Numelo 19 - Tosi Tapu

Le pipi fafine mea ; le vai fakamea

¹ Na masau loa le Eteleno kia Moisese mo Alone, o pati :

² Ko leinei le nea leia kua fakatotonu e le lao leia na tuku e le Eteleno, o pati : masau ki fanau a Iselaele, ke lotou avatu kiate koe se pipi fafine kula, mo sala ila, mo lee mele, ti na leikiaise amo ia se amoga.

³ E kotou tuku loa a ia ki le tagata faisakilifisio ko Eleasale, leia e taki ia loa a ia ki fafo o le nofolaga, ti e tamate loa a ia i ona mua.

⁴ E too loa e le tagata faisakilifisio ko Eleasale se toto o le pipi fafine, ti e fai loa e ia le afusi o le toto ki lona maikao i mua o le uluaga o le falela tapu.

⁵ E tutu loa le pipi fafine i ona mua ; e tutu loa lona kili, mo lona kanofi, mo lona toto, ti mo ona vava.

⁶ E too loa e le tagata faisakilifisio se fafie sete, mo se taulu isopa, ti mo se fului ovi kula, ti e ti loa e ia latou ki loto malie o le afi leia e tutu ai le pipi fafine.

⁷ E fakamea loa e le tagata faisakilifisio ona kofu, ti e maanu katoa loa a ia i se vai, ti o ulu loa a ia ki le nofolaga ; kae e kelekele loa a ia o kaku ki le afiafi.

⁸ Ko leia na tutu ia loa le pipi fafine e fakamea loa e ia ona kofu, ti e maanu katoa loa a ia i se vai, ti o ulu loa a ia ki le nofolaga ; kae e kelekele loa a ia o kaku ki le afiafi.

⁹ E tanaki loa e se tagata mea le mugalafu o le pipi fafine, ti e ave loa e ia a ia ki se ganea mea i fafo o le nofolaga ; e taupau loa a ia ki le fakatasi o fanau a Iselaele, ke fai ai le vai o le fakamea. Ko se vai a ia o le fakamalie.

¹⁰ E fakamea loa e leia na tanaki ia le mugalafu ona kofu, ti e kelekele loa a ia o kaku ki le afiafi. Ko se lao tuku sosolo loa a ia ki fanau a Iselaele mo le matapule leia e nofo i loto malie o latou.

¹¹ Ko leia e lave loa ki se mate, ki se tino o se tasi kua mate, e kelekele loa a ia i aso e fitu.

¹² I le tolu o aso mo le fitu o aso, e fakamea loa a ia ki le vai lena, ti e mea loa a ia ; kae, kapau e leaise fakamea loa a ia i le tolu o aso mo le fitu o aso, e leaise mea loa a ia.

¹³ Ko leia e lave loa ki se mate, ki le tino o se tagata leia e mate loa, kae leaise fakamea loa a ia, e fakakelekele loa e ia le tapenakulo o le Eteleno ; e tuuti loa a ia mei Iselaele. Talie na leaise afusi kiate ia le vai fakamea, e kelekele a ia, talie koi nofo lona kelekele iate ia.

¹⁴ Ko leinei le lao : Ka mate loa se tagata i se falela, ko leia e ulu loa ki le falela lena, mo leia e nofo loa i ai, e kelekele loa.

¹⁵ Ko ipu fuli ala e tuku mavaa, ala e leaise teki i ai se tapono leia kua sai, e kelekele loa.

¹⁶ Ko leia e lave loa i le vao ki se tagata leia na tamate e le seleta, pe ki se tasi leia na mate toka tasi, pe ki ni ivii tagata, pe ki se tanuma, e kelekele loa a ia i aso e fitu.

¹⁷ E tonu ke too loa ki leia e kelekele, se mugalafu o le vikitima fakamalie leia na tutu, ti e liligi loa ki ai se vai mauli ki se ipu.

¹⁸ E too loa e se tagata mea se taulu isopa, o ukui loa aia ki le vai ; ti e afusi loa e ia ki ai le falela, mo nea fuli i loto, ti mo latou fuli ala e nonofo i loto, ti e toe tatau foki ki leia na lave ki ni ivii tagata pe ki se tanuma.

¹⁹ E fai loa e leia e mea le afusi o leia e kelekele, i le tolu o aso mo le fitu o aso, ti e mea loa a ia i le fitu o aso. E fakamea loa e ia ona kofu, ti e maanu katoa loa a ia i le vai ; ti e mea loa a ia i le afiafi.

²⁰ Ko se tagata leia e kelekele loa, ti e leaise fakamea loa i le vai, e tuuti loa a ia mei loto malie o le fakatasi, talie kua fakakelekele e ia le sagatualio o le Eteleno. Talie na leaise afusi kiate ia le vai fakamea, e kelekele loa a ia.

²¹ Ko se lao lena kia latou ke tuku sosolo. Ko leia e fai ia loa le afusi o le vai fakamea, e fo ia loa ona kofu, ti ko leia e lave loa ki le vai fakamea e kelekele loa a ia o kaku ki le afiafi.

²² E kelekele loa nea fuli ala e lave loa ki se tagata kelekele, ti ko leia e lave loa kiate ia e toe kelekele loa a ia o kaku ki le afiafi.