Numelo 23 - Tosi Tapu

Tapuaki a Palaame ki Iselaele

¹ Na pati loa Palaame kia Palake : ke ke fakatuu loa i leinei ni aletale e fitu kiate au, ti ke teuteui loa i leinei ni pipi tagata e fitu mo ni akeno tagata e fitu.

² Na fai loa e Palake le nea leia na pati ki ai Palaame. Ti na momoli loa e Palake mo Palaame se pipi tagata mo se ovi tagata i aletale taki tasi.

³ Na pati loa Palaame kia Palake : Tuu ke ofi ki lau failaulau, ti e kau fakamamao loa : Na saga e au loa le Eteleno o fakafelavei mai kiate au, ti e kau fakasa atu loa kiate koe le folafola leia e tuku mai loa e ia kiate au. Ti na ano loa a ia ki se ganea taualuga.

⁴ Na au loa le Atua ki mua o Palaame, ti na pati loa Palaame kiate ia : Kua kau fakatuu ni aletale e fitu, ti kua kau momoli se pipi tagata mo se ovi tagata i aluga o aletale taki tasi.

⁵ Na tuku loa e le Eteleno ni folafola ki le gutu o Palaame, o pati : Toe liliu kia Palake, ti ke masau loa o feneeki :

⁶ Na toe liliu loa Palaame kia Palake ; ti ko leinei, na tuu Palaame o feofi ki lana failaulau, a ia mo pule fuli o Moape.

⁷ Na fai loa e Palaame lana folafola fakatata, o pati : Na fakaifo mai au e Palake mei Alame, Na fakaifo mai au e le sau o Moape mei mauga o Silia. Au, o fakamalaia Sakopo ! Au, o ita ki Iselaele !

⁸ Pe feaki ke kau fakamalaia loa leia na leaise fakamalaia e le Atua ? Pe feaki ke kau ita kiate ia, kae na leaise ita le Eteleno kiate ia ?

⁹ E kau tio kiate ia mei tumutumu o utu, E kau tio kiate ia mei tumutumu o mauga liliki : Ko se kakai a ia e tuu kese lona nofoaga, Ti e leaise kau a ia ki atu puleaga.

¹⁰ Ko ai leia e mafai ke lau ia le efu o Sakopo, Ti ke fakasa ia le lasi o le vaega fa o Iselaele ? Ke kau mate i le mate o le kakai agatonu lena, Ti ke tatau loku fakaoki mo lolatou !

¹¹ Na pati loa Palake kia Palaame : Kolea le nea leia kua ke fai mai kiate au ? Na kau too a koe ke ke tuku le malaia ki oku fili, ti ko leinei, kua ke tapuakii a ia.

¹² Na tali loa Palaame, o pati : Pe leaise kau tokaga loa o fakasa le nea leia e tuku mai loa e le Eteleno ki loku gutu ?

¹³ Na pati loa Palake kiate ia : Toe au loa mo au ki se tasi ake ganea kese, leia e ke tio ai loa ki le kakai katoa o Iselaele, talie i leinei e ke tio fai ki se ga potu o le kakai. Kae mei le ganea loa lena, e ke tuku loa se malaia kiate ia.

¹⁴ Na taki loa e ia Palaame ki le faisaga a Sofimi, i le tumutumu o le mauga ko Pisika. Na fakatuu loa e ia ni aletale e fitu, ti na momoli loa e ia se pipi tagata mo se ovi tagata i aluga o aletale taki tasi.

¹⁵ Na pati loa Palaame kia Palake : Tuu i leinei, o ofi ki lau failaulau, ti e kau ano loa, o felavei mo le Atua.

¹⁶ Na au loa le Eteleno ki mua o Palaame ; ti na tuku loa e ia ni folafola ki le gutu o Palaame, o pati : Toe liliu kia Palake, ti ke masau loa kiate ia, o pati :

¹⁷ Na toe liliu loa a ia kia Palake ; ti ko leinei, na tuu Palake o ofi ki lana failaulau, mo pule o Moape. Na pati loa Palake kiate ia : Kolea le nea leia kua fakasa e le Eteleno ?

¹⁸ Na fai loa e Palaame lana folafola fakatata, o pati : Tuu ki aluga, Palake, ti ke fakalogo mai kiate au ! Fakalogo totonu mai kiate au lou taliga, vosa o Tesipoli !

¹⁹ Ko le Atua e leaise ko se tagata a ia ke loi, Pe ko se vosa a ia o le tagata ke toe fetogi manatu. Ko le nea leia kua folafola a ia ki ai, pe se fai loa e ia a ia ? Ko le nea leia kua fakapapau e ia, pe se fakasoko loa e ia a ia.

²⁰ Ko leinei, na kau tali le fakatotonu ke tapuaki : Na tapuaki a ia, e leaise kau toe fetogi loa a ia !

²¹ E leaise tio fua a ia ki se agasala ia Sakopo, E leaise tio fua a ia ki se agatuu ia Iselaele. E nofo le Eteleno, lolatou Atua, mo ia, Ko ia ko lona sau, ko le tupuaga o lona fiafia.

²² Na fakamavae latou e le Eteleno mei Esipito, E fai a ia kia latou pe le makeke o le pipi vao.

²³ E leaise mafai e nea fakatemonio se nea fua e tasi kia Sakopo, E leaise se aoga o fai kikite ki Iselaele. E lotou iloa i lona temi totonu A gaoi fuli ala e fai e le Atua kia latou.

²⁴ Ko se kakai a ia e ala ake i lana moe ofaipe se laione fafine, Ti e malaga a ia ki aluga ofaipe se laione tagata ; Koi moe a ia ki lalo mo ka kua makona a ia i le kai o le koloa o lana kapu, Ti mo ka kua mau a ia i le inu o le toto o le kau lavevea.

²⁵ Na pati loa Palake kia Palaame : Kapau e leaise ke tuku kiate ia se malaia, ti ke aua fua na ke fakaapele a ia ki ni tapuakina.

²⁶ Na tali loa Palaame, o pati kia Palake : Pe na leaise kau fakasa fakatomua atu kiate koe : e kau fai loa a nea fuli ala e pati loa ki ai le Eteleno ?

²⁷ Na pati loa Palake kia Palaame : Au loa, e kau ave loa a koe ki se tasi ake ganea kese. Lagi tali loa e le Aliki ke ke tuku ia se malaia ki le kakai leinei mei le ganea lena.

²⁸ Na ave loa e Palake a Palaame ki le tumutumu o le mauga o Peoli, leia na la tio loa i ai ki le toafa katoa.

²⁹ Na pati loa Palaame kia Palake : Fakatuu i leinei ni aletale e fitu, ti ke teuteui mai kiate au ni pipi tagata e fitu mo ni ovi tagata e fitu.

³⁰ Na fai loa e Palake le nea leia na pati Palaame ki ai, ti na momoli loa e ia se pipi tagata e tasi mo se ovi tagata e tasi i aluga o aletale taki tasi.