Numelo 20 - Tosi Tapu

Mate o Miliamu ; vai o Melipa

¹ Na kaku loa le fakatasi o fanau a Iselaele ki le toafa o Sini i le uluaki masina, ti na nofo loa le kakai i Katesi. I le ganea lena na mate ai loa Miliamu, ti na tanu loa a ia i ai.

² Na leaise maua loa se vai ki le kakai, ti na lotou fakatasi loa o fakavisi kia Moisese mo Alone.

³ Na lalau loa le kakai kia Moisese. Na lotou pati loa : Kolea na leaise motou mamate ai i le temi leia na mamate ai omatou fetaina i mua o le Eteleno ?

⁴ Kolea na kolua aumai ai le kakai o le Eteleno ki le toafa leinei, ke motou mamate ai, matou mo amatou kau manu ?

⁵ Kolea na kolua fakapale mai ai matou mei Esipito, ke motou au ki le ganea veli leinei ? E leaise ko se fenua leinei e feala ke to ai ni magiti ; e leaise maua fua se ga tafito fiki, pe ko se ga tafito vite, pe ko se ga tafito kelenati, ti e leaise maua fua se ga vai ke inu.

⁶ Na fakamamao loa Moisese mo Alone mei le kakai, o ano ki le uluaga o le falela tapu. Ti na la fakapulou loa ola mata ki le kele ; ti na sa loa le kololia o le Eteleno kia latou.

Agasala a Moisese i le taai o le utu

⁷ Na masau loa le Eteleno kia Moisese, o pati :

⁸ Ke ke too lou tokotoko, ti ke ke tanaki le fakatasi, e koe mo lou taina ko Alone. E kolua masau loa i olatou mua ki le utu leinei, ti e soli atu loa e ia ona vai ; e ke fakamapuna loa kia latou se vai mei le utu, ti e ke fakainu loa ki le vai le kakai mo manu.

⁹ Na too loa e Moisese le tokotoko leia na tuku i mua o le Eteleno, o mulimuli ki le nea leia na fakatotonu e le Eteleno kiate ia.

¹⁰ Na kakau loa e Moisese mo Alone ke fakatasi ake le kakai ki mua o le utu. Ti na pati loa Moisese kia latou : Ke kotou fakalogo loa, kakai patigataa ! Pe ma mafai ia loa le fakasali o se vai kia koutou mei le utu leinei ?

¹¹ Ti na siki loa e Moisese lona lima, ti na taai tua lua loa e ia le utu ki lona tokotoko. Na sali loa se vai lasi. Na inu loa le kakai mo manu.

¹² Ti na pati loa le Eteleno kia Moisese mo Alone : Talie na leaise kolua tui mai kiate au, o fakasa loku maokioki i mua o fanau a Iselaele, e leaise kolua fakaulu ia loa le kakai leinei ki le fenua leia e kau soli kiate ia.

¹³ Ko vai ana o Melipa, ala na fakatupu fefele ai fanau a Iselaele ki le Eteleno, ti na fakasa loa e le Eteleno lona maokioki.

Agasala a Etome

¹⁴ Mei Katesi, na kakau loa e Moisese ni tagata avelogo ki le sau o Etome, o pati kiate ia : Ko leinei le masau o lou taina ko Iselaele : E ke iloa a mamae fuli ala na motou felavei ia.

¹⁵ Na ifo omatou tamana ki Esipito, ti na motou nonofo i ai o fualoa. Kae na fakavelivelii matou e le kau Esipito ti mo omatou tamana.

¹⁶ Na motou tagi loa ki le Eteleno, ti na logo loa a ia ki lomatou leo. Na kakau mai loa e ia se aselo, o fakamavae matou mei Esipito. Ti ko leinei, e motou nonofo i Katesi, kolo leia e tuu i le taupotu o lou fenua.

¹⁷ Tuku matou ke fakalaka i lou fenua ; e leaise motou ano loa i faisaga magiti, mo faisaga vite, ti e leaise motou inu loa le vai o ou sosoni ; e motou mulimuli loa i le ala lasi, o leaise motou afe fua ki le fetuu atamai pe ki le fetuu sema, o kaku ki lamatou tuku loa lou fenua ki muli.

¹⁸ Na pati loa Etome kiate ia : E leaise ke fakalaka loa i loku fenua ! talie e kau lusi loa mo le seleta kiate koe !

¹⁹ Na pati loa fanau a Iselaele kiate ia : E motou pale loa i le ala lasi ; ti kapau e motou inu ia loa lou vai, e au mo aku kau manu, e kau totogi loa a ia kiate koe ; e motou fakalaka fua i lou fenua, kae e leaise motou toe fai loa se tasi ake a nea.

²⁰ Na tali loa Etome : E leaise ke fakalaka loa ! Ti na ano loa Etome kiate ia mo se kakai toka api mo makeke.

²¹ I le nea lena na leaise tali loa e Etome ke fakalaka Iselaele i lona fenua. Ti na maliu kese loa Iselaele iate ia.

²² Na mavae loa le kakai katoa o Iselaele i Katesi, o ano ki le mauga o Ola.

Mate o Alone

²³ Na pati loa le Eteleno kia Moisese mo Alone, i le mauga o Ola, i le koiga o le fenua o Etome :

²⁴ Ka mate loa Alone. Talie e leaise ulu loa a ia ki le fenua leia e kau soli ki fanau a Iselaele, o tupu na leaise kolua fakalogo ki laku fakatotonu, i le vai o Melipa.

²⁵ Too loa Alone mo lona vosa ko Eleasale, ti ke fakapale loa laua ki le tumutumu o le mauga ko Ola.

²⁶ Ti ke tatala loa a kofu taputapu o Alone, o ke fakakofu loa ki ai Eleasale, lona vosa. Ko lena loa le ganea leia e fakatasii ai loa Alone ki lona kakai, ti e mate loa a ia.

²⁷ Na fai loa e Moisese le nea leia na fakatotonu ake e le Eteleno kiate ia. Na lotou pale loa ki le mauga o Ola, i mua o le fakatasi katoa.

²⁸ Na tatala loa e Moisese a kofu o Alone, o fakatui latou kia Eleasale, lona vosa. Na mate loa Alone i ai, i le tumutumu o le mauga. Na ifo loa Moisese mo Eleasale mei le mauga.

²⁹ Na tio loa le fakatasi katoa kua mate Alone, ti na tagi loa le fale katoa o Iselaele kia Alone i aso e kau tolu.