Numelo 10 - Tosi Tapu

Fakatagi pupusi siliva e lua

¹ Na masau loa le Eteleno kia Moisese, o pati :

² Fai kiate koe ni fakatagi pupusi siliva e lua ; e ke fai loa laua ki se siliva leia kua tuki ki le amale. E fakaaoga loa laua ki le fakatasii o le kakai ti mo le fakasa o le mavae o le nofolaga.

³ Ka pupusi loa laua, e fakatasi loa le kakai katoa kiate koe, i le uluaga o le falela tapu.

⁴ Kapau e pupusi loa se fakatagi pupusi e tasi, ti e fakatasi loa kiate koe a pule famili, mo pule o afe o Iselaele.

⁵ Kapau e pupusi fakamakeke loa a fakatagi pupusi, e mavae loa latou ala e nonofo i le potu esite.

⁶ Ka kotou pupusi fakamakeke loa o tua lua, e mavae loa latou ala e nonofo i le fetuu saute. E pupusi fakamakeke loa ki lolatou mavae.

⁷ E kotou toe pupusi loa ke fakatasii ai le kakai, kae e leaise kotou pupusi fakamakeke loa

⁸ E gato tasi loa ki le kau tagata faisakilifisio, vosa o Alone, e pupusi ia loa a fakatagi pupusi. E kotou taupau loa le lao lena mo okoutou sakoga i temi fuli.

⁹ I lokoutou fenua, ka kotou ano loa o tau ki le fili leia na osoi ia koutou, e kotou pupusi fakamakeke loa a fakatagi pupusi, ti e manatui loa koutou e le Eteleno, ko lokoutou Atua, ti e saofaki loa e ia koutou mei okoutou fili.

¹⁰ I okoutou aso fakafiafia, mo okoutou aso lalasi, ti mo okoutou masina foou, e kotou pupusi loa a fakatagi pupusi, mo ka kotou momoli loa akoutou failaulau mo akoutou sakilifisio fakafetai, ti e lotou fakamanatu loa koutou ki lokoutou Atua. Ko au ko le Eteleno, ko lokoutou Atua.

Mavae i Sinai

¹¹ I le lua o fetuu, i le aso kau lua o le lua o masina, na malaga loa le ao i aluga o le tapenakulo o le fakamaoki.

¹² Ti na mavae loa fanau a Iselaele i le toafa o Sinai, o mulimuli ki le fakatotonu leia kua fakatuutuu e le Eteleno ki lalatou fanoga. Na tuu loa le ao i le toafa o Palani.

¹³ Na lotou fai loa le uluaki fanoga lena i le fakatotonu a le Eteleno kia Moisese.

¹⁴ Na uluaki mavae loa le manumanu o le nofolaga o Suta, mo ona kau tau. Na taki le kau tau o Suta e Nasoni, vosa o Aminatape ;

¹⁵ na taki le kau tau o le faasiga o vosa o Isakale e Netaneele, vosa o Sua ;

¹⁶ na taki le kau tau o le faasiga o vosa o Sapulone e Eliape, vosa o Elone.

¹⁷ Na vete loa le falela tapu, ti na ano loa a vosa o Kelesoni mo vosa o Melali, o amo le tapenakulo.

¹⁸ Na ano loa le manumanu o le nofolaga o Lupeni, mo ona kau tau. Na taki le kau tau a Lupeni e Elisule, vosa o Seteule ;

¹⁹ na taki le kau tau o le faasiga o vosa o Simeone e Selumiele, vosa o Sulisatai ;

²⁰ na taki le kau tau o le faasiga o vosa o Kate e Eliasafe, vosa o Teueli.

²¹ Na ano loa le kau Keati, o amo le sagatualio ; ti na fakatuu loa le tapenakulo o talitali ke lotou kaku ake.

²² Na ano loa le manumanu o le nofolaga o vosa o Efalaimi, mo ona kau tau. Na taki le kau tau o Efalaimi e Elisama, vosa o Amiute ;

²³ na taki le kau tau o le faasiga o vosa o Manase e Kameliele, vosa o Petasu ;

²⁴ na taki le kau tau o le faasiga o vosa o Pesamino e Apitane, vosa o Kiteoni.

²⁵ Na ano loa le manumanu o le nofolaga o vosa o Tane, mo ona kau tau : na lotou tapono ia loa le fanoga o nofolaga. Na taki le kau tau o Tane e Aiesele, vosa o Amisatai ;

²⁶ na taki le kau tau o le faasiga o vosa o Asele e Pakiele, vosa o Okalane ;

²⁷ na taki le kau tau o le faasiga o vosa o Nefetali e Aila, vosa o Enani.

²⁸ Ko lena le fakatuutuu leia na fanoga ai a fanau a Iselaele o mulimuli ki olatou kau tau, ti na lotou mavae fenaaki loa.

Ko Opapi

²⁹ Na pati loa Moisese kia Opapi, vosa o Leuele, tagata o Matiane, tamana o le avaga o Moisese : E motou ano ki le fenua leia na pati ki ai le Eteleno : e kau soli loa a ia kia koutou. Au ke tou ano, ti e motou fai loa kiate koe se nea malie, talie kua fakapapau le Eteleno ke fai se nea malie ki Iselaele.

³⁰ Na tali loa Opapi kiate ia : E leaise kau ano loa mo koutou ; kae kau toe liliu loa ki loku fenua mo loku famili.

³¹ Ti na pati loa Moisese : e kau kole atu kiate koe, ke aua na ke mavae ia matou ; talie e ke iloa ia a ganea o le toafa ala e feala ke motou fakatuu ai loa omatou nofolaga, e ke fai loa kia matou pe se tagata takitaki.

³² Ti kapau e ke au loa mo matou, e motou fakakau loa a koe ki nea malilie ala ka fai loa e le Eteleno kia matou.

³³ Na lotou mavae loa mei le mauga o le Eteleno, ti na lotou saele loa i aso e tolu : na muamua loa ia latou le aleka o le fakamaoki o le Eteleno, ti na fai loa e ia se saele i aso e tolu, o afa se ganea malolo kia latou.

³⁴ Na tuu le ao o le Eteleno i aluga o latou i le ao, i lalatou mavae i le nofolaga.

³⁵ Ka mavae loa le Aleka, na pati loa Moisese : Tuu ki aluga, Eteleno ! ti ke fakamavete ou fili ! ti ke fesolaki i ou mua latou ala e vesia kiate koe !

³⁶ Ti ka tuku loa le Aleka ki lalo, na pati loa Moisese : Toe liliu mai, Eteleno, ki atu miliate mo afe o Iselaele !