Numelo 22 - Tosi Tapu

Palaame mo Palake

¹ Na ano loa fanau a Iselaele, ti na lotou nonofo loa i le fenua o Moape, i le kauvai esite o le Solotane, i mua o Seliko.

² Ko Palake, vosa o Tesipoli, na tio loa ki nea fuli ala kua fai e Iselaele ki le kau Amole.

³ Ti na i lasi loa Moape ki le kakai, talie na lotou toka api ai ; ti na mamae lasi Moape o tupu ko fanau a Iselaele.

⁴ Na pati loa Moape ki le kau matua o Matiane : Ko le kakai leinei e faipe se kau pipi leia e kai i se faisaga : E lotou kai a nea fuli ala e tuu i ai. Ko Palake, vosa o Tesipoli, na sau i Moape i le temi lena.

⁵ Na kakau loa e Palake ni tagata avelogo kia Palaame, vosa o Peoli, leia na nofo i Petoli, i le kauvai o le Eufalate, i le fenua o vosa o lona kakai, o tupu ke lotou aumai a ia, ti na lotou pati kiate ia : Ko leinei, kua mavae se kakai mei Esipito, ti kua mafola a ia i le fenua katoa ; ti ko leinei kua nofo fua a ia i oku mua.

⁶ E kau kole atu kiate koe, ke ke au o tuku se malaia ki le kakai leinei, talie e api ake a ia iate au : e lagi feala ai loa ke kau malo iate ia, ti ke kau kapu a ia i loku fenua, talie e kau iloa ko leia e ke tapuaki ki ai e tapuakii loa a ia, ti ko leia e ke tuku ki ai se malaia e malaia loa a ia.

⁷ Na ano loa le kau matua o Moape, mo le kau matua o Matiane ki le fale o Palaame, mo ni nea alofa ke totogi ai le tagata fai tutuku. Na lotou kaku loa ki lona fale, ti na lotou fakasa loa kiate ia a masau fuli a Palake.

⁸ Na pati loa Palaame kia latou : Ke kotou nonofo i leinei i le pouli, ti e kau tuku atu loa kia koutou se tali, o mulimuli ki le nea leia e soli mai loa kiate au e le Eteleno. Ti na nonofo loa a pule o Moape i le fale o Palaame.

⁹ Na nake loa le Atua kia Palaame, o pati : Ko ai ma tagata ana e nonofo i lou fale ?

¹⁰ Na tali loa Palaame ki le Atua : Ko ni tagata latou na kakau mai kiate au e Palake, vosa o Tesipoli, sau o Moape, o fakasa mai kiate au :

¹¹ Ko leinei se kakai leia na mavae mei Esipito ti kua mafolafola i le fenua ; au loa, o ke tuku kiate ia se malaia ; lagi feala ai loa ke kau malo iate ia i le tau, ti ke kau kapu ia loa a ia.

¹² Na pati loa le Atua kia Palaame : Ke aua na ke ano loa mo latou ; ke aua na ke tuku ia loa se malaia ki le kakai lena, talie kua kau tapuakii le kakai lena.

¹³ Na tuu ake loa Palaame i le usu, o pati ki le kau tagata pule a Palake : Ke kotou toe liliu ki lokoutou fenua, talie e leaise tali e le Eteleno ke kau ano mo koutou.

¹⁴ Ti na tutuu ake loa a pule o Moape, o toe liliu kia Palake, o pati : Na leaise tali e Palaame ke au mo matou.

¹⁵ Na toe kakau loa e Palake se tasi kau pule leia na toka api ake mo mauiga ake i le uluaki kau pule.

¹⁶ Na lotou kaku loa ki le fale o Palaame, o pati kiate ia : Ko leinei le masau a Palake, vosa o Tesipoli : ke aua na toe taofi a koe ke ke au kiate au.

¹⁷ Talie e kau soli atu loa kiate koe se fakapale lasi, ti e kau fai loa kiate koe a nea fuli ala e ke pati mai loa kiate au ; e kau kole atu kiate koe, ke ke au, o fakamalaia le kakai leinei.

¹⁸ Na tali loa Palaame, o pati ki tagata fakasausau a Palake : Pe soli mai foki kiate au e Palake lona fale leia kua apele i le paaga mo le aulo, e leaise feala ke kau fai ia se nea fua e tasi, pe ikiiki ake pe lasi ake i le finegalo o le Eteleno, loku Atua.

¹⁹ I le aso nei, e kau kole atu kia koutou, ke kotou nonofo i leinei i le po nei, ti e kau iloa loa le nea leia e toe fakasa mai loa kiate au e le Eteleno.

²⁰ Na nake loa le Atua kia Palaame i le pouli, o pati kiate ia : Kapau na au a tagata ana o fakaafe a koe ke ke ano mo latou, tuu ki aluga, o ano mo latou ; kae ko leia fua e ke fai loa le nea leia e kau fakasa atu loa kiate koe.

