Numelo 16 - Tosi Tapu

Agatuu a Kole, mo Tatane, mo Apilame

¹ Ti ko leinei na agatuu loa a Kole, vosa o Isa, vosa o Keasi, vosa o Levi, mo Tatane mo Apilame, vosa o Eliape, mo Oni, vosa o Peleti, ko vosa toka tolu latou o Lupeni.

² Na lotou fakatutuu loa kia Moisese, mo tagata e tino lelau lua tino lima o fanau a Iselaele, ko ni pule o le fakatasi, ko ni iki o latou ala na kau i le fono ti na kau ki le kau tagata mauiga o Iselaele.

³ Na lotou fakatasi loa o fakatutuu kia Moisese mo Alone, ti na lotou pati loa kia laua : Kua lasi ai lakoulua fia pule kia matou ! talie e maokioki le fakatasi katoa, e motou maokioki fuli, ti e nofo le Eteleno i loto malie o lona kakai, ti e nofo le Eteleno i loto malie o latou. Kolea e kolua malaga ai i aluga o le fakatasi a le Eteleno ?

⁴ I le logo a Moisese ki le nea lena na fakavilo loa a ia o fakapulou ona mata i le kele.

⁵ Na masau loa a ia kia Kole mo lana kakai katoa, o pati : I le usu apogipogi, e fakasa loa e le Eteleno pe ko ai leia kua filifili e ia, pe ko ai leia kua fakanofo e ia ke fakafeofi kiate ia. E fakafeofi ake loa e ia kiate ia leia ka filifili loa e ia.

⁶ Ke kotou fai loa le nea leinei, e koe Kole mo lau kakai katoa : Ke kotou too ni ipu tutuaga kaloni.

⁷ I apogipogi, ke kotou tuku ki ai se afi, ti ke kotou liligi ki aluga se kaloni i mua o le Eteleno ; ti ko le tagata leia e filifili loa e le Eteleno, ko ia leia e maokioki loa. Kua feauga le loto lasi, ei fanau a Levi !

⁸ Na pati loa Moisese kia Kole : Kotou fakalogo mai loa, ei vosa o Levi !

⁹ Pe ko se nea noa kia koutou ke filifili koutou e le Atua o Iselaele i le fakatasi katoa o Iselaele, ke kotou fakafeofi kiate ia, o tupu ke kotou gaoi ki le tapenakulo o le Eteleno, ti ke kotou tutuu i mua o le fakatasi o tausi kiate ia ?

¹⁰ Na fakafeofi e ia koutou kiate ia, a koe mo ou fetaina fuli, fanau a Levi, ti e kotou toe loto foki ki le gaoi fakapelepitelo !

¹¹ Talie ko le tupuaga lena o lau fakafesagai mo lou kakai ki le Eteleno ! Talie ko ai Alone ke kotou lauveli ai kiate ia ?

¹² Na kakau loa e Moisese se tasi ke ano o afa ake Tatane mo Apilame, vosa o Eliape, kae na la tali loa : E leaise ma pale loa !

¹³ Pe leaise feauga kiate koe, Moisese, ke ke fakamavae matou i se fenua leia na tafe ai le sua manu mo le sua meli ke motou mamate i le toafa leinei, kae ko leinei e leaise gato lau pulei matou ?

¹⁴ Ti e leaise ko se fenua leia e tafe ai le sua manu mo le sua meli na ke taki matou ki ai, ti e leaise ko ni faisaga magiti mo ni faisaga vite ala na ke soli mai kia matou. Pe ke masalo e kivi a mata o le kakai leinei ? E leaise ma pale atu loa !

¹⁵ Na ita lasi ai Moisese, ti na pati loa a ia ki le Eteleno : Aua na ke tali alatou moliga. Na leaise kau too se asino fua e tasi ia latou, ti na leaise kau fai se nea veli fua e tasi ki se toka tasi o latou.

¹⁶ Na pati loa Moisese kia Kole : Ko koe mo lou kakai, ke kotou fakatasi i le aso apogipogi i mua o le Eteleno, a koe mo latou, mo Alone.

¹⁷ Ke kotou tasi too loa lana ipu tutuaga kaloni, ti ke kotou liligi loa ki aluga se kaloni, ti ke kotou tuku loa akoutou ipu tutuaga kaloni i mua o le Eteleno : E maua loa ni ipu tutuaga kaloni e kau lelau e lua kau lima ; ko Alone mo koe, e kolua too loa akoulua ipu tutuaga kaloni taki tasi.

¹⁸ Na lotou tasi too loa lana ipu tutuaga kaloni, ti na lotou tuku loa ki ai le afi, ti na lotou liligi loa ki ai le kaloni, ti na lotou ano loa o tutuu i mua o le falela tapu mo Moisese mo Alone.

¹⁹ Ti na fakatasii ake loa e Kole le fakatasi katoa kia Moisese mo Alone, i le uluaga o le falela tapu. Ti na sa loa le kololia o le Eteleno ki le fakatasi katoa.

²⁰ Ti na masau loa le Eteleno kia Moisese mo Alone, o pati :

²¹ Kolua mavae kese i le fakatasi leinei, ti e kau tamate loa a ia i se temi e tasi.

²² Na la fakapulou loa o fakatuu ola mata ki le kele, o pati : Ei Atua, ko le Atua o laumalie o kanofi fuli ! ko le tagata fai e toka tasi leia kua agasala, ti e ke sausaua loa ki le fakatasi katoa ?

²³ Na masau loa le Eteleno kia Moisese, o pati :

²⁴ Masau ki le kakai, o pati : Ke kotou fakamamao mei le nofoaga o Kole, mo Tatane, mo Apilame.

²⁵ Na tuu ake loa Moisese ki aluga, o ano kia Tatane mo Apilame ; ti na mulimuli loa le kau fakamatuatua o Iselaele iate ia.

