Numelo 31 - Tosi Tapu

Malo i Matiane

¹ Na masau loa le Eteleno kia Moisese, o pati :

² Tau ki le kau Matiane o tupu ko fanau a Iselaele ; ti oki, ti ke mate loa.

³ Na masau loa Moisese ki le kakai, o pati : Ke too e ni tagata o koutou alatou masafu ti ke lotou ano o tau ki le kau Matiane, o fai kia latou le totogi leia na fakatotonu e le Eteleno kia latou.

⁴ Ke kotou filifili ki le nea lena ni tagata tau e tino afe i le faasiga taki tasi.

⁵ Na filifili loa ki le solia o Iselaele ni tagata e tino afe i le faasiga taki tasi, o fakatasi ko tagata tau e tino agafulu tupu lua afe (12 000).

⁶ Na kakau loa e Moisese le kau tagata lena ke ano o taui Matiane, ti na ano loa mo latou le tagata faisakilifisio ko Finesi, vosa o Eleasale. Na ave loa e Finesi a nea taputapu, mo fakatagi pupusi ke fakasa ai le fakamailoga o le kalaga o le tau.

⁷ Na lotou taui loa Matiane, o mulimuli ki le fakatotonu leia na tuku e le Eteleno kia Moisese, ti na lotou tamate loa a tagata fuli.

⁸ Na lotou tamate loa a sau e lima o Matiane : ko Evi, mo Lekeme, mo Tesuli, mo Uli, mo Lepa, mo Palaame, vosa o Peoli.

⁹ Kae na fakapilisoni loa e fanau a Iselaele a fafine mo toe o Matiane, ti na lotou too loa alatou kau manu lalasi fuli, mo alatou kau manu liliki fuli, mo alatou koloa fuli.

¹⁰ Na lotou tutu loa a kolo fuli ala na lotou nofo ai, mo ganea fuli ala na fakatuu ai olatou falela.

¹¹ Na lotou toe liliu loa mo le kakai, mo kau manu, mo koloa fuli ala na lotou maua i le tau.

¹² Na lotou ave loa a nea fuli ana ala na maua i le tau ki mua o Moisese, mo le tagata faisakilifisio ko Eleasale, mo le kakai katoa o Iselaele, ala na nonofo i le fenua o Moape, i tafa o le Solotane, i mua o Seliko.

¹³ Na ano loa Moisese, mo Eleasale, mo le kau pule o fanau a Iselaele, o fakafetaulaki kia latou i fafo o le nofolaga.

¹⁴ Ti na ita loa Moisese ki le kau pule o le solia, kia latou ala na pule ki le tino afe, mo latou ala na pule ki le tino lelau, ala kua toe liliu ake i le tau.

¹⁵ Na pati loa a ia kia latou : Kolea na kotou tuku ai le mauli o fafine ?

¹⁶ Ko leinei, ko latou ala na taki ia tagata o Iselaele ke agasala ki le Eteleno i le faiganea o Peoli, o mulimuli ki le tokoi a Palaame ; ti koia leia na vilo ai le malaia i le fakatasi a le Eteleno.

¹⁷ I le temi nei, ke kotou tamate a toe tagata fuli i toe liliki, ti ke kotou tamate a fafine fuli ala kua momoe mo se tagata ;

¹⁸ kae ke kotou tuku loa ke mauli ma koutou a taineliki fuli ala e leikiaise momoe mo se tagata.

¹⁹ Ti ko koutou, ke kotou nonofo i fafo o le nofolaga i ni aso e fitu ; ko latou fuli ala na tamate ia se tagata, mo latou fuli ala na lave ki se mate, e fakamea loa i le tolu o aso mo le fitu o aso, latou mo alatou kau pilisoni.

²⁰ Ke kotou fakamea foki a kofu fuli, mo nea fuli ala e fai ki le kilii manu, mo nea fuli ala e fai ki le fului koti, mo nea fuli ala e fai ki le laakau.

²¹ Na pati loa le tagata faisakilifisio ko Eleasale ki tagata solia ala na ano ki le tau : Ko leinei le nea leia na fakatotonu e le lao leia na tuku e le Eteleno kia Moisese.

²² Ko le aulo, mo le paaga, mo le kapa, mo le ukamea, mo le tini, mo le pulu,

²³ a nea fuli ala e feala ke tali ia le afi, e tonu ke fakalaka i le afi ke mea. Kae tonu loa ke fakamea e le vai fakamea a nea fuli ala e leaise feala ke fakalaka i le afi ; e kotou fakalaka loa latou i le vai.

²⁴ E kotou fakamea loa okoutou kofu i le fitu o aso, ti e kotou mea loa ; ti e feala loa ke kotou ulu ki le nofolaga.

Vae o koloa o le tau

²⁵ Na pati loa le Eteleno kia Moisese :

²⁶ Fai e koe mo le tagata faisakilifisio ko Eleasale, mo pule famili o fanau a Iselaele, le tanaki o nea mauli fuli ala na maua i le tau, tagata mo manu.

