Numelo 30 - Tosi Tapu

¹ Na fakasa loa e Moisese ki fanau a Iselaele a nea fuli ala na fakatotonu e le Eteleno kiate ia.

Lao o uiga mo fakapapau

² Na masau loa Moisese ki pule o faasiga o Iselaele, o pati : Ko leinei le nea leia e fakatotonu e le Eteleno.

³ Kapau e fai loa e se tagata se fakapapau ki le Eteleno, pe ko se fakapapau ke sai ai a ia, e leaise maumaui loa e ia lana masau, e fai loa e ia o mulimuli ki le nea leia na ulu mei lona gutu.

⁴ Kae kapau e fai loa e se fafine, i lona temi taupoou, i lana koi nofo i le fale o lona tamana, se fakapapau ki le Eteleno, o sai loa a ia e lana fakapapau ki le Eteleno,

⁵ kapau na leaise pati lona tamana kiate ia ki se nea i le lakaga leia na logo ai a ia ki le fakapapau a lona taine, ti e maua loa ke fai e le taine lana fakapapau.

⁶ Kae kapau e fakafesagai lona tamana kiate ia i lana logo ki le nea lena, e leaise maua loa ke fai e le taine lana fakapapau : ti e fakamolemole loa le Eteleno kiate ia, talie na fakafesagai lona tamana kiate ia.

⁷ Kae kapau e soko loa na fai e se taine se fakapapau fakavale, ti oki ake kae avaga loa a ia ;

⁸ Ti kapau na logo loa lona avaga ki le nea lena kae na leaise pati a ia ki se nea i le aso lena, e maua loa ke fai e le taine lana fakapapau.

⁹ Kae kapau na fakafiti loa lona avaga ki le nea lena i le aso leia na logo ai ki ai, ti e ano noa loa le fakapapau i le nea lena, ti e fakamolemole loa le Eteleno ki le fafine i le leaise fai o lana fakapapau.

¹⁰ Kapau ko se fafine leia kua mate lona avaga, pe ko se fafine leia kua mavete mo lona avaga, e fai ia loa se fakapapau, e maua loa le fafine lena ke fai e ia lana fakapapau.

¹¹ Kae kapau e fai e se fafine avaga se fakapapau,

¹² ti kapau na leaise fakafesagai ki ai lona avaga i le aso leia na logo ai a ia ki le nea lena, e maua loa le fafine lena ke fai e ia lana fakapapau.

¹³ Kae kapau na fakafesagai le tagata ki le fakapapau a lona avaga i le aso totonu leia na logo ai ki ai, ti e leaise maua loa le fafine ke fai e ia lana fakapapau.

¹⁴ Koia kapau e fai loa e le fafine se fakapapau ki se nea ke fai pe leaise fai, e feala loa ke fakamaoki pe fakafesagai lona avaga ki le fakapapau leia na fai e le fafine.

¹⁵ Kapau e tuku loa e le tagata ke sili se aso e tasi ki le aso leia na iloa ai e ia le fakapapau a lona avaga, o leaise pati a ia ki se nea ki le fafine, e fakamaoki loa a ia i lana fakalologo ki le fakapapau leia na fai e le fafine.

¹⁶ Koia kapau e loto loa le tagata ke fakanoai e ia ki muli le fakapapau a le fafine, e sala loa le tagata mo kapau e leaise fai loa e le fafine lana fakapapau.

¹⁷ Ko na a lao ala na tuku e le Eteleno kia Moisese o uiga mo fakapapau ala e fai loa e se fafine avaga pe ko se taine koi nofo i le fale o lona tamana.