Numelo 24 - Tosi Tapu

¹ Na matala loa a Palaame kua malie ki le Eteleno ke tapuaki ki Iselaele ; ti na leaise toe ano loa a ia o afa se puleaki ke toe sa ake ai le Eteleno kiate ia, ofaipe la ake faiaga i mua. Kae na maliu loa ona mata ki le fetuu o le toafa.

² Na siki ake loa a mata o Palaame, ti na tio loa a ia ki Iselaele leia kua nofo i faasiga. Ti na ifo loa le Laumalie o le Atua kiate ia.

³ Na fai loa e Palaame le masau fakatata, o pati : Ko leinei le folafola a Palaame, vosa o Peoli ! Ko leinei le folafola a le tagata leia e tio malama !

⁴ Ko leinei le folafola a le tagata leia e logo ki folafola a le Atua, A leia e tio ki le tio a le Mafimafi, A leia e punou kae mavaa ona mata.

⁵ E fulumalie ai ou falela, ei Sakopo ! Ou nofoaga, ei Iselaele !

⁶ E lotou mafolafola ofaipe ni vaivailiua, Ofaipe ni oloto e ofi ki se vaitafe, Ofaipe ni aloese na to e le Eteleno, Ofaipe ni sete i tafa o se vai.

⁷ E sali le vai mei ona pakete, Ti e fakavai lona pulapula e ni atu vai lalasi. E malaga lona sau o taualuga ake ia Akake, Ti e liliu lona puleaga o makeke.

⁸ Na fakamavae a ia e le Atua mei Esipito, Ti e fai a ia kiate ia pe le makeke o le pipi vao. E kai e ia a puleaga ala e malaga kiate ia, E gugu e ia olatou ivi, ti e tamate e ia latou ki ana gasau.

⁹ E peluki e ia ona tuli, ti e moe a ia ofaipe se laione tagata, ofaipe se laione fafine : Ko ai e toe fakatuu ia loa a ia ki aluga ? Ke tapuakina leia e tapuaki loa kiate koe, Ti ke malaia leia e fakamalaia loa a koe !

¹⁰ Na mu loa le ita o Palake kia Palaame ; ti na pasipasi loa e ia ona lima, o pati kia Palaame : Na kau aumai a koe ki leinei ke ke fakamalaia oku fili, ti ko leinei, kua tua tolu loa lau tapuaki kiate ia !

¹¹ Sola nei, ano ki lou kaiga ! Na kau pati ke kau tuku loa kiate koe ni fakapale, kae kua taofi a koe e le Eteleno ke aua na ke tali latou !

¹² Na tali loa Palaame kia Palake : Pe na leaise kau masau ki tagata ala na ke kakau mai kiate au, o pati :

¹³ Pe soli mai foki e Palake kiate au lona fale leia kua apele i le paaga mo le aulo, e leaise kau mafai ia fua le fetogi o se ganea uvikipogi e tasi i fakatotonu a le Eteleno ; e kau fakasa ia loa le nea leia e pati loa ki ai le Eteleno !

¹⁴ Ti ko leinei e kau toe liliu loa ki loku kakai. Kae i mua, au, ke kau fakasa fakatomua atu kiate koe le nea leia e fai loa e fanau a Iselaele ki lou kakai i temi ki muli.

Kikite ki le puleaga o le Mesia

¹⁵ Na fai loa e Palaame lana folafola fakatata, o pati : Ko leinei le folafola a Palaame, vosa o Peoli, Ko leinei le folafola fakatata a le tagata leia e tio malama,

¹⁶ Ko leinei le folafola a leia e logo ki folafola a le Atua, A leia e iloa ia a fakatuutuu loloto a le Taualuga, A leia e tio ki le tio a le Mafimafi, A leia e punou kae mavaa ona mata.

¹⁷ E kau tio ki ai, kae e leai nei ; E kau tio ki ai, kae koi mamao : E ulu se fetuu meia Sakopo, E malaga se sau i Iselaele. E taai e ia a vakavaka o Moape, Ti e tamate e ia a vosa fuli o Seti.

¹⁸ E pule a ia ki Etome, E pule a ia ki Seili, ko ona fili. E fakasa e Iselaele lona makeke.

¹⁹ Ko leia e ulu loa meia Sakopo e pule faitalisa, E tamate e ia latou ala e sosola mei kolo.

²⁰ Na tio loa Palaame kia Amaleke. Na fai loa e ia lana folafola fakatata, o pati : Ko Amaleke ko le uluaki a ia o atu puleaga, Kae e maumaui loa a ia i se aso.

²¹ Na tio loa Palaame ki le kau Kenia. Ti na fai loa e ia lana folafola fakatata, o pati : E makeke lou nofoaga, Ti e teki lou ofaga i le utu.

²² Kae e kapu loa le tagata Kenia. E ave loa a koe o fakapopulai e le kau Asilia.

²³ Na fai loa e Palaame lana folafola fakatata, o toe pati : Oiau ! Ko ai e mauli loa i le aso leia e fakanofo ai loa a ia e le Atua ?

²⁴ Kae e au loa ni vaka mei Kitimi, E lotou fakamamae loa le kau Asilia, e lotou fakamamae loa le Epeleo ; Ti e toe maumaui loa mo ia foki.

²⁵ Na tuu ake loa Palaame ki aluga, o ano, ti na toe liliu loa a ia ki lona fenua. Ti na toe liliu foki Palake ki lona fenua.