²⁶ Na masau loa a ia ki le fakatasi, o pati : Ke kotou fakamamao mei falela o tagata agaveveli ana ti ke aua na kotou fafa fua ki se nea e tasi o alatou nea, ke aua na kotou mamate fakatasi loa mo latou, o tupu ko alatou agasala fuli.

²⁷ Na lotou fakamamao loa mei le nofoaga o Kole, mo Tatane, mo Apilame. Na mavae ake loa Tatane mo Apilame, o tutuu i mua o ola falela, mo ola avaga, mo ola vosa, ti mo ola makopuna.

²⁸ Na pati loa Moisese : I le nea leinei e kotou iloa ai loa ko le Eteleno totonu leia na kakau ia mai au o fai a nea fuli anei, ti na leaise kau fai ia fua se nea e tasi i loku loto toka tasi.

²⁹ Kapau e mate loa a kakai anei ofaipe le mate a tagata fuli, ti kapau e soko loa kia latou le nea leia e soko ki kakai fuli, ti na leaise ko le Eteleno leia na kakau ia mai au ;

³⁰ kae kapau e fai loa e le Eteleno se nea foou, kapau e fakamavaa loa e le kele lona gutu, o folo latou mo alatou nea fuli, ti kapau e lotou ifo mauli loa ki le fenua o le kau mate, ti e kotou iloa loa i ai kua tiaki e le kakai leinei le Eteleno.

³¹ I le oki o lana fakasa a masau fuli ana, na mafaa loa le kele i vae o Tatane mo Apilame.

³² Na fakamavaa loa e le kele lona gutu, o folo laua, laua mo ola famili, ti mo le kakai fuli o Kole mo alatou nea fuli.

³³ Na lotou ifo mauli loa ki le fenua o le kau mate, latou mo alatou nea fuli. Na toe mapono loa le kele i aluga o latou, ti na lotou puli loa i loto malie o le fakatasi.

³⁴ Na sosola loa fanau fuli o Iselaele, ala na tutuu o takatakai latou, i le logo ki alatou tagi, talie na lotou pati loa : Tou sosola na folo tatou e le kele !

³⁵ Na au loa se afi mei le Eteleno, o tutu le kau tagata e tino lelau lua tino lima, leia na momoli ia le kaloni.

Lauveli o le kakai kia Moisese mo Alone

³⁶ Na masau loa le Eteleno kia Moisese, o pati :

³⁷ Masau kia Eleasale, vosa o le tagata faisakilifisio ko Alone, ke too e ia mei le afi a ipu tutuaga kaloni ti ke laku e ia a malala kaka ki mamao, talie kua fakatapui a ipu ana.

³⁸ Ki ipu o tagata ana ala na agasala o lotou mamate ai, e ke fai loa ki ai ni laui ukamea lalasi ke faliki ai le aletale. E lotou fai loa pe ni fakamailoga ki fanau o Iselaele, talie na momoli latou ki le Eteleno.

³⁹ Na too loa e le tagata faisakilifisio ko Eleasale a ipu kapa tutuaga kaloni o latou ala na tutu mauli, ti na tuki loa e ia latou ki le amale o fola i aluga o le aletale.

⁴⁰ Ko se fakamanatu a ia ki fanau a Iselaele, o tupu ke aua na fakafeofi se tasi leia e leaise kau ki le sakoga o Alone, o momoli se kaloni i mua o le Eteleno, ti ke aua na fai loa a ia pe Kole mo lona kakai, o mulimuli ki le nea leia na fakasa e le Eteleno ia Moisese.

⁴¹ I le apogipogi ake fai, na lalau loa le fakatasi katoa o Iselaele kia Moisese mo Alone, o pati : Ko koulua ala na tamate ia le kakai o le Eteleno.

⁴² Na lolotoga tanaki ake loa le fakatasi katoa kia Moisese mo Alone, ti na lotou maliu loa o agaaga ki le fetuu o le falela tapu, ti na lotou tio loa kua kofu katoa a ia e le ao, ti na sa loa le kololia o le Eteleno.

⁴³ Na ano loa Moisese mo Alone ki mua o le falela tapu.

⁴⁴ Ti na masau loa le Eteleno kia Moisese, o pati :

⁴⁵ Ke kolua fakamamao mei le fakatasi lena, ti e kau tamate loa latou i se temi e tasi. Na la fakapulou loa ki le kele ;

⁴⁶ ti na pati loa Moisese kia Alone : ke ke too loa lau ipu tutuaga kaloni, ti e ke tuku loa ki ai ni malala kaka mei le aletale, ti e ke liligi loa ki ai se kaloni, ti e ke ano fakatavili loa ki le fakatasi, ti e ke fai loa kia latou le sakilifisio o le fakamalie ; talie kua mapaa le sausau o le Eteleno, ti kua kamata le malaia.

⁴⁷ Na too loa e Alone lana ipu tutuaga kaloni, o mulimuli ki le pati a Moisese kiate ia, ti na makape loa a ia ki loto malie o le fakatasi ; ti ko leinei kua kamata foki le malaia i le fakatasi. Na momoli loa e ia le kaloni, ti na fai loa e ia le fakamalie ki le kakai.

⁴⁸ Na ano loa a ia o tuu i le vasa o latou ala kua mamate ti mo latou ala koi mauuli, ti na taofi ai loa le malaia.

⁴⁹ Ko latou ala na mamate i le malaia lena ko le tino agafulu tupu fa afe tino lelau fitu (14 700), na leaise lau i ai latou ala na mamate o tupu ko Kole.

⁵⁰ Na toe liliu loa Alone kia Moisese, i le uluaga o le falela tapu. Kua taofi loa le malaia.