²¹ Na tuu ake loa Palaame i le usu, o fakagutu lana asino fafine, ti na ano loa a ia mo pule o Moape.

²² Na malaga loa le sausau o le Atua, o tupu ko le ano a Palaame. Ti na tuu loa le aselo o le Eteleno i le ala, o tali tau kiate ia. Na eke Palaame i lana asino, ti na ano ana tagata fakasausau e toka lua mo ia.

²³ Na tio loa le asino fafine ki le aselo a le Eteleno leia na tuu i le ala, mo lana seleta gigila i lona lima ; ti na maafe loa le asino fafine mei le ala, o ano ki le faisaga. Na taai loa e Palaame le asino fafine ke toe nake ki le toleala.

²⁴ Na toe tuu loa le aselo o le Eteleno i se ga ala lau ikiiki, leia na ano i loto o faisaga vite e lua, i le vasa o kaua fatu e lua.

²⁵ Na tio loa le asino fafine ki le aselo a le Eteleno, ti na oso loa a ia ki le kaua fatu, o makolo ai le vae o Palaame. Na toe taai loa a ia e Palaame.

²⁶ Na toe ano loa le aselo a le Eteleno ki se tasi ake ganea o le ala leia na toe lau ikiiki ake, talie na leaise feala loa i ai ke toe fakalaka i lona fetuu atamai pe ko lona fetuu sema.

²⁷ Na tio loa le asino fafine ki le aselo a le Eteleno, ti na moe loa a ia ki le kele i lalo o Palaame. Na mu loa le ita o Palaame, ti na ta loa e ia le asino fafine ki lona tokotoko.

²⁸ Na fakamavaa loa e le Eteleno le gutu o le asino fafine, ti na pati loa a ia kia Palaame : Kolea le nea leia kua kau fai kiate koe ke ke ta ai au o tua tolu ?

²⁹ Na tali loa Palaame ki le asino fafine : talie kua ke nukinuki kiate au. Ka na kau too ia loa se seleta i loku lima, kua kau tamate nei a koe.

³⁰ Na pati loa le asino fafine kia Palaame : Pe leaise ko lau asino fafine au, leia na ke ekei tuumau o kaku mai ki le aso nei ? Pe ko se nea leinei na kau fai masani kiate koe ? Ti na tali loa Palaame kiate ia : Leai.

³¹ Na fakamavaa loa e le Eteleno a mata o Palaame, ti na tio loa Palaame ki le aselo a le Eteleno leia na tuu i le ala, mo lana seleta kua kukumi i lona lima ; ti na punou loa Palaame o fakatuu ona mata ki le kele.

³² Na pati loa le aselo a le Eteleno kiate ia : Kolea na ke ta tua tolu ai lau asino fafine ? Ko leinei, na kau au o taofi a koe, talie ko se ala veli leia e tuu i oku mua.

³³ Na tio mai le asino fafine kiate au, ti na maafe tua tolu a ia meiate au ; kanapau na leaise maafe a ia meiate au, kua kau tamate loa a koe, kae kau fakamauli loa a ia.

³⁴ Na pati loa Palaame ki le aselo a le Eteleno : Kua kau agasala, talie na leaise kau iloa na ke tuu i oku mua i le ala ; ti ko leinei, kapau e kau fai se nea veli ki ou mata, ti e kau toe liliu loa ki loku kaiga.

³⁵ Na pati loa le aselo a le Eteleno kia Palaame : Ke ke ano mo tagata ana ; kae ke ke puaki ia loa a folafola fai ala e kau fakasa loa kiate koe. Ti na ano loa Palaame mo pule a Palake.

³⁶ Na logo loa Palake kua kaku ake Palaame, ti na ano loa a ia o fakafelavei kiate ia o kaku ki le kolo o Moape leia e feofi fua ki le koiga o le fenua, i le kau vai o le Alenone.

³⁷ Na pati loa Palake kia Palaame : Pe na leaise kau kakau atu kiate koe ni kakai, o fakaafe mai a koe ke ke au kiate au ? Kolea na leaise ke au ai kiate au ? Pe leaise kau mafai ia lou siki fakaalialiki ki aluga ?

³⁸ Na pati loa Palaame kia Palake : Ko leinei au kua kaku mai kiate koe ! kolea le nea leia e feala loa ke kau fakasa kiate koe ? Talie e kau fakasa ia loa le nea leia e tuku mai loa e le Atua ki loku gutu.

³⁹ Na ano loa Palaame mo Palake, ti na la kaku loa ki Kiliate-Usoti.

⁴⁰ Na fai loa e Palake ni sakilifisio ki ni pipi mo ni ovi, ti na soli loa e ia ni vaega kia Palaame mo pule ala na nofo mo ia.

⁴¹ I le usu, na too loa e Palake a Palaame, ti na fakapale loa e ia a ia ki le mauga ko Pamoti-Paale, o tio loa Palaame mei ai ki se koga o le kakai o Iselaele.