Numelo 11 - Tosi Tapu

Le afi a le Eteleno

¹ Na lalau loa le kakai ki taliga o le Eteleno, ti na veli loa le nea lena kiate ia. I le logo a le Eteleno ki le nea lena, na mu loa lona sausau ; ti na vela loa le afi o le Eteleno ia latou, o tamate le potupotu o le nofolaga.

² Na tagi loa le kakai kia Moisese. Ti na faikole loa Moisese ki le Eteleno, ti na mate loa le afi.

³ Na tuku loa ki le ganea lena le igoa ko Tapela, o tupu na mu le afi o le Eteleno i loto malie o Iselaele.

Tagi a Iselaele ki se kanoi manu

⁴ Na vilo loa ki le oli fakatino le kakai kese leia na fanoga i loto malie o fanau a Iselaele. Ti na toe kamata lalau foki fanau a Iselaele, o pati : Ko ai leia e soli ia mai loa kia tatou se kanoi manu ke kai ?

⁵ E tou manamanatu ki ika ala na tou kai noa i Esipito, mo kokope, mo melo, mo pualo, mo aniani, ti mo lai.

⁶ I leinei kua malo noa o tou fatakia : e leaise maua fua se nea e tasi i nea ana ; e tio ata otou mata ki le mane.

⁷ Na fai le mane pe se fuai koliate, ti na tea a ia ofaipe le pulu o le peteliomi.

⁸ Na mavetevete loa le kakai i tafatafa o le nofolaga, o tae le mane i le mafoata ; ti na lotou fakamaluu loa a ia ki ni fatu fakamaluu, ti na lotou tuki loa a ia i ni ipu sima ; ti na lotou fakamoso loa a ia i ni kulo kapa, ti na lotou fai loa ki ai ni keke. Na kano malie a ia ofaipe ni keke ala na fai ki le lolo foou.

⁹ Na ifo loa le mane i le pouli ki le nofolaga i le temi leia na ifo ai le sasau.

¹⁰ Na logo loa Moisese ki le lalau a le kakai i olatou famili, le tagata taki toka tasi i le uluaga o lona falela. Ti na mu loa le sausau o le Eteleno o lasi ai.

¹¹ Na mamae ai le loto o Moisese, ti na pati loa a ia ki le Eteleno : Kolea e ke fakamamae ai le loto o lau tagata fakasausau ? Kolea e ke fakafiti ai kiate au lou agamalie ? Kolea e ke teki ai kiate au le kavega o le kakai fuli leinei ?

¹² Pe ko au leia na fakatupu ia le kakai fuli leinei ? Pe ko au leia na fanaui ia a ia, ke ke pati mai ai kiate au : luluku a ia i lou fatafata, ofaipe se fafine leia e puaki ia se toe, ti ke ave a ia ke kaku ki le fenua leia na ke fakapapau ki ona tamana ke soli kiate ia ?

¹³ E kau maua loa ifea se kanoi manu leia ke soli ki le kakai fuli leinei ? Talie e lotou fetagisi fuli i oku tafa, o pati : soli mai kia matou se kanoi manu ke kai !

¹⁴ E leaise kau mafai ia le amo toka tasi o le kakai fuli leinei, talie e mamafa veli ai a ia kiate au.

¹⁵ Ti kapau e ke fai fenaaki kiate au, ti e malie ake ke ke tamate au ! E ke fakasa loa i ai lou agamalie kiate au, ti e leaise kau tio loa ki le malaia o loku kakai.

Ko kau matua e tino fitu

¹⁶ Na pati loa le Eteleno kia Moisese : Fakatasii mai kiate au se tino fitu o le kau matuatua o Iselaele, latou ala e ke iloa ko fakamatuatua mo takitaki o le kakai. Aumai latou ki mua o le falela tapu, ti ke lotou tutuu i ai mo koe.

¹⁷ E kau ifo mai loa, ti e kau masau loa kiate koe i lena. E kau too ia loa se potu o le laumalie leia e nofo iate koe, o tuku kia latou, ke lotou amo mo koe le kavega o le kakai, ti ke aua na ke amo toka tasi a ia.

¹⁸ E ke pati loa ki le kakai : Kotou fakamea ki apogipogi, ti e kotou kai loa se kanoi manu, talie kua kotou tagi ki taliga o le Eteleno, o pati : Ko ai leia e fagai ia loa matou ki se kanoi manu ? Talie na motou mauli malie i Esipito. E soli atu loa e le Eteleno se kanoi manu kia koutou, ti e kotou kai loa a ia.

