Numelo 15 - Tosi Tapu

Lekula ki sakilifisio

¹ Na masau loa le Eteleno kia Moisese, o pati :

² Masau ki fanau a Iselaele, o pati kia latou : Ka kotou ulu loa ki le fenua leia e kau soli kia koutou ke kotou fakatuu ai okoutou nofoaga,

³ e kotou momoli loa ki le Eteleno ni sakilifisio tutu katoa e le afi mo ni sakilifisio fakafetai, pe ki le fakasoko o se fakapapau, pe i le loto malie, pe i aso fakafiafia. E kotou filifili loa ki sakilifisio ana se pipi tagata, pe ko se ovi, pe ko se koti fafine, ti e kau tali malie loa le afu manogi o sakilifisio ana, ko au ko le Eteleno.

⁴ Ko leia e fai ia loa lana moliga ki le Eteleno e ave loa e ia se moliga nea kai ko kilo falina e tolu ala kua lusi fakatasi mo se liti lolo e tasi mo se vaelua,

⁵ ti e ke fai loa se lipasio ki se liti vino e tasi mo se vaelua ki akeno fuli ala e momoli loa i se failaulau pe ko se sakilifisio fakafetai.

⁶ Ki se ovi tagata, e ke ave loa ni kilo falina e ono ala kua lusi fakatasi mo ni liti lolo e lua,

⁷ ti e ke fai loa mo se lipasio ki ni liti vino e lua, ofaipe se moliga leia e afu manogi ki le Eteleno.

⁸ Ti kapau e ke momoli se pipi tagata muli, pe ki se failaulau, pe ki se sakilifisio ki se fakapapau, pe ki se sakilifisio fakafetai ki le Eteleno,

⁹ E momoli loa se moliga nea kai, mo le pipi tagata muli, ko ni kilo falina e iva ala kua lusi fakatasi mo ni liti lolo e tolu,

¹⁰ ti e ke fai loa se lipasio ki ni liti vino e tolu : ko se sakilifisio tutu katoa e le afi, ti e afu manogi a ia ki le Eteleno.

¹¹ E fai fenaaki loa ki pipi tagata taki tasi, mo ovi tagata taki tasi, mo akeno taki tasi, ti mo koti tagata liliki taki tasi.

¹² O mulimuli ki le lasi o manu, e kotou fai fenaaki loa ki manu taki tasi, o fakatatau ki lolatou lasi.

¹³ E fai fenaaki loa e fanau fuli a Iselaele, mo ka lotou momoli loa ni sakilifisio tutu e le afi, ko se nea a ia e afu manogi ki le Eteleno.

¹⁴ Kapau e momoli e se matapule leia e nofo ia koutou, pe ko se tasi leia kua lau tautupu lona famili i lokoutou fenua, se sakilifisio tutu e le afi, ko se nea manogi malie ki le Eteleno, e momoli loa e ia a ia ofaipe koutou.

¹⁵ Ko se lekula loa e tasi ki le fakatasi katoa, kia koutou mo le matapule leia e nofo ia koutou ; ko se lao loa lena ki okoutou tautupu fuli ki muli. E tatau loa kia koutou mo le matapule, i mua o le Eteleno.

¹⁶ E i ai loa se lao e tasi mo se fakatotonu e tasi kia koutou mo le matapule leia e nofo ia koutou.

Moliga o uluaki fa pane

¹⁷ Na masau loa le Eteleno kia Moisese, o pati :

¹⁸ Masau ki fanau a Iselaele ; ti ke pati loa kia latou : Ka kotou kaku loa ki le fenua leia e kau fakaulu loa koutou ki ai,

¹⁹ ti ka kotou kai loa le pane o le fenua lena, kotou too loa se moliga ki le Eteleno.

²⁰ Kotou siki loa se fa keke, ko uluaki fua o lokoutou falina foou leia kua fakapaapaa ; e kotou ave loa a ia ofaipe le moliga leia e too mei le ganea sasa fulumeto.

²¹ E kotou too loa ki le Eteleno se moliga o uluaki fua o lakoutou falina kua fakapaapaa, i temi ka au.

