Numelo 17 - Tosi Tapu

Le tokotoko o Alone

¹ Na masau loa le Eteleno kia Moisese, o pati :

² Masau ki fanau a Iselaele, ti e ke maua loa meia latou se tokotoko o mulimuli ki famili o olatou tamana, ko ni tokotoko e kau agafulu tupu lua mei olatou pule fuli o mulimuli ki fale o olatou tamana.

³ E ke tosi loa le igoa o le tagata taki toka tasi i lona tokotoko, ti e tosi loa le igoa o Alone i le tokotoko o Levi. Talie e i ai loa se tokotoko ki le pule taki tasi o fale o olatou tamana.

⁴ E ke tuku loa a tokotoko ana ki le falela tapu, i mua o le aleka o le fakamaoki, leia e kau felavei ai mo koutou.

⁵ Ko le tagata leia e kau filifili loa ko ia leia e se loa lana tokotoko, ti e kau fakagato loa i oku mua a lalau ala e fai e fanau a Iselaele kia koulua.

⁶ Na masau loa Moisese ki fanau a Iselaele ; ti na soli loa e olatou pule fuli kiate ia ni tokotoko, e le pule taki tasi lona tokotoko, o mulimuli ki fale o olatou tamana, ko tokotoko e kau agafulu tupu lua ; na kau le tokotoko o Alone i olatou tokotoko.

⁷ Na tuku loa e Moisese a tokotoko ki mua o le Eteleno, i le falela tapu o le fakamaoki.

⁸ I le apogipogi ake, i le temi leia na ulu ai loa Moisese ki le falela o le fakamaoki, ko leinei, kua se le tokotoko o Alone, ki le famili o Levi : kua tupu i ai ni muko, mo ni se, mo ni fuai amatie leleu.

⁹ Na too loa e Moisese a tokotoko fuli mei mua o le Eteleno, ti na ave loa e ia latou ki fanau fuli a Iselaele, ke lotou tio fuli ki ai, ti ke lotou tasi too loa lana tokotoko.

¹⁰ Na pati loa le Eteleno kia Moisese : toe ave le tokotoko o Alone ki mua o le aleka o le fakamaoki, ke taupau a ia ofaipe se fakamailoga ki fanau o le agatuu, o tupu ke ke fakagato i oku mua alotou lalau, ti ke aua na lotou mamate loa.

¹¹ Na fai fenaaki loa e Moisese ; na fai loa e ia a nea fuli ala na fakatotonu e le Eteleno kiate ia.

¹² Na pati loa fanau a Iselaele kia Moisese : Ko leinei, e motou mamate loa, e motou malaia loa, e motou malaia fuli loa !

¹³ Ko leia e fakafeofi ki le tapenakulo o le Eteleno, e mate a ia. Pe tonu loa ke motou mate fuli ?