Numelo 12 - Tosi Tapu

Mumusu a Miliamu mo Alone

¹ Na masau veli loa Miliamu mo Alone kia Moisese, o tupu ko le fafine Etiopia leia na avaga mo ia : talie na too e Moisese se fafine Etiopia.

² Na la pati loa : Pe gato fua ia Moisese e masau ai le Eteleno ? Pe leaise masau foki a ia ia taua ?

³ Ti na logo loa le Eteleno ki le nea lena. Ko leinei, na agamalu ai le tagata ko Moisese, o lasi ake i tagata fuli ala kua mauli i aluga o le kele.

⁴ Ti fokifa kua pati le Eteleno kia Moisese, mo Alone, mo Miliamu : Kotou ano toka tolu loa ki le falela tapu. Na lotou ano loa ki ai.

⁵ Na ifo loa le Eteleno i le pou ao, ti na tuu loa a ia i le uluaga o le falela tapu. Na kalagai loa e ia Alone mo Miliamu ala na fakafeofi toka lua ake loa kiate ia.

⁶ Ti na pati loa a ia : Kolua fakalogo malie mai ki aku masau ! Ka maua loa ia koutou se polofeta, ko se ata loa leia e kau sa ai loa kiate ia, a au ko le Eteleno, ti e kau masau loa kiate ia i se moe miti.

⁷ Kae e leaise felaaki ki laku tagata fakasausau ko Moisese. E agatonu a ia i loku fale katoa.

⁸ E kau masau kiate ia i le gutu ki le gutu, e kau sa kiate ia, ti e tio a ia ki se ata totonu o le Eteleno i ona mua. Kolea na leaise kolua i ai i le masau veli ki laku tagata fakasausau ko Moisese ?

⁹ Ti na mu loa le sausau o le Eteleno kia laua. Ti na ano loa a ia.

¹⁰ Na mavae loa le ao i aluga o le falela tapu. Ti ko leinei, kua maua e Miliamu se kilia leia kua tea ofaipe le nive. Na maliu loa Alone o tio kia Miliamu, ti ko leinei, kua kilia a ia.

¹¹ Ti na pati loa Alone kia Moisese : Alofa mai, ei loku aliki, aua na ke fakaamo kia maua le tua o le agasala leia na ma fai pe ni nea valelea, o tupu ai lama agasala !

¹² Aua na liliu loa Miliamu ofaipe le toe leia kua mate fanau ti kua kamata pala !

¹³ Ti na tagi loa Moisese ki le Eteleno, o pati : Ei Atua, e kau kole atu kiate koe, fakamauli a ia !

¹⁴ Ti na pati loa le Eteleno kia Moisese : Kapau na anusi ona mata e lona tamana, pe leaise luma loa a ia i ni aso e fitu ? Ke tapono a ia i ni aso e fitu i fafo o le nofolaga ; kao oki loa a ia, ti o toe fakaulu loa a ia ki le nofolaga.

¹⁵ Na tapono loa Miliamu i fafo o le nofolaga i aso e fitu ; ti na leaise fanoga loa le kakai, o kaku ki le toe ulu o Miliamu ki le nofolaga.

¹⁶ I le oki o le nea lena, na mavae loa le kakai i Aseloti, o nofo i le toafa o Palani.