Numelo 25 - Tosi Tapu

Tausi fakavale i le fenua o Moape

¹ Na nofo loa Iselaele i Sitime ; ti na kamata fai feauaki loa le kakai ki taineliki o Moape.

² Na fakaafe loa e taineliki le kakai ki sakilifisio ki atua o Moape ; ti na kai loa le kakai, ti na punou loa a ia i mua olatou atua.

³ Na pipiki loa Iselaele kia Paale-Peoli, ti na mu loa le sausau o le Eteleno ki Iselaele.

⁴ Na pati loa le Eteleno kia Moisese : Fakatasii a pule fuli o le kakai, ti ke tautau latou ala kua agasala i mua o le Eteleno, o fakatio latou ki le laa, o tupu ke maliu kese le sausau o le Eteleno i Iselaele.

⁵ Na pati loa Moisese ki tui fakamaau o Iselaele : Ke tasi tamate e le tagata o koutou latou o lona kakai ala kua pipiki kia Paale-Peoli.

⁶ Ti ko leinei, na au se tagata Iselaele, o aumai ki ona fetaina se fafine Matiane i mata o Moisese mo mata o le fakatasi katoa o fanau a Iselaele, ala na fetagisi i le uluaga o le falela tapu.

⁷ I le tio ki ai a Finesi, vosa o Eleasale, vosa o le pule faisakilifisio ko Alone, na malaga ake loa a ia ki aluga i loto malie o le kakai, ti na too loa e ia se tao i lona lima.

⁸ Na mulii loa e ia le tagata Iselaele o kaku ki lona falela, ti na tooi loa e ia laua toka lua ki le tao, le tagata Iselaele mo le fafine, i le lalo manava. Ti na taofi ai loa le malaia i fanau a Iselaele.

⁹ Ko latou ala na mamate i le malaia lena ko le tino lua tupu fa afe (24 000).

¹⁰ Na masau loa le Eteleno kia Moisese, o pati :

¹¹ Ko Finesi, vosa o Eleasale, vosa o le tagata faisakilifisio lasi ko Alone, na fakamaliu ia loku sausau mei fanau a Iselaele, talie na fakasa e ia le finenonofo o lona Atua i loto malie o fanau a Iselaele ; koia na leaise kau tamate ai latou, i loku finenonofo.

¹² Koia ke ke pati ai loa kiate ia : E kau soli kiate ia loku sai o le tokamalie.

¹³ Ko le sai lena kiate ia mo lona sakoga, leia e lotou liliu ai ko ni tagata faisakilifisio o lee gato, talie na fakasa e ia lona alofa ki lona Atua ti na fai e ia le fakamalie ki fanau a Iselaele.

¹⁴ Ko le tagata o Iselaele leia na tamate fakatasi mo le fafine Matiane ko Simeli, vosa o Salu, ko le pule o se famili i le faasiga o Simeone.

¹⁵ Ko le igoa o le fafine Matiane leia na tamate ko Kosepi, taine o Tesule, ko se pule o ni famili mauke o le faasiga o Matiane.

¹⁶ Na masau loa le Eteleno kia Moisese, o pati :

¹⁷ Taui le kau Matiane ofaipe ni fili, ti ke tamate latou !

¹⁸ Talie na lotou fai fakapikoi kia koutou ofaipe ni fili, i le faiganea o Peoli, mo le faiganea o Kosepi, taine o se pule o Matiane, lolatou tuagaane, leia na tamate i le aso o le malaia leia na soko loa i le faiganea o Peoli.