²⁷ Fai e koe ni vaega e lua, ko le tasi vaega kia latou ala na kau i le tau, ti ko le tasi vaega ki le toega o le kakai.

²⁸ I le vaega o latou ala na kau i le tau, e ke too loa se vaega, leia ko se tukusau ki le Eteleno : e too loa se toka tasi i ni tino lelau e lima, mo se manu e tasi i ni manu e kau lelau lima, tatau i pipi, mo asino, mo ovi, mo koti.

²⁹ E ke tuku loa ki le tagata faisakilifisio ko Eleasale le tukusau lena kua soli ki le Eteleno.

³⁰ I le vaega leia e soli ki fanau a Iselaele, e ke taofi loa se toka tasi i ni tino lelau e lima, mo se manu e tasi i ni manu e kau lelau lima, tatau i pipi, mo asino, mo ovi, mo koti. Ti ke tuku loa le vaega lena ki le kau Levi, ala e tokaga ki le falela tapu o le Eteleno.

³¹ Na fai loa e Moisese mo Eleasale le fakatotonu lena na tuku e le Eteleno kia Moisese.

³² Na too loa i le koloa fuli leia na maua i le fili e le kau tau a Iselaele : a ovi mo koti e kau lelau ono kau fitu tupu lima afe (675 000),

³³ mo pipi e kau fitu tupu lua afe (72 000),

³⁴ mo asino e kau ono tupu tasi afe (61 000),

³⁵ mo taine taupoou e tino tolu tupu lua afe (32 000), ala na leikiaise momoe mo se tagata.

³⁶ Ko le vaega leia na soli ki le kau tau : ko ovi mo koti e kau lelau tolu kau tolu tupu fitu afe kau lelau lima (337 500),

³⁷ o too loa i ai ki le Eteleno a ovi mo koti e kau lelau ono kau fitu tupu lima (675) ;

³⁸ mo pipi e kau tolu tupu ono afe (36 000), o too loa i ai ki le Eteleno a pipi e kau fitu tupu lua (72) ;

³⁹ mo asino e kau tolu afe kau lelau lima (30 500), o too loa i ai ki le Eteleno a asino e kau ono tupu tasi (61) ;

⁴⁰ mo le kakai e tino agafulu tupu ono afe (16 000), o too loa i ai ki le Eteleno le tino tolu tupu lua (32).

⁴¹ Na soli loa e Moisese ki le tagata faisakilifisio ko Eleasale le tukusau ki le Eteleno, o mulimuli ki le fakatotonu leia na tuku e le Eteleno kia Moisese.

⁴² Ko le vaega leia na tuku ki le toega o fanau a Iselaele, na tatau mo le vaega o le kau tau :

⁴³ ko ovi mo koti e kau lelau tolu kau tolu tupu fitu afe (337 000),

⁴⁴ mo pipi e kau tolu tupu ono afe (36 000),

⁴⁵ mo asino e kau tolu afe kau lelau lima (30 500),

⁴⁶ mo le kakai e tino agafulu tupu ono afe (16 000).

⁴⁷ I le vaega lena na tuku ki fanau a Iselaele, na too loa e Moisese se tukusau ko se toka tasi i tino lelau e lima, mo se manu e tasi i manu e kau lelau e lima. Ti na soli loa e ia le vaega lena ki le kau Levi, ala na tokaga ki le falela tapu o le Eteleno, o mulimuli ki le fakatotonu leia na tuku e le Eteleno kiate ia.

⁴⁸ Ko pule o le kau tau : pule o le tino afe, mo pule o le tino lelau, na maopo ake loa ki tafa o Moisese.

⁴⁹ Ti na lotou pati loa kia Moisese : Kua lau e au tagata fakasausau a tagata solia ala na fakalogo kia matou, ti ko leinei e leaise puli fua se fa toka tasi o matou.

⁵⁰ Koia e motou aumai ai ni moliga ki le Eteleno, o tupu na saofaki e le Eteleno omatou mauli. E motou tasi momoli loa ki le Eteleno a nea ala na motou tasi maua ia : a tini, mo matemate, mo mama, mo sa sau, mo malia.

⁵¹ Na too loa e Moisese mo le tagata faisakilifisio ko Eleasale a nea fakateuteu aulo fuli ala na lotou ave kia laua.

⁵² Ko le mamafa katoa o nea ala na momoli ki le Eteleno e le kau pule ko kilo e kau lelau kau fitu (170).

⁵³ Kae na tasi taupau loa e le tagata solia lana nea leia na maua.

⁵⁴ Na tuku loa e Moisese mo Eleasale a nea aulo fuli ala na momoli e le kau pule o Iselaele ki le falela tapu, o tupu ke aua na galoi e le Eteleno a fanau a Iselaele.