Numelo 27 - Tosi Tapu

Lao o tofiga

¹ Ko taineliki o Selofati, vosa o Epele, vosa o Kalaate, vosa o Makile, vosa o Manase, vosa o Sosefo, ti ko olatou igoa : ko Mala, mo Noa, mo Okala, mo Milika, mo Tilitesa,

² Na ano loa o tutuu i mua o Moisese, mo le tagata faisakilifisio ko Eleasale, mo le kau tagata pule ti mo le kakai katoa, i le uluaga o le falela tapu. Na lotou pati loa :

³ Na mate lomatou tamana i le toafa ; na leaise kau a ia i le fakatasi a latou ala na agatuu ki le Eteleno, i le fakatasi a Kole, kae na mate a ia ki lana agasala, ti na leaise maua e ia se vosa.

⁴ Kolea e tuuti ai loa le igoa o lomatou tamana mei loto malie o lona famili, talie na leaise maua e ia se vosa ? Soli mai kia matou se tofiga i fetaina o lomatou tamana.

⁵ Na ave loa e Moisese lalatou tagi ki mua o le Eteleno.

⁶ Ti na pati loa le Eteleno kia Moisese :

⁷ E tonu taineliki o Selofate. Ke ke soli loa kia latou se tofiga i loto malie o fetaina o lolatou tamana, talie ko latou ala e maua ia loa le tofiga o lolatou tamana.

⁸ E ke masau loa ki fanau a Iselaele, ti ke pati loa : Ka mate loa se tagata kae na leaise maua e ia sona vosa, e kotou soli loa lona tofiga ki lona taine.

⁹ Ti kapau e leaise maua e ia sona taine, ti e kotou soli loa lona tofiga ki ona fetaina.

¹⁰ Ti kapau e leaise maua e ia ni ona fetaina, ti e kotou soli loa lona tofiga ki taina o lona tamana.

¹¹ Ti kapau e leaise maua e ia ni taina o lona tamana, ti e kotou soli loa lona tofiga ki lona kaiga leia e ofi lasi mo ia i lona famili. Ko ia leia e tonu ke maua ia loa lona tofiga. Ko le fakatuutuu lena e tonu ke mulimuli ki ai a fanau a Iselaele, talie ko le nea lena kua fakatotonu e le Eteleno kia Moisese.

Fakatio o Moisese ki le fenua

¹² Na pati loa le Eteleno kia Moisese : Pale ki le mauga lena o Apalimi, o tio ki le fenua leia kua kau soli ki fanau a Iselaele.

¹³ E ke tio loa ki ai, kae ko koe foki, e tanaki loa a koe ki lou kakai, ofaipe lou taina ko Alone ;

¹⁴ talie na kolua agatuu ki laku fakatotonu, i le toafa o Sini, i le aso leia na fakatupu fefele ai le kakai kiate au : Na leaise kolua fakasa loku maokioki i mata o fanau a Iselaele, i le aso leia na lotou tagi ai ki se vai. Ko vai ana o Melipa, vai o fefele, i Katesi, i le toafa o Sini.

Filifili o Sosue ke fetogi ia Moisese

¹⁵ Na masau loa Moisese ki le Eteleno, o pati :

¹⁶ Ke alofa le Eteleno, ko le Atua o laumalie o nea fuli ala kua fakatupu, o fakanofo se tagata i le ulu o le kakai,

¹⁷ leia ke pule kiate ia, ti ke poto i lona taki i nea fuli, o tupu ke aua na fai le kakai a le Eteleno pe se kau manu leia e sala tagata tausi manu.

¹⁸ Na pati loa le Eteleno kia Moisese : Too Sosue, vosa o Nune, ko se tagata leia e nofo ai loku Laumalie ; ti ke teki loa lou lima kiate ia.

¹⁹ E ke fakatuu loa a ia ki mua o le tagata faisakilifisio ko Eleasale mo le kakai katoa, ti ke fakanofo loa a ia ko lou fetogi i olatou mua.

²⁰ E ke tuku loa kiate ia se koga o lou pule, o tupu ke fakalogo kiate ia fanau fuli a Iselaele.

²¹ E tuu loa a ia i mua o le tagata faisakilifisio ko Eleasale, leia e afa ia loa kiate ia le fakamaau a le Ulimi. Ti ko Sosue, mo fanau fuli o Iselaele mo ia, ti mo le fakatasi katoa, e mavae loa i le fakatotonu a Eleasale ti e ulu loa i lana fakatotonu.

²² Na fai loa e Moisese le nea leia na fakatotonu e le Eteleno kiate ia. Na too loa e ia Sosue, o fakatuu i mua o le tagata faisakilifisio ko Eleasale mo mua o le fakatasi katoa.

²³ Na teki loa e ia ona lima kia Sosue, o tuku kiate ia ni fakatotonu, o mulimuli ki le nea leia na fakasa e le Eteleno kia Moisese.