Numelo 26 - Tosi Tapu

Tosi tua lua o fanau o Iselaele

¹ I le oki o le malaia lena, na pati loa le Eteleno kia Moisese mo Eleasale, vosa o le tagata faisakilifisio ko Alone :

² Ke kolua fai le tosi o fanau a Iselaele, o lau i famili, a tagata fuli ala kua fetuu kau lua o fai ki aluga, latou fuli ala kua aoga ki le tau.

³ Na masau loa Moisese mo le tagata faisakilifisio ko Eleasale kia latou i le fenua o Moape, i tafa o le Solotane, i mua o Seliko. Na la pati loa :

⁴ E fai loa le tosi o le kakai mei le fetuu kau lua ki aluga, o mulimuli ki le fakatotonu leia na tuku e le Eteleno kia Moisese mo vosa o Iselaele, i lalatou mavae i le fenua o Esipito.

⁵ Ko Lupeni, uluaki o Iselaele. Ko vosa o Lupeni : Ko Enoke leia e ifo mei ai le famili o le kau Enoke ; mo Palu, leia e ifo mei ai le famili o le kau Palu ;

⁶ mo Eselone, leia e ifo mei ai le famili o le kau Eselone ; mo Kalami, leia e ifo mei ai le famili o le kau Kalami.

⁷ Ko famili ana o le kau Lupeni : ko latou ala na tosi ko tino fa tupu tolu afe mo tino lelau e fitu mo le tino tolu (43 730).

⁸ Ko le vosa o Palu : Ko Eliape.

⁹ Ko vosa o Eliape : ko Nemuele, mo Tatane, mo Apilame. Ko le Tatane lena mo le Apilame lena, ala na kau ia latou ala na fonofono, ti ko laua ala na taki ia le kakai ke fakafesagai kia Moisese mo Alone, i le fakatasi a Kole, i le aso leia na lotou agatuu ai ki le Eteleno.

¹⁰ Na fakamavaa loa e le kele lona gutu, o folo laua mo Kole, i le aso leia na mate ai latou ala na fakatasi, ti na tutu ai e le afi ni tagata e tino lelau lua tino lima (250) : Ko se valoki lena na fai ki le kakai.

¹¹ Na leaise mate loa a vosa o Kole i le nea lena.

¹² Ko vosa o Simeone, o mulimuli ki olatou famili : ko Nemuele leia e ifo mei ai le famili o le kau Nemuele ; mo Sakine, leia e ifo mei ai le famili o le kau Sakine ;

¹³ mo Selake, le famili o le kau Selake ; mo Saulo, le famili o le kau Saulo.

¹⁴ Ko famili ana o Simeone : ko le tino lua tupu lua afe tino lelau (22 200).

¹⁵ Ko vosa o Kate, o mulimuli ki olatou famili : ko Sefoni leia e ifo mei ai le famili o le kau Sefoni ; mo Aki, le famili o le kau Aki ; mo Suni, le famili o le kau Suni ;

¹⁶ mo Osini, le famili o le kau Osini ; mo Eli, le famili o le kau Eli ;

¹⁷ mo Alote, le famili o le kau Alote ; mo Aleele, le famili o le kau Aleele.

¹⁸ Ko famili ana o vosa o Kate, ala na kau i le tosi, ko le tino fa afe tino lelau lima (40 500).

¹⁹ Ko vosa o Suta : ko Ele mo Onane ; kae na mate loa Ele mo Onane i le fenua o Kanaane.

²⁰ Ko nei a vosa o Suta o mulimuli ki olatou famili : ko Sela leia e ifo mei ai le famili o le kau Sela ; mo Pelesi, le famili o le kau Pelesi ; mo Selake, le famili o le kau Selake.

²¹ Ko vosa o Pelesi : ko Eselone, leia e ifo mei ai le famili o le kau Eselone ; mo Amule, leia e ifo mei ai le famili o le kau Amule.

²² Ko famili ana o Suta, ala na kau i le tosi : ko le tino fitu tupu ono afe mo tino lelau e lima (76 500).

