Numelo 3 - Tosi Tapu

Le tosi mo gaoi a le faasiga o Levi

¹ Ko leinei le famili o Alone mo Moisese, i le temi leia na masau ai le Eteleno kia Moisese i le mauga o Sinai.

² Ko nei a igoa o vosa o Alone : ko le uluaki ko Natape, mo Apiu, mo Eleasale, ti mo Itamale.

³ Ko igoa ana o vosa o Alone ala na fakanofo ke faisakilifisio ti na ulu loa ki le gaoi o tagata faisakilifisio.

⁴ Na mate loa Natape mo Apiu i mua o le Eteleno, o tupu na la ave ia se afi kese ki mua o le Eteleno i le toafa o Sinai ; na la sala vosa. Ti na fai loa e Eleasale mo Itamale le gaoi o tagata faisakilifisio i mua o lola tamana ko Alone.

⁵ Na masau loa le Eteleno kia Moisese, o pati :

⁶ Ke ke fakafeofi mai le faasiga o Levi, ti e ke tuku loa latou ke fakalogo ki le tagata faisakilifisio ko Alone, ti ke lotou fakasausau kiate ia.

⁷ E lotou fai loa lalatou gaoi i mua o le falela tapu o fakasausau kia Alone mo le kakai katoa o Iselaele, ti e lotou fai loa a gaoi fuli ki le falela tapu.

⁸ E lotou tokaga loa ki nea gaoi o le falela tapu ti e lotou fai loa ki le kakai o Iselaele a gaoi fuli ala e aoga ki le falela tapu.

⁹ E ke fakasa loa ke fakalogo le kau Levi kia Alone mo ona vosa, ki le tausi o le sagatualio, ti ke lotou fakafofoga loa fanau a Iselaele.

¹⁰ E ke fakanofo loa Alone mo ona vosa ke fai ia le gaoi o le tagata faisakilifisio lasi. Ti kapau e fakafeofi loa se tagata kese ki ai, ti e tautea loa a ia ki le mate.

¹¹ Ti na toe masau loa le Eteleno kia Moisese :

¹² Ko au totonu leia kua filifili ia le kau Levi i la ake fanau fuli o Iselaele. E lotou tausi loa kiate au o fetogi a uluaki fuli o fanau a Iselaele.

¹³ Talie i le aso leia na kau tamate ai a uluaki o le kau Esipito, na kau fakatapui kiate au a vosa uluaki fuli o fanau a Iselaele mo uluaki fuli o alatou kau manu : a aku loa latou, ko au ko le Eteleno.

¹⁴ Na masau loa le Eteleno kia Moisese, i le toafa o Sinai, o pati :

¹⁵ Ke ke tosi loa a vosa o Levi o mulimuli ki olatou famili, ti mo olatou faasiga ; ke ke tosi loa a tagata fuli mei le masina tasi o fai ki aluga.

¹⁶ Na tosi loa latou e Moisese i le fakatotonu a le Eteleno, o mulimuli ki le fakatotonu leia na tuku ake kiate ia.

¹⁷ Ko igoa o vosa o Levi : ko Kelesoni, mo Keati, mo Melali.

¹⁸ Ko nei a igoa o vosa o Kelesoni, o mulimuli ki olatou famili : ko Lipini mo Simei.

¹⁹ Ko nei a vosa o Keati, o mulimuli ki olatou famili : ko Amilame, mo Isea, mo Epelone, mo Usiele ;

²⁰ ti mo vosa o Melali, o mulimuli ki olatou famili : ko Mali mo Musi. Ko famili ana o Levi, o mulimuli ki fale o olatou tamana.

²¹ Na ifo meia Kelesoni le famili o Lipini mo le famili o Simei, ala ko famili o le kau Kelesoni.

²² Ko latou ala na tosi, o lau mei le masina tasi o fai ki aluga, ko le toka fitu afe tino lelau lima tagata (7 500).

²³ Na nofo loa le faasiga o Kelesoni i muli o le falela tapu, i le fetuu Uesite.

²⁴ Ko le pule o le kau Kelesoni ko Eliasafe, vosa o Laele.

²⁵ Na tokaga loa le kau Kelesoni ki koga anei o le falela tapu : ki le falela taputapu mo le falela tapu, mo le la fakamalumalu o le falela tapu i tafa, mo le lito tapono o le uluaga ulu o le falela tapu,

²⁶ mo puipui o le lotoa, mo le lito tapono o le uluaga ki le lotoa leia e takatakai ia le falela tapu mo le aletale, ti mo maea o le falela tapu. E lotou tokaga loa ki le tausi o nea fuli ana.

²⁷ Na ifo meia Keati le famili o le kau Amilame, mo le famili o le kau Isea, mo le famili o le kau Epelone, mo le famili o le kau Usiele, ala ko famili o le kau Keati.

