaka i le Solotane mo koutou, ti kapau e lotou tau loa i mua o le Eteleno, ti kapau e fakalogo loa le fenua kia koutou, ke kotou soli loa kia latou le tofiga o le fenua ko Kalaate.

³⁰ Kae kapau e leaise lotou too ia loa alatou masafu o fakalaka mo koutou i le Solotane, ke lotou maua loa lolatou tofiga mo koutou i le fenua o Kanaane.

³¹ Na tali loa a vosa o Kate mo vosa o Lupeni : E motou fai loa le nea leia kua fakasa e le Eteleno ki ana tagata fakasausau.

³² E motou too loa amatou masafu ti e motou fakalaka loa i mua o le Eteleno, o ano ki le fenua o Kanaane. Kae ke motou maua lomatou tofiga i le fetuu leinei o le Solotane.

³³ Na soli loa e Moisese ki vosa o Kate, mo vosa o Lupeni, mo le vaelua o le faasiga o Manase, vosa o Sosefo, le fenua o Sioni, sau o le kau Amole, mo le fenua o Oki, sau o Pasani, mo kolo mo kele i tafatafa o kolo.

³⁴ Na laga loa e le kau Kate a Tiponi, mo Ataloti, mo Aloele,

³⁵ mo Atoloti-Sofani, mo Saesele, mo Sokepea,

³⁶ mo Pete-Nimila, mo Pete-Alane : Na lotou fakaliliu loa latou ko ni kolo tau ; ti na lotou fakatuu foki ni lotoa ki alatou kau manu.

³⁷ Na laga loa e vosa o Lupeni a Eseponi, mo Eleale, mo Kiliataimi,

³⁸ mo Nepo, mo Paale-Meoni, mo Sipima, ti na lotou tuku loa ni igoa foou ki kolo ala na latou toe lagai.

³⁹ Na saele loa vosa o Makile, vosa o Manase, ki Kalaate, o too a ia ; ti na lotou kapu loa le kau Amole ala na nonofo i ai.

⁴⁰ Na soli loa e Moisese a Kalaate kia Makile, vosa o Manase, leia na nofo loa i ai.

⁴¹ Na saele loa Saili, vosa o Manase, o too a kolo liliki o le kau Amole, ti na fakaigoa loa e ia latou ko kolo o Saili.

⁴² Na saele loa Nopaki, o too Kenati mo kolo ala na fakalogo ki ai, ti na tuku loa e ia ki ai lona igoa ko Nopaki.