²³ Ko vosa o Isakale, o mulimuli ki olatou famili : ko Tola leia e ifo mei ai le famili o le kau Tola ; mo Puva, le famili o le kau Puva ;

²⁴ mo Sasupe, le famili o le kau Sasupe ; mo Similone, le famili o le kau Similone.

²⁵ Ko famili ana o Isakale, ala na kau i le tosi : ko le tino ono tupu fa afe tino lelau tolu (64 300).

²⁶ Ko vosa o Sapulone, o mulimuli ki olatou famili : Ko Seleti leia e ifo mei ai le famili o le kau Seleti ; mo Eloni, le famili o le kau Eloni ; mo Saleele, le famili o le kau Saleele.

²⁷ Ko famili ana o le kau Sapulone, ala na kau i le tosi : ko le tino ono afe tino lelau lima (60 500).

²⁸ Ko vosa o Sosefo, o mulimuli ki olatou famili : Ko Manase mo Efalaimi.

²⁹ Ko vosa o Manase : ko Makile, leia e ifo mei ai le famili o le kau Makile. Na tupu meia Makile a Kalaate. Ko Kalaate leia e ifo mei ai le famili o le kau Kalaate.

³⁰ Ko nei a vosa o Kalaate : ko Sesele, leia e ifo mei ai le famili o le kau Sesele ; mo Eleki, le faasiga o le kau Eleki ;

³¹ mo Asiliele, le famili o le kau Asiliele ; mo Siseme, le famili o le kau Siseme ;

³² mo Semita, le famili o le kau Semita ; mo Efele, le famili o le kau Efele.

³³ Ko le vosa o Efele ko Selofati. Na leaise maua e Selofati se vosa, kae ko ni taineliki ata. Ko nei a igoa o taineliki o Selofati : Ko Masela, mo Noa, mo Okala, mo Milika, mo Tilitesa.

³⁴ Ko famili ana o Manase, ala na kau i le tosi : ko le tino lima tupu lua afe mo tino lelau e fitu (52 700).

³⁵ Ko nei vosa o Efalaimi, o mulimuli ki olatou famili : Ko Sutela leia e ifo mei ai le famili o le kau Sutela ; mo Pekeli, le famili o le kau Pekeli ; mo Taani, le famili o le kau Taani.

³⁶ Ko nei a vosa o Sutela : ko Elani, leia e ifo mei ai le famili o le kau Elani.

³⁷ Ko famili ana o vosa o Efalaimi, ala na kau i le tosi : ko le tino tolu tupu lua afe mo tino lelau e lima (32 500). Ko vosa ana o Sosefo, o mulimuli ki olatou famili.

³⁸ Ko vosa o Pesamino, o mulimuli ki olatou famili : ko Pela leia e ifo mei ai le famili o le kau Pela ; mo Asipeli, le famili o le kau Asipeli ; mo Asilami, le famili o le kau Asilami ;

³⁹ mo Sufame, le famili o le kau Sufame ; mo Ufame, le famili o le kau Ufame.

⁴⁰ Ko vosa o Pela, ko Alete mo Naamane : ko Alete leia e ifo mei ai le famili o le kau Alete ; mo Naamane, le famili o le kau Naamane.

⁴¹ Ko vosa ana o Pesamino, o mulimuli ki olatou famili, ala na kau i le tosi : ko le tino fa tupu lima afe mo tino lelau e ono (45 600).

⁴² Ko nei vosa o Tane, o mulimuli ki olatou famili : ko Suami leia e ifo mei ai le famili o le kau Suami. Ko famili ana o Tane, o mulimuli ki olatou famili.

⁴³ Ko le fakatasi o famili o le kau Suami, ala na kau i le tosi : ko le tino ono tupu fa afe mo tino lelau e fa (64 400).

⁴⁴ Ko vosa o Asele, o mulimuli ki olatou famili : ko Simina leia e ifo mei ai le kau Imina ; mo Sisevi, le famili o le kau Sisevi ; mo Pelia, le famili o le kau Pelia.

