Numelo 28 - Tosi Tapu

Temi fai o sakilifisio

¹ Na masau loa le Eteleno kia Moisese, o pati : Tuku le fakatotonu leinei ki fanau a Iselaele, o ke pati kia latou :

² Kotou tokaga loa o aumai kiate au, i olatou temi totonu, loku moliga, le nea kai o aku sakilifisio tutu e le afi, ala e manogi malie kiate au.

³ E ke pati loa kia latou : Ko leinei le sakilifisio tutu e le afi leia e kotou momoli loa ki le Eteleno : i aso fuli, ko akeno fetuu taki tasi e lua mo lee mele, ofaipe se failaulau leia e fai sosoko.

⁴ E ke momoli loa le tasi akeno i le usu, ti ko le tasi akeno i le afiafi,

⁵ mo le moliga nea kai, ko ni kilo falina e tolu ala kua lusi fakatasi mo se liti lolo olive mea e tasi mo se vaelua.

⁶ Ko le sakilifisio a ia o le aso taki tasi, leia e tatau mo le sakilifisio leia na fai ki le Eteleno i le mauga ko Sinai : Ko se sakilifisio tutu a ia, ko se nea manogi malie ki le Eteleno.

⁷ Ko lona lipasio (moliga nea inu) ko se liti vino e tasi mo se vaelua ki le akeno taki tasi : e ke fai loa le lipasio ki le Eteleno i le sagatualio.

⁸ E ke momoli loa le lua o akeno i le afiafi, mo se moliga nea kai, mo se moliga nea inu, ofaipe le usu ; ko se sakilifisio tutu a ia e le afi, ko se nea manogi ki le Eteleno.

Aso o le sapato

⁹ I le aso o le sapato, e kotou momoli loa ni akeno e lua ala e fetuu taki tasi mo lee mele, mo se moliga nea kai ko kilo falina e ono ala kua lusi fakatasi mo le lolo, ti mo se moliga nea inu.

¹⁰ Ko le failaulau tutu a ia o le sapato, ki sapato taki tasi, kae kese fai le failaulau tutu o aso taki tasi mo le lipasio.

Uluaki aso o le masina

¹¹ I le uluaki aso o masina fuli, e kotou momoli loa ki le Eteleno, se failaulau ko ni pipi tagata e lua, mo se ovi tagata e tasi, mo ni akeno fetuu taki tasi e fitu, ko manu fuli ana e tonu ke lee mele.

¹² Ko le moliga nea kai ki le pipi tagata taki tasi, ko kilo falina e iva ala kua lusi fakatasi mo le lolo ; ko le moliga nea kai ki ovi tagata taki tasi, ko kilo falina e ono ala kua lusi fakatasi mo le lolo ;

¹³ ko le moliga nea kai ki le akeno taki tasi, ko kilo falina e tolu ala kua lusi fakatasi mo le lolo. Ko se failaulau tutu a ia e le afi, ko se nea manogi ki le Eteleno.

¹⁴ Ko lipasio ko liti vino e tolu ki le pipi tagata e tasi, mo liti vino e lua ki le ovi tagata e tasi, ti mo le liti vino e tasi mo le vaelua ki le akeno e tasi. Ko le failaulau a ia o le kamataaga o le masina, ki le masina taki tasi i masina fuli o le fetuu.

¹⁵ E momoli loa ki le Eteleno se koti tagata, i se sakilifisio o le fakamalie, o toe fakalasi ai le failaulau o le aso taki tasi mo lona lipasio.

Aso o le Pasikate

¹⁶ Ko le aso kau agafulu tupu fa o le uluaki masina, ko le Pasikate loa a ia o le Eteleno.

¹⁷ Ko le aso kau agafulu tupu lima o le masina lena ko se aso fakafiafia loa a ia. E kai loa i aso e fitu ni pane sala fakatupu.

¹⁸ I le uluaki aso o le temi lena, e fai loa se fakatasi tapu : e leaise kotou fai loa se gaoi fakamalama.

¹⁹ E kotou momoli loa se failaulau ki le Eteleno, ko se failaulau tutu e le afi, ko ni pipi tagata e lua, mo se ovi tagata e tasi, ti mo ni akeno fetuu taki tasi e fitu, e lotou lee mele fuli loa.

²⁰ E kotou fakapipiki loa ki manu ana le moliga falina mea leia kua lusi fakatasi mo le lolo : ko kilo falina e iva ki le pipi tagata e tasi, mo kilo falina e ono ki le ovi tagata e tasi,

²¹ ti mo kilo falina e tolu ki le akeno e tasi o akeno e fitu.

²² E kotou toe ave foki se koti tagata e tasi ki le sakilifisio o le fakamalie, ke fai ai le fakamalie kia koutou.

²³ E kotou momoli loa a sakilifisio ana, o fakalasi ai le failaulau masani o le usu, leia e tonu ke fai tuumau i aso taki tasi.

²⁴ E kotou momoli loa latou i le aso taki tasi, lolotoga o aso e fitu, ofaipe le nea kai o se sakilifisio tutu e le afi, ko se nea manogi a ia ki le Eteleno. E momoli loa latou, o fakalasi ai le failaulau masani o le usu mo lona lipasio.

²⁵ Ko le fitu o aso, e kotou fai loa se fakatasi tapu : e leaise kotou fai loa se gaoi fakamalama.

Aso o le Penikosite

²⁶ Ko le aso o uluaki fua, leia e kotou ave ai loa se moliga ki le Eteleno, i magiti o le taukai foou, e kotou fai loa se fakatasi tapu, ti e leaise kotou fai loa se gaoi fakamalama.

²⁷ E kotou momoli loa se failaulau, ko se nea manogi a ia ki le Eteleno, ko ni pipi tagata e lua, mo se ovi tagata e tasi, ti mo ni akeno fetuu taki tasi e fitu.

²⁸ E kotou fakapipiki loa ki ai le moliga falina mea leia kua lusi fakatasi mo le lolo : ko kilo falina e iva ki le pipi tagata e tasi, mo kilo falina e ono ki le ovi tagata e tasi,

²⁹ ti mo kilo falina e tolu ki le akeno e tasi o akeno e fitu.

³⁰ E kotou momoli loa se koti tagata e tasi, ke fai ai le fakamalie kia koutou.

³¹ E kotou momoli loa a sakilifisio ana, o fakalasi ai le failaulau o le aso taki tasi mo lona moliga nea kai. E kotou momoli loa ni akeno lee mele, mo olatou lipasio.