Numelo 29 - Tosi Tapu

Aso o le Kalaga

¹ I le uluaki aso o le masina fitu, e kotou fai loa se fakatasi tapu : E leaise kotou fai loa se gaoi fakamalama. E fakasa loa le aso lena ki le leo makeke o fakatagi pupusi.

² E kotou momoli loa se failaulau, ko se nea manogi a ia ki le Eteleno, ko se pipi tagata e tasi, mo se ovi tagata e tasi, ti mo ni akeno fetuu taki tasi e fitu : e lotou lee mele fuli loa.

³ E kotou fakapipiki loa ki ai le moliga falina mea leia kua lusi fakatasi mo le lolo : ko ni kilo falina e iva ki le pipi tagata e tasi, mo ni kilo falina e ono ki le ovi tagata e tasi,

⁴ ti mo ni kilo falina e tolu ki le akeno e tasi o akeno e fitu.

⁵ E kotou momoli loa se koti tagata e tasi i se sakilifisio ki le fakamalie, ke fai ai le fakamalie kia koutou.

⁶ E kotou momoli loa a sakilifisio ana, o fakalasi ai le failaulau mo le moliga o le masina taki tasi, mo le failaulau o le aso taki tasi mo lona moliga nea kai, mo lona lipasio ala e pipiki kia latou. Ko ni sakilifisio tutu latou e le afi, ko se nea manogi a ia ki le Eteleno.

Aso o le Fakamolemole o agasala

⁷ I le aso kau agafulu o le fitu o masina, e kotou fai loa se fakatasi tapu, ti e kotou sesunio loa, ti e leaise kotou fai loa se gaoi fakamalama.

⁸ E kotou momoli loa se failaulau, ko se nea manogi a ia ki le Eteleno, ko se pipi tagata e tasi, mo se ovi tagata e tasi, ti mo ni akeno fetuu taki tasi e fitu : e lotou lee mele fuli loa.

⁹ E kotou fakapipiki loa ki ai le moliga falina mea leia kua lusi fakatasi mo le lolo : ko ni kilo falina e iva ki le pipi tagata e tasi, mo ni kilo falina e ono ki le ovi tagata e tasi,

¹⁰ ti mo ni kilo falina e tolu ki le akeno e tasi o akeno e fitu.

¹¹ E kotou momoli loa se koti tagata e tasi i se sakilifisio ki le fakamalie, o fakalasi ai le sakilifisio fakamalie masani, mo le failaulau o aso taki tasi ti mo lona moliga nea kai, ti mo lipasio masani.

Aso o Falepola

¹² I le aso kau agafulu tupu lima o le masina fitu, e kotou fai loa se fakatasi tapu : e leaise kotou fai loa se gaoi fakamalama. E kotou fai loa se aso fakafiafia ki le Eteleno, i le lolotoga o ni aso e fitu.

¹³ I le uluaki aso e kotou momoli loa ki le Eteleno se failaulau tutu e le afi, ko se nea manogi a ia ki le Eteleno : ko ni pipi tagata muli e kau agafulu tupu tolu, mo ni ovi tagata e lua, ti mo ni akeno e kau agafulu tupu fa : e lotou lee mele fuli loa.

¹⁴ E kotou fakapipiki loa ki ai le moliga falina mea leia kua lusi ki le lolo : ko ni kilo falina e iva ki le pipi tagata e tasi o pipi tagata e kau agafulu tupu tolu, mo ni kilo falina e ono ki le ovi tagata e tasi o ovi tagata e lua,

¹⁵ ti mo ni kilo falina e tolu ki le akeno e tasi o akeno e kau agafulu tupu fa.

¹⁶ E kotou momoli loa se koti tagata i se sakilifisio fakamalie, o fakalasi ai le failaulau o le aso taki tasi, mo lona moliga falina mo lona lipasio.

¹⁷ I le lua o aso, e kotou momoli loa ni pipi tagata muli e kau agafulu tupu lua, mo ni ovi tagata e lua, ti mo ni akeno fetuu tasi e kau agafulu tupu fa, ala e lee mele fuli loa,

¹⁸ mo le moliga falina mo lipasio ki pipi tagata, mo ovi tagata, mo akeno, o fai ki le lasi o manu, o fakalogo ki lekula ala kua fakatuu.

¹⁹ E kotou momoli loa se koti tagata e tasi ki le sakilifisio fakamalie, o fakalasi ai le failaulau masani o le aso taki tasi, mo lona moliga falina mo lona lipasio.

