Numelo 2 - Tosi Tapu

Fakatuutuu o famili i le nofolaga

¹ Na masau loa le Eteleno kia Moisese mo Alone, o pati :

² E tasi nofo loa fanau a Iselaele i tafa o le manumanu o lona famili, i tafa o le manumanu o lona kau solia. E fakatuu loa le nofolaga i le takatakai o le falela tapu, o fakamamao mei ai.

³ I le potu esite, e tuu ai loa le nofolaga o Suta mo lona manumanu, mo ana kau tau. I lena e nofo ai loa le pule o vosa o Suta ko Nasoni, vosa o Aminatape,

⁴ mo lona kau tau ko tagata e tino fitu tupu fa afe tino lelau ono (74 600).

⁵ E nofo loa i ona tafa le faasiga o Isakale, mo le pule o le faasiga o Isakale ko Netaneele, vosa o Sua,

⁶ ti mo lona kau tau ko le tino lima tupu fa afe tino lelau fa tagata (54 400).

⁷ Ti olo ki ai le faasiga o Sapulone, mo le pule o vosa o Sapulone ko Eliape, vosa o Elone,

⁸ mo lona kau tau ko le tino lima tupu fitu tino lelau fa tagata (57 400).

⁹ Ko le api o tagata o le kau tau o Suta ko le tino lelau tino valu tupu ono afe tino fa taga (186 400). E lotou ano loa i mua.

¹⁰ I le potu saute e tuu ai loa le nofolaga o Lupeni, mo lona manumanu, ti mo ona kau tau. I lena e nofo ai loa le pule o vosa o Lupeni ko Elisule, vosa o Seteule,

¹¹ mo lona kau tau ko le tino fa tupu ono afe tino lelau lima tagata (46 500).

¹² I ona tafa e nofo ai loa le faasiga o Simeone, mo le pule o vosa o Simeone ko Selumiele, vosa o Sulisatai,

¹³ mo lona kau tau ko le tino lima tupu iva afe tino lelau tolu tagata (59 300).

¹⁴ Ti olo ki ai le faasiga o Kate, mo le pule o vosa o Kate ko Eliasafe, vosa o Leuele,

¹⁵ mo lona kau tau ko le tino fa tupu lima afe tino lelau ono tino lima tagata (45 650).

¹⁶ Ko le api o le kau tau a Lupeni ko tagata e tino lelau tino lima tupu tasi afe tino lelau fa tino lima (151 450). E lotou ano loa i muli o Suta.

¹⁷ Ti oki a ia, ti e ano loa le falela tapu, o fakatasi mo le nofolaga o le kau Levi. E lotou saele loa i loto malie o kau tau e lua i mua ti mo kau tau e lua i muli. E lotou ano loa o mulimuli ki le nofo i le nofolaga, o tasi muli le tagata i le manumanu o lona faasiga.

¹⁸ I le potu uesite, e tuu ai loa le manumanu o le nofolaga o Efalaimi mo ona kau tau. Ko le pule o vosa o Efalaimi ko Elisama, vosa o Amiute.

¹⁹ Ko lona kau tau ko le tino fa afe tino lelau lima tagata (40 500).

²⁰ I ona tafa e nofo ai loa le faasiga o Manase. Ko le pule o vosa o Manase ko Kameliele, vosa o Petasuli.

²¹ Ko lona kau tau ko tagata e tino tolu tupu lua afe tino lelau lua (32 200).

²² Ti e olo atu loa ki ai le faasiga o Pesamino. Ko le pule o vosa o Pesamino ko Apitane, vosa o Kiteoni.

²³ Ko lona kau tau ko tagata e tino tolu tupu lima afe tino lelau fa (35 400).

²⁴ Ko le fakatasi o tagata o le kau tau o le nofolaga o Efalaimi ko tagata e tino lelau tupu valu afe tino lelau (108 100). E lotou ano loa i muli o le kau Levi.

²⁵ I le potu Noleto e tuu ai loa le manumanu o le nofolaga o Tane, ti mo ona kau tau. Ko le pule o vosa o Tane ko Aiesele, vosa o Amisatai.

²⁶ Ko lona kau tau ko le tino ono tupu lua afe tino lelau fitu tagata (62 700).

²⁷ I ona tafa e nofo ai loa le faasiga o Asele. Ko le pule o vosa o Asele ko Pakiele, vosa o Okalane.

²⁸ Ko lona kau tau ko le tino fa tupu tasi afe tino lelau lima tagata (41 500).

²⁹ Ti e olo loa ki ai le faasiga o Nefetali. Ko le pule o vosa o Nefetali ko Aila, vosa o Enani.

³⁰ Ko lona kau tau ko le tino lima tupu tolu afe tino lelau fa tagata (53 400).

³¹ Ko le katoa o tagata o le nofolaga o Tane ko le tino lelau tino lima tupu fitu afe tino lelau ono tagata (157 600). E lotou ano loa i muli, mo lolatou manumanu.

³² Ko le api o le kau Iselaele ala na tosi, i faasiga mo kau tau, ko le tino lelau ono tupu tolu afe tino lelau lima tino lima tagata (603 550).

³³ Na leaise tosi loa a vosa o Levi o fakatasi mo la ake fanau a Iselaele, o mulimuli ki le fakatotonu leia na tuku e le Eteleno kia Moisese.

³⁴ Na fai katoa e fanau a Iselaele o mulimuli ki le nea leia na fakatotonu e le Eteleno kia Moisese : na lotou nofo i tafa olatou manumanu, ti na lotou ano o mulimuli ki le fakatuutuu leia na tuku e le Eteleno, i faasiga mo famili.