Sakilifisio ki agasala e fai fuanoa

²² Kapau e kotou agasala loa i le fai fakafuanoa, o leaise kotou fai loa a fakatotonu fuli ala na fakailo e le Eteleno kia Moisese,

²³ mo nea fuli ala na fakatotonu kia koutou e le Eteleno ia Moisese, mei le aso leia na tuku ai e le Eteleno ana fakatotonu kia koutou mo okoutou tautupu fuli ki muli ;

²⁴ Ti kapau na agasala kae na leaise iloa, e momoli loa e le fakatasi katoa se failaulau ki se pipi tagata muli, ko se nea manogi malie a ia ki le Eteleno, mo lona moliga falina, mo lona lipasio, ti mo se koti tagata ki le sakilifisio o le fakamalie.

²⁵ E fai loa e le tagata faisakilifisio le fakamalie ki le fakatasi o fanau fuli a Iselaele, ti e fakamolemole loa kia latou ; talie na lotou agasala fakafuanoa, ti kua lotou ave lalatou moliga, ko se sakilifisio tutu e le afi ki le Eteleno ti ko se vikitima fakamalie i mua o le Eteleno, o tupu ko le agasala leia na lotou fai fakafuanoa.

²⁶ E fakamolemole loa ki le fakatasi katoa o fanau a Iselaele ti mo le matapule leia e nofo ia latou, talie na agasala fakafuanoa le kakai katoa.

²⁷ Ti kapau ko se tagata toka tasi leia na agasala fakafuanoa, e momoli loa e ia se koti fafine fetuu tasi ki le sakilifisio fakamalie.

²⁸ E fai loa e le tagata faisakilifisio le fakamalie ki le tagata lena na fai ia le agasala fakafuanoa i mua o le Eteleno ; ti ka oki loa lana momoli le sakilifisio o le fakamalie, ti e fakamolemole loa kiate ia.

²⁹ Ko le lekula lena e tatau loa kia latou fuli ala e fai ia se agasala fakafuanoa, ki le kau Iselaele mo le kau matapule ala e mauli i loto malie o latou.

³⁰ Kae kapau e fai loa e se tagata Iselaele pe ko se tagata matapule se agasala i lona loto faitalisa, e nukinuki loa a ia ki le Eteleno, ti e tuuti loa a ia mei loto malie o lona kakai.

³¹ Kua nukinuki a ia ki le folafola a le Eteleno, ti kua maumaui e ia lana fakatotonu : kua tuuti e le tagata lena a ia totonu mei lona kakai, ti e amo loa e ia le tua o lana agasala.

Tuaa o le maumau sapato

³² I le temi leia na nonofo ai fanau a Iselaele i le toafa, na maua loa se tagata leia na tae fafie i le aso o le sapato.

³³ Na ave loa a ia e latou ala na maua ia a ia e lolotoga tae fafie kia Moisese, mo Alone, ti mo le fakatasi katoa.

³⁴ Na fakapilisoni loa a ia, talie na leikiaise fakasa le nea leia e tonu ke fai kiate ia.

³⁵ Na pati loa le Eteleno kia Moisese : E tautea loa le tagata lena ki le mate ; e tuki fatui loa a ia e le fakatasi katoa i fafo o le nofolaga.

³⁶ Na ave loa a ia e le fakatasi katoa ki fafo o le nofolaga, ti na lotou tuki fatui loa a ia, ti na mate loa a ia, o mulimuli ki le fakatotonu a le Eteleno kia Moisese.

Kapa usi o kofu

³⁷ Na pati loa le Eteleno kia Moisese :

³⁸ Masau ki fanau a Iselaele, ti ke pati loa kia latou : i tautupu fuli, ke lotou tui loa se ga potui kie kua kotikotii i le kapa o olatou kofu, ti ke lotou tui loa i le ga kie lena se filo usi.

³⁹ Ka kotou maua loa le ga kie lena i le kapa o okoutou kofu, e kotou tio loa ki ai ti e kotou manatui loa a folafola fuli a le Eteleno ke kotou fai latou, ti e leaise kotou mulimuli loa ki oli o okoutou loto mo okoutou mata ala e ave ia loa koutou ki tausi fakapagani.

⁴⁰ E kotou manatui loa i ai aku folafola, ti e kotou fai loa latou, ti e kotou maokioki loa ki lokoutou Atua.

⁴¹ Ko au ko le Eteleno, ko lokoutou Atua, leia na fakamavae ia koutou mei le fenua o Esipito, ke kau nofo ko lokoutou Atua. Ko au ko le Eteleno, ko lokoutou Atua.