²⁰ I le tolu o aso, e kotou momoli loa ni pipi tagata muli e kau agafulu tupu tasi, mo ni ovi tagata e lua, ti mo ni akeno fetuu taki tasi e kau agafulu tupu fa, ala e lee mele fuli loa,

²¹ mo le moliga falina mo lipasio ki pipi tagata, mo ovi tagata, ti mo akeno, o fai ki le lasi o manu, o fakalogo ki lekula ala kua fakatuu.

²² E kotou momoli loa se koti tagata e tasi ki le sakilifisio fakamalie, o fakalasi ai le failaulau masani o le aso taki tasi, mo lona moliga falina mo lona lipasio.

²³ I le fa o aso, e kotou momoli loa ni pipi tagata muli e kau agafulu, mo ni ovi tagata e lua, ti mo ni akeno fetuu taki tasi e kau agafulu tupu fa ala e lee mele fuli loa,

²⁴ mo le moliga falina mo lipasio ki pipi tagata, mo ovi tagata, mo akeno, o fai ki le lasi o manu, o fakalogo ki lekula ala kua fakatuu.

²⁵ E kotou momoli loa se koti tagata e tasi ki le sakilifisio fakamalie, o fakalasi ai le failaulau masani o le aso taki tasi, mo lona moliga falina mo lona lipasio.

²⁶ I le lima o aso, e kotou momoli loa ni pipi tagata muli e iva, mo ni ovi tagata e lua, mo ni akeno fetuu taki tasi e kau agafulu tupu fa ala e lee mele fuli loa,

²⁷ mo le moliga falina mo lipasio ki pipi tagata, mo ovi tagata, mo akeno, o fai ki le lasi o manu, o fakalogo ki le lekula leia kua fakatuu.

²⁸ E kotou momoli loa se koti tagata e tasi ki le sakilifisio fakamalie, o fakalasi ai le failaulau masani o le aso taki tasi, mo lona moliga falina mo lona lipasio.

²⁹ I le ono o aso, e kotou momoli loa ni pipi tagata muli e valu, mo ni ovi tagata e lua, mo ni akeno fetuu taki tasi e kau agafulu tupu fa ala e lee mele fuli loa,

³⁰ mo le moliga falina mo lipasio ki pipi tagata, mo ovi tagata, mo akeno, o fai ki le lasi o manu, o fakalogo ki le lekula leia kua fakatuu.

³¹ E kotou momoli loa se koti tagata e tasi ki le sakilifisio fakamalie, o fakalasi ai le failaulau masani o le aso taki tasi, mo lona moliga falina mo lona lipasio.

³² I le fitu o aso, e kotou momoli loa ni pipi tagata muli e fitu, mo ni ovi tagata e lua, mo ni akeno fetuu taki tasi e kau agafulu tupu fa ala e lee mele fuli loa,

³³ mo le moliga falina mo lipasio ki pipi tagata, mo ovi tagata, mo akeno, o fai ki le lasi o manu, o fakalogo ki lekula leia kua fakatuu.

³⁴ E kotou momoli loa se koti tagata e tasi ki le sakilifisio fakamalie, o fakalasi ai le failaulau masani o le aso taki tasi, mo lona moliga falina, mo lona lipasio.

³⁵ I le valu o aso, ko le aso fakaoki a ia o le fakatasi lasi, e leaise kotou fai loa se gaoi fakamalama.

³⁶ E kotou momoli loa ki le Eteleno se failaulau tutu e le afi, ko se nea manogi a ia ki le Eteleno : ko se pipi tagata e tasi, mo se ovi tagata e tasi, mo ni akeno fetuu taki tasi e fitu ala e lee mele fuli loa,

³⁷ mo le moliga falina mo lipasio ki le pipi tagata, mo le ovi tagata, mo akeno, o fai ki le lasi o manu, o fakalogo ki lekula leia kua fakatuu.

³⁸ E kotou momoli loa se koti tagata e tasi ki le sakilifisio fakamalie, o fakalasi ai le failaulau masani o le aso taki tasi, mo lona moliga falina, mo lona lipasio.

³⁹ Ko na a sakilifisio ala e kotou momoli loa ki le Eteleno i okoutou aso lalasi, o fakalasi ai a failaulau, mo moliga falina, mo lipasio, mo sakilifisio fakafetai, ala e kotou fai i lokoutou loto malie, pe ke fakasoko ai se fakapapau.