Neemia 9 - Tosi Tapu

Sesunio mo le kofesio o agasala a Iselaele

¹ I le aso kau lua tupu fa o le masina lena, na fakatasi loa fanau a Iselaele, ti na lotou tui loa ni taga mo pani loa le efu ki se sesunio.

² Ko latou ala na kau ki le sakoga o Iselaele, na mavae kese loa mei le kau matapule fuli, ti na lotou au loa o kofesio alatou agasala mo agaveli o olatou tamana.

³ Na lotou tutuu loa ki aluga, ti na lau loa le tosi o le lao a le Eteleno, lolatou Atua, i ni ola e tolu, ti na lotou punou loa o kofesio alatou agasala mo atolasio ki le Eteleno, lolatou Atua, i ni iki a ola e tolu.

⁴ Ko Sosue, mo Pani, mo Katemiele, mo Sepania, mo Puni, mo Selepia, mo Pani, mo Kenani na pale loa ki le ganea fai akonaki o le kau Levi, ti na lotou tagi leo lasi loa ki le Eteleno, lolatou Atua.

⁵ Ko le kau Levi ko Sosue, mo Katemiele, mo Pani, mo Asapenia, mo Selepia, mo Otisa, mo Sepania, mo Petasa, na pati loa : Kotou tutuu ki aluga ti kotou fakafetai ki le Eteleno, lokoutou Atua, o lee gato ! Ke fakafetai ki lou suafa fakakololia, leia e taualuga i tapuakina fuli mo fakafetai fuli !

⁶ Ko koe Eteleno, ko koe toka tasi, leia na fau ia le lagi, le lagi o atu lagi, ti mo olatou kau tau fuli, mo le kele ti mo nea fuli i ai, mo atu tai ti mo nea fuli i ai. E ke soli le mauli ki nea fuli ana, ti e atolasio kiate koe le kau tau katoa o le atu lagi.

⁷ Ko koe Eteleno Atua leia na filifili ia Apalamo, ko koe leia na fakamavae ia a ia mei Ulu i Kaletea, ti na soli ia kiate ia le igoa ko Apalaamo.

⁸ Na ke iloa loa lona loto na faitotonu i ou mua, na ke fai loa se sai mo ia, ti na ke fakapapau loa ke soli ki lona sakoga le fenua o le kau Kanaane, mo le kau Eti, mo le kau Amole, mo le kau Felesi, mo le kau Sepusi ti mo le kau Kilekasi, ti na ke taupau lau fakapapau, talie e ke faitotonu.

⁹ Na ke tio loa ki le mamae o omatou tamana i Esipito, ti na ke logo loa ki alatou tagi i le tai kula.

¹⁰ Na ke fai loa ni milakulo mo ni nea fakamanamana kia Falaone, mo ana tagata fakasausau ti mo le kakai katoa o lona fenua, talie na ke iloa lalatou fakavelivelii omatou tamana, ti na ke fakasa loa lou kololia ofaipe lau fakasa i le aso nei.

¹¹ Na ke fakamavaa loa le tai i olatou mua, ti na lotou saele loa i le malo i loto malie o le tai ; kae na ke ti loa ki le tai latou ala na tuli ia latou, ti na lotou ogo loa ofaipe se fa fatu i le vai loloto.

¹² Na ke taki loa latou i le ao ki se fa pou ao, ti na ke taki loa latou i le pouli ki se fa pou afi, leia na fakamalama ia lolatou ala, le ala leia na tonu ke lotou saele ai.

¹³ Na ke ifo mai loa i le mauga o Sinai, ti na ke masau loa kia latou mei le lagi, ti na ke soli loa kia latou a fakatotonu maoki, a lao o le maoki, mo pelesepeto, mo folafola saosaoa.

¹⁴ Na ke fakasa loa kia latou lou sapato maokioki, ti na ke fakatuutuu loa a nea ana kia latou i lau tagata fakasausau ko Moisese, mo au folafola, mo au pelesepeto, mo au lao.

¹⁵ Na ke soli loa kia latou se pane mei lagi, i le temi leia na lotou fia kai ai, ti na ke fakasali loa se vai mei le utu i le temi leia na lotou fia inu ai.

¹⁶ Kae na fia nealasi omatou tamana, o fakafefeka olatou ua. Na leaise lotou fakalogo loa ki au folafola,

¹⁷ ti na lotou patigataa loa, ti na lotou galoi loa a nea malilie ala na ke fai kia latou. Na lotou fakafefeka loa olatou loto ; i lolatou fakatutuu, na lotou filifili loa se pule kia latou, ke lotou toe liliu ki le popula. Kae ko koe ko se Atua leia e loto fakamolemole, mo manava alofa, leia e leaise ita vave, ti e mou koloa i le agamalie, o leaise ke tiaki loa latou,

¹⁸ i le temi leia na lotou fau ai se uviki pipi aulo, o pati : Ko leinei lou Atua, leia na fakamavae ia a koe mei Esipito, ti na lotou lauveli lasi loa kiate koe.

¹⁹ I lou manava alofa lasi, na leaise ke tiaki loa latou i le toafa, ti na leaise puli loa le fa pou ao leia na taki ia latou i le ao i le ala, ti mo le fa pou afi leia na taki ia latou i le pouli i le ala leia na tonu ke lotou saele ai.

²⁰ Na ke soli loa kia latou lou Laumalie ke lotou liliu o fakalogo, ti na leaise ke too loa lau mana mei olatou gutu, ti na ke soli loa se vai ki lolatou fia inu.