⁴⁵ Ko vosa o Pelia, ko Epele leia e ifo mei ai le famili o le kau Epele ; mo Malekiele, le famili o le kau Malekiele.

⁴⁶ Ko le igoa o le taine o Asele ko Sela.

⁴⁷ Ko famili ana o vosa o Asele, ala na kau i le tosi : ko le tino lima tupu tolu afe mo tino lelau e fa (53 400).

⁴⁸ Ko vosa o Nefetali, o mulimuli ki olatou famili : ko Sateseele leia e ifo mei ai le famili o le kau Sateseele ; mo Kuni, le famili o le kau Kuni ;

⁴⁹ mo Setesele, le famili o le kau Setesele ; mo Silemi, le famili o le kau Silemi.

⁵⁰ Ko famili ana o vosa o Nefetali, o mulimuli ki olatou famili, ala na maua i le tosi : ko tino fa tupu lima afe tino lelau fa (45 400).

⁵¹ Ko le api lena o fanau o Iselaele ala na maua loa i le tosi : ko tino lelau ono tupu tasi afe mo tino lelau fitu tino tolu (601 730).

Fakatotonu ki le vae o le fenua

⁵² Na masau loa le Eteleno kia Moisese, o pati :

⁵³ E vae loa le fenua kia latou, ke lotou maua tofiga a ia, o mulimuli ki le lasi o igoa.

⁵⁴ E ke soli loa kia latou ala e api se tofiga lasi, ti e ke soli loa kia latou ala e teiki se tofiga ikiiki ; e soli loa le tofiga o fuafua ki le api o le kakai i le tosi kaiga.

⁵⁵ Kae e fai loa le vae o le fenua ki le toso ; e lotou maua loa a ia o mulimuli ki igoa o faasiga o olatou tamana.

⁵⁶ Ko le toso leia e soli ia loa a tofiga i le fenua, o fakatatau ki le api mo le teiki o le faasiga.

⁵⁷ Ko nei le kau Levi leia na tosi loa, o mulimuli ki olatou famili : ko Kelesoni leia e ifo mei ai le famili o le kau Kelesoni ; mo Keati, le famili o le kau Keati ; mo Melali, le famili o le kau Melali.

⁵⁸ Ko nei famili o Levi : ko le famili o le kau Lipine, mo le famili o le kau Epelone, mo le famili o le kau Mali, mo le famili o le kau Musi, mo le famili o le kau Kole. Na tupu loa Amilame meia Keati.

⁵⁹ Ko le igoa o le avaga o Amilame ko Sokepeti, taine o Levi, leia na tupu loa kia Levi i Esipito ; na fanaui loa e Sokepeti kia Amilame a Alone, mo Moisese, mo Miliamu, lola tuagaane.

⁶⁰ Na tupu loa kia Alone : a Natape, mo Apiu, mo Eleasale, mo Itamale.

⁶¹ Na mate loa Natape mo Apiu, i le aso leia na la momoli ai ki le Eteleno se afi kese.

⁶² Ko latou fuli ala na tosi loa, a tagata fuli mei le masina tasi o fai ki aluga, ko le 23 000. Na leaise tosi loa latou i le tosi o fanau a Iselaele, talie na leaise tonu loa ke soli kia latou se tofiga ofaipe la ake fanau a Iselaele.

⁶³ Ko le api lena o fanau fuli a Iselaele ala na tosi loa e Moisese mo le tagata faisakilifisio ko Eleasale i le fenua o Moape, i tafa o le Solotane, i mua o Seliko.

⁶⁴ Ia latou ana, na leaise maua fua se fa toka tasi o fanau a Iselaele ala na tosi e Moisese mo le tagata faisakilifisio ko Alone i le toafa o Sinai.

⁶⁵ Talie na pati le Eteleno : E lotou mamate loa i le toafa, ti e leaise toe loa se fa toka tasi, gato fai kia Kalepo, vosa o Sefune, mo Sosue, vosa o Nune.