Numelo 14 - Tosi Tapu

Agatuu a le kakai : 40 fetuu i le toafa

¹ Na siki ake loa le leo o le kakai katoa, o tagi ; ti na lotou fetagisi loa i le po katoa.

² Na lalau loa fanau fuli o Iselaele kia Moisese mo Alone, o pati : Felaaki ake na motou mate i le fenua o Esipito ! Felaaki ake foki na motou mate i le toafa !

³ Kolea kua ave ai matou e le Eteleno ki le fenua leinei, ke motou mamate ai i le tau, ti ke ave loa omatou avaga mo omatou fanau o fakapopulai ! Pe leaise malie ake kia matou ke motou toe liliu ki Esipito ?

⁴ Ti na lotou fonofono loa ia latou, o pati : Tou fakanofo loa se pule, ti tou toe liliu loa ki Esipito.

⁵ Na tulolo loa Moisese mo Alone o fakatuu o la ulu ki le kele, i mua o le kakai katoa o Iselaele.

⁶ Ti ko Sosue, vosa o Nune, mo Kalepo, vosa o Sefune, ia latou fuli ala na tio i le fenua, na sae ia loa ola kofu,

⁷ ti na la masau loa ki le kakai katoa o Iselaele, o pati : Ko le fenua leia na motou takai o tioi, ko se fenua malie ai.

⁸ Kapau e loto malie le Eteleno kia tatou, ti e fakaulu loa e ia tatou ki le fenua leinei, ti e soli mai loa e ia le fenua leinei kia tatou : Ko se fenua a ia e sali ai le sua manu mo le sua meli.

⁹ Ko leia fua, ke aua na kotou agatuu ki le Eteleno ti ke aua na kotou i ki le kakai o le fenua lena, talie e tou kai loa latou i se maaga e tasi. Kua leaise malu fua leia ke lotou fakamalumalu ai, kae e nofo le Eteleno mo tatou, aua na kotou i kia latou.

¹⁰ Na masau loa le kakai katoa ke tuki fatui laua ke mate, kae fokifa kua sa le kololia o le Eteleno i aluga o le falela tapu, i mua o fanau fuli o Iselaele.

¹¹ Ti na pati loa le Eteleno kia Moisese : E kaku loa kiafea le fakamamae o loku loto e le kakai leinei ? E oki loa afea lana tuigataa kiate au, logo ai a fakamailoga fuli o loku mafimafi ala kua kau fakatio a ia ki ai ?

¹² E kau tautea loa a ia ki se masaki veli, ti e kau maumaui loa a ia ; kae e kau fai loa kiate koe se puleaga leia e lasi ake loa mo makeke ake loa iate ia.

Kole a Moisese

¹³ Na pati loa Moisese ki le Eteleno : E logo loa ki ai le kau Esipito, leia na iloa ia ko lou lima atamai leia na fakamavae ia le kakai leinei mei lolatou fenua,

¹⁴ ti e lotou fakamatala loa a ia ki le kakai o le fenua leinei. Talie kua lotou iloa ko koe, ko le Eteleno, e ke nofo mo lou kakai ; ti e ke sa mata kiate ia, a koe, ko le Eteleno ; ti e tuu lou ao iate ia ; ti e ke saele i ona mua i le ao i se pou afu, mo le pouli i se pou afi.

¹⁵ Kapau e tamate loa le kakai leinei ofaipe se tagata e tasi, e pati loa puleaga fuli ala na logo masau kiate koe :

¹⁶ Na leaise mafai loa e le Eteleno ke ave e ia le kakai leinei ki le fenua leia na fakapapau e ia ke soli kiate ia : koia leia kua tamate ai e ia a ia i le toafa.

¹⁷ Koia e kau kole atu ai kiate koe, Eteleno, ke ke fakasa le lasi o lou mafimafi, o mulimuli ki le nea leia na ke fakasa kia matou :

¹⁸ E kataki fualoa le Eteleno, ti e apele a ia i le manava alofa, ti e fakamolemole e ia a agasala mo patigataa ; kae e leaise fakatonuia e ia le tagata agasala, ti e tautea e ia a agasala o tamana ki vosa o kaku ki le tolu mo le fa o tautupu.

¹⁹ Eteleno, fakamolemole ki le sala o lou kakai o mulimuli ki le lasi o lou agamalie, ofaipe lau fakamolemole tuumau kiate ia talu mei Esipito o kaku mai ki leinei.

Fakamolemole a le Eteleno

²⁰ Ti na masau loa le Eteleno kia Moisese mo Alone, o pati : E kau fakamolemole, ofaipe lau kole.

²¹ Kae e kau mauli ! ti e fakaapele loa e le kololia o le Eteleno le malama nei katoa !