²¹ Na ke tokaga kia latou i fetuu e kau fa i le toafa, ti na leaise puli fua se nea kia latou, ti na leaise popo fua olatou kofu, ti na leaise veveli fua olatou vae.

²² Na ke soli loa kia latou ni puleaga mo ni kakai, ti na ke vaevae kia latou le fenua, ti na lotou maua loa le fenua o Sione, sau o Eseponi, ti mo le fenua o Oke, sau o Pasani.

²³ Na ke liuliuga loa olatou vosa ofaipe fetuu o le lagi, ti na ke fakaulu loa latou ki le fenua leia na ke fakasa ki olatou tamana, leia ke lotou maua tofiga.

²⁴ Ti na ulu loa olatou vosa o maua le fenua, ti na ke fakagaegae loa i olatou mua le kakai o le fenua o Kanaane, ti na ke tuku loa olatou sau mo le kakai o le fenua ki olatou lima, o tupu ke lotou fai kia latou o mulimuli ki olatou loto.

²⁵ Na lotou pule loa ki ni kolo tau ti mo ni fenua malilie ; na lotou maua loa ni fale kua apele i nea malilie kesekese, mo ni sosoni kua oki i le kenu, mo ni faisaga vite, mo ni faisaga oliveto, mo ni faisaga laakau fua, o lasi ai ; ti na lotou kakai loa o makokona, ti na lotou pepeti loa, ti na lotou fiafia loa, o tupu ko lou agamalie.

²⁶ Kae na lotou malaga loa kiate koe. Na lotou tiaki loa lau lao ki muli, ti na lotou tamate loa lau kau polofeta leia na kolekole kia latou ke toe liliu mai kiate koe, ti na lotou fai loa kiate koe ni nea veveli.

²⁷ Koia na ke tuku ai loa latou ki lima o olatou fili, ala na fakaveliveli loa kia latou. Kae i le temi o lolatou mamae, na lotou tagi loa kiate koe ; ti na ke logo loa kia latou mei lagi, ti na ke soli loa kia latou ni tagata ke saofaki ia latou mei le lima o olatou fili, o tupu ko lou manava alofa.

²⁸ Kae ka lotou maua loa le malolo, na lotou toe kamata loa le fai o le nea leia e veli ki ou mata. Koia na ke tuku ai loa latou ki lima o olatou fili, ala na pulei ia loa latou. Kae na lotou toe tagi loa kiate koe ; ti na ke logo loa kia latou mei lagi, ti na ke saofaki loa latou o tua lasi, o tupu ko lou manava alofa.

²⁹ Na ke kolekole loa ke lotou toe liliu mai ki lau lao ; kae na lotou soko atu lolatou fia nealasi, na leaise lotou fakalogo loa ki au folafola, kae na lotou agasala loa ki au fakatotonu ala e fakamauli ia latou ala e taupau ia latou, ti na lotou agatuu loa, ti na leaise lotou fia fakalogo ki lau pule, kae na lotou fakafefeka olatou ua ti na leaise lotou fakalogo loa.

³⁰ Na ke kataki kia latou i ni fetuu mauke, ti na ke fakatokaga kia latou ki lou Laumalie, i lau kau polofeta ; kae na leaise tokaga fua olatou taliga. Koia na ke tuku ai loa latou ki lima o ni kakai matapule.

³¹ Kae i lou manava alofa lasi, na leaise ke pulii latou, na leaise ke tiaki oki latou, talie ko koe ko se Atua agamalie mo manava alofa.

³² Ti ko leinei, ei lomatou Atua, Atua lasi, mo mafimafi, mo fakaii, a koe leia e taupau ia lau sai ti e manava alofa, aua na ke tio ki mamae fuli ala na motou tali ofaipe se ganea noa, a mamae ala na motou tali e matou, mo omatou sau, mo omatou pule, mo omatou tagata faisakilifisio, mo omatou polofeta, mo omatou tamana ti mo le kakai katoa, mei le temi o sau o Asilia o kaku mai ki le aso nei.

³³ Na ke faitotonu i nea fuli ala na soko kia matou, talie na ke agatonu kae na motou fai le nea leia e veli.

³⁴ Ko omatou sau, mo omatou pule, mo omatou tagata faisakilifisio, ti mo omatou tamana na leaise lotou taupau ia lau lao, ti na leaise lotou fakalogo ki au folafola, ti mo fakatokaga ala na ke fai kia latou.

³⁵ I le temi na lotou pule ai ki nea malilie ala na ke soli kia latou, i le fenua lau lasi mo kele malilie ala na ke soli kia latou, na leaise lotou tausi kiate koe, ti na leaise lotou tafoki mei alatou gaoi veveli.

³⁶ I le aso nei, kua motou popula ! Kua motou popula i le kele leia na ke soli ki omatou tamana, ke lotou fiafia i ona fua mo ona koloa !

³⁷ Kua liuliuga e le kele ona fua ki sau ala na ke tuku ke motou popula ki ai, o tupu ko amatou agasala ; kua lotou pule faitalisa kia matou mo amatou kau manu, ti kua motou nonofo i se mamae lasi !

Fakafoou o le sai

³⁸ O tupu ko nea fuli ana, e motou fai loa se sai ke tuu mau mo fakamaoki i se tosi ; ti na fakamaoki loa a ia e omatou pule, mo omatou Levi ti mo omatou tagata faisakilifisio.