Neemia 8 - Tosi Tapu

Lau mo le fakamatala o le lao

¹ Ti na fakatasi loa le kakai katoa ofaipe se tagata e tasi i le malae leia e tuu i mua o le matapa o vai. Na lotou pati loa kia Esetalasi, le sekelipa, ke aumai le tosi o le lao a Moisese, leia na tosi e le Eteleno ki Iselaele.

² Ti na aumai loa e le tagata faisakilifisio ko Esetalasi le tosi o le lao ki mua o le fakatasiga a le kau tagata mo le kau fafine, ti mo latou fuli ala na mafai ke logo ki ai. Ko le uluaki aso a ia o le masina fitu.

³ Na lau loa e Esetalasi le tosi mei le usu o kaku ki le lalaatea, i le malae leia na tuu i mua o le matapa o vai, i mua o tagata mo fafine ti mo latou fuli ala na mafai ke logo ki ai. Na fakalogo malie loa le kakai katoa ki le lau o le tosi o le lao.

⁴ Na tuu le sekelipa ko Esetalasi i aluga o se ganea taualuga leia na fau ki ni papa o uiga mo le lau o le tosi. Ti na tuu i ona tafa, i lona fetuu atamai, a Matitia, mo Sema, mo Anasa, mo Uli, mo Ilekisa, mo Maasesa, ti na tuu i lona fetuu sema a Petasa, mo Misaele, mo Malekisa, mo Asume, mo Asepatana, mo Sakalia, mo Mesulame.

⁵ Na fakamavaa loa e Esetalasi le tosi i mua o le kakai katoa ; i le oki o lana fakamavaa, na tutuu loa le kakai katoa ki aluga.

⁶ Na fakafetai loa Esetalasi ki le Eteleno, le Atua lasi, ti na siki loa e le kakai katoa olatou lima ki aluga, o tali : Amene ! Ti na lotou tulolo loa ki le kele, o atolasio ki le Eteleno.

⁷ Ti na fakamatala loa e Sosue, mo Pani, mo Selepia, mo Samine, mo Akupe, mo Sapetai, mo Otisa, mo Maasesa, mo Kelita, mo Asalia, mo Sosapate, mo Anane, mo Pelasa, ti mo le kau Levi le lao ki le kakai, kae na tutuu loa le kakai i lona ganea.

⁸ Na lotou lau loa ke matala le tosi o le lao o le Atua, ti na lotou fakamatala le uiga o le nea leia na lotou lau ki le kakai.

Fakamanatu o le aso o fale pola

⁹ Ko Neemia, leia ko le kovana, mo Esetalasi, leia ko le tagata faisakilifisio mo le sekelipa, ti mo le kau Levi, ala na ako ia le kakai, na pati loa ki le kakai katoa : Ko le aso leinei e fakatapui ki le Eteleno, lokoutou Atua ; aua na kotou nofo i le mamae mo le tagi, talie kua fetagisi le kakai katoa i le logo ki folafola o le lao.

¹⁰ Na lotou pati loa ki le kakai : Kotou ano, kotou kai ni inati malilie, ti kotou inu ni nea inu malilie, ti kotou ave ni vaega kia latou ala na leaise teuteui ia se nea kai, talie ko le aso leinei kua fakatapui ki lotatou Aliki ; aua na kotou loto mamae, talie ko le fiafia o le Eteleno ko lokoutou makekeaga.

¹¹ Ti na fakafimalie loa e le kau Levi le loto o le kakai katoa, o pati kia latou : Aua na kotou fetagisi, talie ko le aso leinei ko se aso taputapu ; aua na kotou loto mamae !

¹² Ti na ano loa le kakai katoa o kai, mo inu, mo tufa alatou nea kai, ti mo fakafiafia. Talie na lotou matala loa ki le uiga o le folafola leia na fakamatala kia latou.

¹³ I le lua o aso, ko le kau pule famili o le kakai katoa, mo le kau tagata faisakilifisio, mo le kau Levi na fakatasi ake loa kia Esetalasi, le sekelipa, o logo ki le fakamatala o folafola o le lao.

¹⁴ Ti na lotou maua loa e tosi i le lao, leia na tuku e le Eteleno kia Moisese, e tonu ke nonofo a fanau o Iselaele i ni fale pola, i le lolotoga o le fakatasi lasi o le fitu o masina,

¹⁵ ti e tonu ke fai le logologo lena i olatou kolo fuli ti mo Selusalemi, o pati : Kotou ano o afa mai mei le mauga ni taulu oliveto, mo ni taulu oliveto vao, mo ni taulu mila, mo ni taulu palemie, mo ni taulu lau laakau laulau, ke fakatuu ai ni fale pola ofaipe le nea leia e tuu i le tosi.

¹⁶ Ti na ano loa le kakai o afa mai ni taulu laakau, ti na lotou fakatuu loa ni fale pola i ato o olatou fale, mo olatou malae, mo malae o le fale o le Atua, mo le malae i mua o le matapa o vai, ti mo le malae o le matapa o Efalaimi.

¹⁷ Ko le kakai katoa leia na toe liliu mai mei le popula na fakatuu ia loa ni fale pola, ti na lotou nonofo loa i ai. Talu mei le temi o Sosue, vosa o Nune, o kaku mai ki le aso leinei, na leaise fai e fanau a Iselaele se nea o tatau mo le nea leinei. Ti na i ai loa se fiafia lasi.

¹⁸ Na lau loa i le tosi o le lao a le Atua i aso fuli, mei le uluaki aso o kaku ki le aso fakaoki o le fakatasi. Na fai loa le fakatasi i lolotoga o aso e fitu, ti na fai loa se fakatasi mamalu i le aso fakaoki, o mulimuli ki lona lekula.