¹⁹ E kotou kai loa a ia, o leaise gato fua i se aso e tasi, pe lua, pe lima, pe kau agafulu, pe kau lua,

²⁰ kae i se masina katoa, o kaku ki lana sali mei okoutou pogoisu, ti ke kotou fakalialia loa ki ai, talie na kotou tiaki le Eteleno leia e nofo i loto malie o koutou, talie na kotou tagi i ona mua, o pati : Kolea na tou mavae ai mei Esipito ?

²¹ Na pati loa Moisese : Ko tino lelau afe e ono tagata, ko le api a ia o le kakai leia e fanoga mo au, kae ke pati : e kau soli loa se kanoi manu kia latou, ti e lotou kai loa a ia i se masina katoa !

²² Kapau e motou tamate loa amatou ovi fuli, mo amatou koti fuli, ti mo amatou pipi fuli, e leaise feauga loa le nea lena ; ti kapau e motou aumai a ika fuli o le tai, e leaise feauga aifai le nea lena !

²³ Na pati loa le Eteleno kia Moisese : Pe kua toetoe loa le lima o le Eteleno ? I le aso nei e ke tio ai loa pe soko pe leai le nea leia kua kau pati ki ai.

²⁴ Na ulu loa Moisese ki fafo mei le falela tapu o fakasa ki le kakai a masau a le Eteleno. Ti na fakatasii loa e ia le tino fitu o le kau fakamatuatua o le kakai, ti na fakatuutuu loa e ia latou o takatakai ia le falela tapu.

²⁵ Na ifo loa le Eteleno i le ao, o masau kia Moisese. Ti na too loa e ia se potu o le laumalie leia na nofo iate ia, o tuku loa a ia ki le kau fakamatuatua e tino fitu. I le temi fai leia na ifo ai loa le laumalie kia latou, na lotou masau loa ofaipe le kau polofeta ; kae na leaise lotou soko atu a ia.

Kikite a Eletate mo Metate

²⁶ Na i ai loa ni tagata e toka lua, ko Elitati mo Metati, ala na nofo i le nofolaga talie na leaise la ano ki le falela tapu ; ti na ifo loa le laumalie kia laua, talie na la kau ia latou ala kua tosi, ti na la masau loa ofaipe le kau polofeta i loto malie o le nofolaga.

²⁷ Na makape loa se tama tupulaga o fakasa le nea lena kia Moisese, o pati : E masau fakakikite Elitati mo Metati i loto malie o le nofolaga.

²⁸ Ti na pati loa Sosue, vosa o Nune, tagata fakasausau a Moisese talu mei lona ikiiki : Moisese, loku aliki, taofi laua !

²⁹ Na tali loa Moisese kiate ia : Pe ke finenonofo o tupu ko au ? E fakaamu ake ke liliu le kakai fuli o le Eteleno ko ni polofeta, ti ke finegalo malie le Eteleno o tuku lona Laumalie kia latou !

³⁰ Ti na ano loa Moisese ki le nofolaga, mo le kau fakamatuatua o Iselaele.

Ko kaia mo le tautea

³¹ Na fakaagi loa e le Eteleno mei le tai se matagi leia na aumai ia loa se ao kaia, ti na fakavilo loa e ia latou ki le nofolaga. Na maua loa latou i tafatafa o le nofolaga o kaku ki le gatoaga o le saele i se aso katoa, ti na lotou lele fua i aluga o le kele i se meta e tasi.

³² Na tutuu ake loa le kakai ki aluga, o tae a kaia i le aso katoa lena, mo le po katoa lena, ti mo le aso katoa ake leia. Ko leia na ikiiki lana tae na maua e ia o lau afe ana kilo. Na lotou fakalaalaa loa a kaia i le takatakai o le nofolaga.

³³ Kae koi lotou lolotoga uuti loa le kanoi manu, ti na leikiaise lotou lamulamu fua a ia, na mu loa se sausau o le Eteleno ki le kakai, ti na tautea loa e le Eteleno le kakai ki se masaki fakaii.

³⁴ Na tuku loa ki le ganea lena le igoa ko Kipiloti-Ataava, tanuma o le olioli, talie ko le ganea lena na tanu ai le kakai leia na apele i olioli fakatino.

³⁵ Ti na mavae loa le kakai i Kipiloti-Ataava o ano ki Aseloti ; ti na lotou nonofo loa i Aseloti.