Numelo 21 - Tosi Tapu

Ko gata uti kona

¹ Ko le sau o Alate, ko se tagata Kanaane, na nofo i le potu saute o le fenua, ti na logo loa a ia kua nake Iselaele i le ala o Atalimi. Ti na taui loa e ia Iselaele ti na fakapilisoni loa e ia ni iki o fanau a Iselaele.

² Ti na fai loa e Iselaele se fakapapau ki le Eteleno, o pati : Kapau e ke tuku mai loa le kakai lena ki oku lima, ti e kau maumaui fuli loa ona kolo.

³ Na logo loa le Eteleno ki le leo o Iselaele, ti na tuku loa e ia le kau Kanaane kiate ia. Na tamate loa e ia latou fuli mo olatou kolo ; ti na tuku loa ki le ganea lena le igoa ko Oloma !

⁴ Na mavae loa fanau a Iselaele i le mauga ko Ola i le ala o le tai Kula, ke aua na fakalaka i le fenua o Etome. Kae na loto gaegae loa le kakai i le ala,

⁵ ti na lalau loa a ia ki le Atua mo Moisese, o pati : Kolea na kolua fakamavae ai matou mei Esipito, ke motou mamate i le toafa ? talie e leai se pane ti e leai se vai, ti kua motou fakalialia ki le pane veli leinei.

⁶ Ti na kakau loa e le Eteleno ni gata kona ki le kakai ; ti na lotou uuti loa le kakai, ti na mate loa se toka api o Iselaele.

⁷ Na ano loa le kakai kia Moisese, o pati : Kua motou agasala, talie na motou masau veli ki le Eteleno mo koe. Kole ki le Eteleno, ke fakamamao ia matou a gata anei. Ti na kole loa e Moisese o uiga mo le kakai.

⁸ Na pati loa le Eteleno kia Moisese : Fai se gata kapa kiate koe, ti ke fakapipiki loa a ia ki se pou laakau ; ko leia e uuti loa e se gata, ti e tio loa a ia ki le gata kapa, e mauli loa i ai.

⁹ Na fai loa e Moisese se gata kapa, o fakapipiki ki se pou laakau. Ti ko leia na uuti loa e se gata, ti na tio loa ki le gata kapa, na mauli loa.

Iselaele i le fenua o Moape

¹⁰ Na fanoga loa fanau a Iselaele, ti na lotou nofo loa i Opoti.

¹¹ Na lotou mavae loa i Opoti, ti na lotou nofo loa i Ise-Apalimi, i le toafa leia e tuu i mua o Moape, i le fetuu esite.

¹² Na lotou siki loa i lena, ti na lotou nonofo loa i le fenua leia e tafe ai le vaitafe ko Seleti.

¹³ Na lotou siki loa i lena, ti na lotou nonofo loa i leia atu fetuu o le Alanoni, leia e tafe i le toafa i lana ulu mei le fenua o le kau Amole ; talie ko le Alanoni ko le koiga a ia o Moape, i le vasa o Moape mo le kau Amole.

¹⁴ Koia leia e pati ai i le tosi isitolia o tau a le Eteleno :… Vaepi i Sufa, mo liua makeke o Alanoni,

¹⁵ ti mo magai liua makeke, ala e tafe ki le fetuu o Ali, o tau ki le koiga o Moape.

¹⁶ Na lotou siki loa i lena ki Peeli. Ko le Peeli lena na pati ai loa le Eteleno kia Moisese : Fakatasii le kakai, ti e kau soli loa kia latou se vai.

¹⁷ Ti na sua loa e fanau a Iselaele le katiko leinei : Ke kotou apelepele, ei sosoni ! Ke kotou sua fakavikiviki kiate ia !

¹⁸ Sosoni, na kenu koutou e ni kau aliki ! Na kenu koutou e ni kau lalasi o le kakai, Ki le tokotoko pule, ki alatou laakau pule !

¹⁹ Mei le toafa na lotou ano loa ki Matana ; mei Matana ki Naaliele ; mei Naaliele ki Pamoti ;

²⁰ mei Pamoti, ki le vaivailiua leia e fakalaka i le fenua o Moape, o ano fakaaga ki le tumutumu o le mauga ko Pisika, leia e tio ai ki le toafa.

Malo o Iselaele i sau ko Sioni mo Oki

²¹ Na kakau loa e Iselaele ni tagata avelogo kia Sioni, sau o le kau Amole, o fakasa kiate ia :

²² Fakataga mai ke kau fakalaka i lou fenua ; e leaise motou ulu loa ki ou faisaga magiti, mo ou faisaga vite, ti e leaise motou inu loa le vai o ou sosoni, e motou mulimuli loa i le ala lasi, o kaku ki lamatou fakasili i lou fenua.

²³ Kae na leaise tuku loa e Sioni se fakataga ki Iselaele ke fakalaka i lona fenua ; na tanaki loa e ia lona kakai, ti na ano loa a ia o fakafelavei kia Iselaele, i le toafa. Na ano a ia o kaku ki Saatesi, ti na taui loa e ia Iselaele i lena.

²⁴ Na tamate loa a ia e Iselaele ki le seleta, ti na too loa e Iselaele lona fenua katoa, mei le Alenone i le potu saute, o kaku ki le Sapoke i le potu noleto, o kaku ki le koiga o fanau a Amone ; talie na fai ki ni a fatu makeke le koiga o le kau Amone.

²⁵ Na too loa e Iselaele ona kolo fuli. Ti na nofo loa Iselaele i kolo fuli o le kau Amole, i Eseponi, mo ona kolo liliki fuli.

²⁶ Talie ko Eseponi ko le kolo a ia o Sioni, sau o le kau Amole ; na taui loa e ia le sau o Moape ti na too loa e ia lona fenua katoa o kaku ki le Alenone.

²⁷ Koia leia e pati ai a tagata maau : Ke kotou au ki Eseponi ! Ke toe lagai le kolo o Sioni, ti ke toe fakamakeke a ia !

²⁸ Talie kua mafuta se afi mei Eseponi, Se ula mei le kolo o Sioni ; Kua maumaui e ia a Ale-Moape, Mo le kakai o mauga o le Alenone.

²⁹ Malaia kiate koe, Moape ! Kua ke puli noa, kakai o Kemosi ! Kua sosola ou vosa ! Ti kua popula ou taineliki Kia Sioni, sau o le kau Amole.

³⁰ Na motou fana latou ki amatou gasau : Mei Eseponi ki Tiponi kua maumau a nea fuli. Kua fai amatou maumau o kaku ki Nofasi, O kaku ki Metepa.

³¹ Na nofo loa Iselaele i le fenua o le kau Amole.

³² Na kakau loa e Moisese ke too Saesele ; ti na lotou too loa ona kolo liliki, kae na lotou kapu loa le kau Amole leia na nonofo i ai.

³³ Na lotou maliu loa o pale i le ala o Pasani. Ko Oki, sau o Pasani, na ano loa mo lona kakai katoa o fakafelavei ki fanau a Iselaele, ti na taui loa e ia Iselaele i Etelei.

³⁴ Na pati loa le Eteleno kia Moisese : Aua na ke i kia Oki ; talie e kau tuku a ia ki ou lima, a ia mo lona kakai katoa ti mo lona fenua ; e ke fai loa kiate ia ofaipe lau fai kia Sioni, sau o le kau Amole, leia na nofo i Eseponi.

³⁵ Ti na lotou tamate loa a Oki, mo ona vosa, ti mo lona kakai katoa, o leaise sao se fa toka tasi, ti na lotou too loa lona fenua.