Numelo 13 - Tosi Tapu

Esipio e kau agafulu tupu lua

¹ Na masau loa le Eteleno kia Moisese, o pati :

² Kakau loa ni tagata ke ano o tioi le fenua ko Kanaane leia e kau soli ki fanau a Iselaele. Kotou filifili loa se fa tagata i faasiga taki tasi o olatou tamana ; ko latou ko ni pule fuli loa.

³ Na kakau loa latou e Moisese mei le toafa o Palani, o mulimuli ki le fakatotonu a le Eteleno : ko tagata fuli ana ko ni pule o fanau a Iselaele.

⁴ Ko nei olatou igoa : Ki le faasiga o Lupeni : ko Samua, vosa o Sakule.

⁵ Ki le faasiga o Simeone : ko Sapate, vosa o Oli.

⁶ Ki le faasiga o Suta : ko Kalepo, vosa o Sefune.

⁷ Ki le faasiga o Isakale : ko Sikuale, vosa o Sosefo.

⁸ Ki le faasiga o Efalaimi : ko Sosue, vosa o Nune.

⁹ Ki le faasiga o Pesamino : ko Paleti, vosa o Lafu.

¹⁰ Ki le faasiga o Sapulone : ko Katiele, vosa o Soti.

¹¹ Ki le faasiga o Sosefo, mo le faasiga o Manase : ko Kati, vosa o Susi.

¹² Ki le faasiga o Tane : ko Amiele, vosa o Kemali.

¹³ Ki le faasiga o Asele : ko Setuli, vosa o Misaele.

¹⁴ Ki le faasiga o Nefetali : ko Napi, vosa o Vofesi.

¹⁵ Ki le faasiga o Kate : ko Keuli, vosa o Maki.

¹⁶ Ko igoa ana o le kau tagata leia na kakau e Moisese ke ano o tioi le fenua o Kanaane. Na tuku loa e Moisese kia Ose, vosa o Nune, le igoa ko Sosue.

¹⁷ Na kakau loa latou e Moisese ke ano o tioi le fenua o Kanaane. Na pati loa a ia kia latou : Kotou pale loa i leinei, i le ala o le Saute, ti kotou pale loa ki le mauga.

¹⁸ Kotou sivisivi loa le agaaga o le fenua, mo le kakai leia e nofo i ai, pe makeke pe gagae, pe toka api pe toka teiki ;

¹⁹ pe feaki le fenua leia e lotou nonofo ai, pe malie pe veli ; pe feaki a kolo ala e lotou nofo ai, mo nofolaga, mo kolo tau.

²⁰ Pe feaki le kele, pe malie pe veli, pe mauli ai ni laakau pe leai. Kotou loto toa. Kotou too loa ni fua o le fenua o aumai. Ko le temi lena o uluaki fua o le vite.

²¹ Na lotou pale loa, ti na lotou tioi loa le fenua, o kamata mei le toafa o Sini o kaku ki Leopoti, i le uluaga o Amati.

²² Na lotou ulu loa ki le potu Saute ti na lotou ano loa o kaku ki Epelone, leia na nonofo ai a vosa o Anake ko Asimani, mo Sesai, mo Talamai. Na laga Epelone i ni fetuu e fitu i mua o le laga o Tesoane i Esipito.

²³ Na lotou ano loa o kaku ki le vaitafe o Esikoli, ti na lotou tuuti loa i ai se laa vite mo ona fui fulumeto, leia na amo loa e se toka lua ki se laakau ; ti na lotou toe too foki mo ni fuai kelenati mo ni fuai fiki.

²⁴ Na tuku loa ki le potu fenua lena le igoa ko le vaivailiua o Esekoli, o tupu ko le fui fulumeto leia na tuuti i ai e le kau Iselaele.

Fakamatala a le kau esipio

²⁵ Na lotou toe liliu loa i le oki o le fakatele i le kau fa aso.

²⁶ I lalatou kaku ake, na lotou ano loa kia Moisese, mo Alone, mo le kakai katoa o Iselaele, i Katesi i le toafa o Palani. Ti na lotou fakamatala loa kia latou a nea fuli ala na lotou tio ki ai, ti na lotou fakatio loa latou ki fua o le fenua.

²⁷ Ko leinei le nea leia na lotou fakamatala loa kia Moisese : Na motou ano ki le fenua leia na ke kakau matou ki ai. E maoki ai ko se fenua a ia e apele i le sua manu mo le sua meli, ti ko nei ona fuai laakau.

²⁸ Kae e makeke le kakai leia e nofo i le fenua lena, ti e lalasi a kolo, ti e takatakai latou ki ni a fatu makeke. Na motou tio foki i ai ki ni fanau a Anake.

²⁹ E nofo le kau Amaleke i le saute o le fenua. E nofo le kau Iti, mo le kau Sepusi, ti mo le kau Amole i le mauga. E nofo le kau Kanaane i le mata tai mo kauvai o le Solotane.

³⁰ Na fakagato loa e Kalepo a lalau ala na kamata fai loa e le kakai kia Moisese. Na pati loa a ia : Ke tou ano nei o too le fenua ma tatou, talie e tou malo loa !

³¹ Kae na pati loa le kau tagata ala na ano mo ia : E leaise mafai ke tou ano o taui le kakai lena talie e lotou makeke lasi ake ia tatou.

³² Ti na lotou kamata lauveli loa ki le fenua leia na lotou ano o tioi. Na lotou pati loa : Ko le fenua leia na matou taka ai, o tioi, ko se fenua leia e tamate ia latou ala e nonofo i ai ; e tagata lalasi fuli le kakai katoa leia na motou tio ki ai.

³³ Na motou tio foki i ai ki ni tagata lalasi fakaii, ko vosa o Anake : I lamatou tio na motou fai kia latou pe ni seseivaka, ti na toe felaaki foki lalatou tio kia matou.