Neemia 6 - Tosi Tapu

Ni iki faigataa na tau mo Neemia ; fakaoki o le paa

¹ Na logo loa Sanepala, mo Topisa, mo Kesemi, le Alape, ti mo le toega o omatou fili, kua lagai le paa ti kua tapono a mavaa, kae na leikiaise kau fakapikipiki a matapa i le temi lena.

² Ti na kakau mai loa kiate au e Sanepala mo Kesemi se tasi, o pati : Au ke tou felogoi fakatasi i kolo liliki o le vaivailiua o Ono. Na lotou fakakaukau ke lotou fai se nea veli kiate au.

³ Na kau kakau loa kia latou ni tagata avelogo mo le tali leinei : E kau fai se gaoi lasi, ti e leaise feala ke kau ifo atu ; talie e tuu loa le gaoi i le temi leia e kau ifo atu ai loa kia koutou.

⁴ Na lotou fai mai le kole lena kiate au o tua fa, ti na kau fai kia latou le tali lena e tasi.

⁵ I le tua lima, na kakau mai loa kiate au e Sanepala lana tagata fakasausau mo se tosi.

⁶ Na tosi i ai : kua mafola le logo i puleaga, ti kua fakasa e Kasemu, ko koe mo le kau Sutea kua kotou fai se fakafesagai ki le sau, koia leia kua kotou lagai ai le paa fatu. E pati ka ke liliu loa ko lolatou sau,

⁷ ti kua ke fakanofo foki ni polofeta ke lotou fakanofo a koe i Selusalemi i Suta. Ti ko leinei e kaku loa a nea ana ki le sau. Koia ke ke au ai, ti ke tou felogoi fakatasi.

⁸ Na kau fakatotonu loa ke tali kia Sanepala, o pati : Ko le nea leia kua ke masau ki ai e leaise maoki ; ko koe fai leia na fakatupu ia !

⁹ Talie na faiga latou fuli ana ke fakaii kia matou, o pati : E lotou loto gaegae loa, ti e leaise fai loa le gaoi. I le lakaga nei, ei loku Atua, ke ke fakamakeke au !

¹⁰ Sili a ia, na kau ano loa ki le fale o Semaesa, vosa o Telasa, vosa o Meetapeele, talie na leaise mafai lana au kiate au, ti na pati mai loa a ia kiate au : Ke ta ano fakatasi ki le fale o le Atua, ki loto malie o le fale tapu, ti ke ta tapono loa a matapa o le fale tapu ; talie e lotou au loa o tamate a koe, ti e lotou au loa i le pouli.

¹¹ Na kau tali loa : E leaise ko se tagata au ke sola ! Pe mafai loa ki se tagata pe au ke ulu ki le sagatualio kae mauli ? E leaise kau ulu loa.

¹² Na kau iloa loa i le nea lena na leaise kakau mai a ia e le Atua. Kae na fai e ia le kikite lena kiate au, o tupu na soli se paaga e Sanepala mo Topisa kiate ia.

¹³ I lona totogi, na manatu Sanepala mo Topisa e kau i loa, ti e kau mulimuli loa ki tokoi a Semaesa, o kau fai loa se agasala ; ti e lotou maua loa se faigamalie ke valoki ai au mo fakalumai ai au i mua o le kakai.

¹⁴ Ke ke manatui, ei loku Atua, a Sanepala, mo Topisa, mo ala gaoi ! Ke ke manatui foki a Noatia, le fafine polofeta, mo le kau polofeta leia na faiga ke kau i.

¹⁵ Na oki loa le paa fatu o le kolo i le aso kau lua tupu lima o le masina o Elule : na aso kau lima tupu lua.

¹⁶ I le logo omatou fili fuli ki le nea lena, na i loa a puleaga fuli i omatou tafatafa, ti na lotou luma lasi loa, o tupu na lotou iloa loa kua soko le gaoi i le finegalo o lomatou Atua.

¹⁷ I le temi foki lena, na ave ni tosi e ni pule o Suta kia Topisa, ti na aumai ni tosi e Topisa kia latou.

¹⁸ Talie na kau se toka api o Suta kiate ia i ni fakapapau, talie ko le fugao a ia o Sekania, vosa o Alake, ti ko lona vosa ko Sokanane, leia na avaga mo le taine o Mesulame, vosa o Pelekia.

¹⁹ Na lotou lau foki ona malie i oku mua, ti na lotou ave aku masau kiate ia. Na tautau aumai e Topisa ni tosi kiate au ke tupu ai soku i.