²⁸ Ko lolatou api ko le valu afe tino lelau ono tagata (8 600), mei le masina tasi o fai ki aluga. Na tuku kia latou le tausi o nea tapu.

²⁹ Na nofo loa famili o vosa o Keati i le fetuu saute o le falela tapu.

³⁰ Ko lolatou pule ko Elisafani, vosa o Usiele.

³¹ Na tokaga loa le kau Keati ki le aleka tapu, mo le laupapa tapu, mo le tuuaga malaga, mo aletale, mo nea gaoi o le sagatualio, ti mo le lito tapono o le potu taputapu. Na lotou tokaga loa ki le tausi o nea fuli ana.

³² Ko le pule lasi o le kau Levi ko Eleasale, vosa o le tagata faisakilifisio ko Alone ; ko ia leia na leoleo loa ki tagata ala na gaoi ki le sagatualio.

³³ Na ifo loa meia Melali le famili o le kau Mali mo le famili o le kau Musi.

³⁴ Ko lolatou api i le tosi ko le ono afe tino lelau lua tagata (6 200), mei le masina tasi o fai ki aluga.

³⁵ Ko lolatou pule ko Tuliele, vosa o Apiaile. Na lotou nonofo i le fetuu noleto o le falela tapu.

³⁶ Na tokaga loa le kau Melali ki papa o le falela tapu, mo ona laakau fakamaumau, mo ona pou, mo ona tuuaga pou, mo ona ipu fuli, ti mo ona nea gaoi fuli.

³⁷ Ti na lotou toe tokaga foki ki pou o le lotoa, mo tuuaga pou, mo pike, mo maea.

³⁸ Na nofo loa Moisese, mo Alone ti mo ona vosa i mua o le uluaga o le falela tapu, i le potu esite. Na lotou tokaga ki le taupau mo le tausi o le sagatualio, i le igoa o fanau a Iselaele ; ti e tautea loa ki le mate a tagata kese fuli ala e fakafeofi loa ki ai.

³⁹ Ko le api o le kau Levi ko le tino lua tupu lua afe tagata (22 000), mei le masina tasi o fai ki aluga. Na fai le tosi lena e Moisese mo Alone, o mulimuli ki le fakatotonu a le Eteleno, ke tosi a tagata fuli o mulimuli ki famili.

Totogi o tama uluaki tupu

⁴⁰ Na masau loa le Eteleno kia Moisese : Ke ke tosi a igoa taki tasi o tagata uluaki fuli o fanau a Iselaele, mei le masina tasi o fai ki aluga.

⁴¹ Ti ke vaei kese loa le kau Levi kiate au, ko le Eteleno, o fetogi ai a tagata uluaki fuli o fanau a Iselaele, ti ko le kau manu o le kau Levi ke fetogi ai a manu uluaki fuli o fanau a Iselaele.

⁴² Na tosi loa e Moisese a tagata uluaki fuli o fanau a Iselaele, o mulimuli ki le fakatotonu leia na tuku e le Eteleno kiate ia.

⁴³ Ko tagata fuli ala na tosi, o lau mei le masina tasi o fai ki aluga, ko le tino lua tupu lua afe tino lelau lua tino fitu tupu tolu (22 273).

⁴⁴ Na masau loa le Eteleno kia Moisese, o pati :

⁴⁵ Ke ke vaei kese kiate au le kau Levi ke fetogi ia a tagata uluaki fuli o fanau a Iselaele, ti mo le kau manu o le kau Levi ke fetogi ia alatou manu uluaki. Ti e fakalogo mai loa le kau Levi kiate au. Ko au ko le Eteleno.

⁴⁶ Ti na toe loa ke toe totogi a tino lelau lua tupu fitu tupu tolu (273) tagata uluaki o fanau a Iselaele, ala na fakalaka loa i le kau Levi.

⁴⁷ E ke tuku loa le totogi o le tagata ko fa piesi paaga e lima, i le paaga o le sagatualio, leia e kalami lima le mamafa o le fa piesi e tasi.

⁴⁸ Ti e ke tuku loa le paaga lena kia Alone mo ona vosa ; ko lena le nea leia e fai loa ki le toe totogi o tagata uluaki ala na fakalaka i le kau Levi.

⁴⁹ Na tanaki loa e Moisese le paaga ki le toe totogi o latou ala na leaise fetogi e le kau Levi.

⁵⁰ Ti na maua loa e ia mei vosa uluaki o Iselaele le afe kau lelau tolu kau ono tupu lima (1 365) fa piesi paaga,

⁵¹ Ti na tuku loa e ia le paaga lena kia Alone mo ona vosa, o mulimuli ki le fakatotonu leia kua tuku e le Eteleno.