²² Ko latou fuli ala na tio ki loku kololia mo fakamailoga ala na kau fai i Esipito mo le toafa, ala kua asiasii ia au o tua kau agafulu o kaku mai ki le aso nei, talie na leaise lotou fakalogo ki loku leo,

²³ e leaise lotou tio loa ki le fenua leia na kau fakapapau ki olatou tamana ke soli kia latou ; io, e leaise lotou tio loa ki ai, latou fuli ala na tiaki ia au.

²⁴ Kae ko laku tagata fakasausau ko Kalepo, talie na nofo iate ia se laumalie kese, ti na mulimuli katoa a ia i loku ala, e kau fakaulu loa a ia ki le fenua leia na ano ki ai, ti e maua loa a ia e lona sakoga.

²⁵ Na nofo le kau Amaleke mo le kau Kanaane i le vaivailiua. Apogipogi, kotou maliu loa, ti kotou ano loa ki le toafa, i le ala ki le tai Kula.

²⁶ Na masau loa le Eteleno kia Moisese mo Alone, o pati :

²⁷ E kaku loa kiafea laku tuku le kakai agaveli leinei ke lalau kiate au ? Kua kau logo ki lalau o vosa o Iselaele ala na fai kiate au.

²⁸ Pati kia latou : E kau mauli ! e pati le Eteleno, e kau fai loa o mulimuli ki akoutou masau ala na logo ki ai oku taliga.

²⁹ E kotou mamate loa i le toafa leinei. Ko koutou fuli ala na kau i le tosi kakai, ala kua fetuu kau lua o fai ki aluga, ti na lalau kiate au,

³⁰ e leaise kotou ulu loa ki le fenua leia na kau fakapapau ke fakanonofo ai koutou, gato fai kia Kalepo, vosa o Sefune, mo Sosue, vosa o Nune.

³¹ Ti ko akoutou fanau liliki, ala na kotou pati : E lotou liliu loa ko le nea kai a le fili malo ! e kau fakaulu loa latou ki ai, ti e lotou iloa loa le fenua leia kua kotou aga o tiaki.

³² Io, e kotou mate loa i le toafa leinei ;

³³ ti e eva loa okoutou fanau i fetuu e kau fa i le toafa, ti e lotou amo loa le tua o akoutou agatuu, o kaku ki lokoutou mamate fuli i le toafa.

³⁴ Na kotou tioi le fenua i aso e kau fa, e kotou amo loa le mamae o akoutou agaveli i fetuu e kau fa, ko le fetuu e tasi ki le aso e tasi. Ti e kotou iloa ai loa le veli o le agatuu kiate au.

³⁵ Ko au, ko le Eteleno, kua kau masau ! Ti e kau fai maoki loa le nea lena ki le kakai agaveli leinei, leia kua fakatasi o fakafesagai mai kiate au. E lotou mamate fuli loa i le toafa.

³⁶ Ko tagata ala na kakau e Moisese ke ano o tioi le fenua, ti na toe liliu ake loa o lauveli ki le fenua ti mo fakalagai ia le kakai ke lalau kia Moisese,

³⁷ ko tagata ana na lauveli ki le fenua na mamate loa : na taai loa latou e le Eteleno ki se masaki veli.

³⁸ Na gato loa kia Sosue, vosa o Nune, mo Kalepo, vosa o Sefune, na mauli loa i tagata ala na ano o tioi le fenua.

Toe pati gataa a le kakai

³⁹ Na fakasa loa e Moisese a folafola ana ki fanau fuli o Iselaele, ti na mamae lasi ai le kakai i ai.

⁴⁰ Na lotou tutuu ake loa i le mafoata o pale ki le tumutumu o le mauga, o pati : Kua motou agasala ! Kae ko leinei kua motou tokamalie ke motou pale ki le ganea leia na pati ki ai le Eteleno.

⁴¹ Na pati loa Moisese : Kolea e kotou maumaui ai le fakatotonu a le Eteleno ? E leaise manuia loa le nea lena kia koutou.

⁴² Ke aua na kotou pale ! talie e leaise nofo le Eteleno mo koutou. E tamate loa koutou e okoutou fili.

⁴³ Talie ko le kau Amaleke mo le kau Kanaane e nonofo i lena, i okoutou mua ; e kotou mamate loa i le tau talie kua kotou titua ki le Eteleno, ti e leaise ano loa le Eteleno mo koutou.

⁴⁴ Kae na lotou patigataa loa, o pale ki le tumutumu o le mauga ; kae na leaise mavae le aleka o le fakamaoki o le Eteleno mo Moisese i loto malie o le nofolaga.

⁴⁵ Ti na ifo ake loa le kau Amaleke mo le kau Kanaane, ala na nonofo i le mauga lena, o tamate latou ti mo kapu latou o kaku ki Olama.